ഞങ്ങളുടെ 'പ്രണയം' ഇനി ഒരിക്കലും മരിക്കില്ല..ഇതാണ് എന്റെ പ്രതികാരം! താൻ ജീവന് തുല്യം സ്നേഹിച്ച കാമുകൻ്റെ മൃതദേഹത്തിൽ കെട്ടിപ്പിടിച്ച് കരയുന്ന പെൺകുട്ടി; പെട്ടെന്ന് എല്ലാവരും നോക്കിനിൽക്കേ കാമുകി ചെയ്തത്; കൂടെ ഒരു മുന്നറിയിപ്പും; മഹാരാഷ്ട്രയിലെ ജാതി കൊല ഞെട്ടിക്കുന്നത്

നാന്ദേഡ്: ജാതി വ്യത്യാസത്തിന്റെ പേരിൽ കുടുംബം കൊലപ്പെടുത്തിയ കാമുകന്റെ മൃതദേഹത്തെ വിവാഹം ചെയ്ത് പ്രതികാരം തീർത്ത് കാമുകി. മഹാരാഷ്ട്രയിലെ നാന്ദേഡിൽ നടന്ന ഞെട്ടിക്കുന്ന ദുരഭിമാനക്കൊലയുടെ വേദനകൾക്കിടയിലും പ്രണയത്തിന്റെ ശക്തി വിളിച്ചോതുന്ന ഈ സംഭവം ഏറെ ചർച്ചയാവുകയാണ്.

കൊല്ലപ്പെട്ട 20 വയസ്സുകാരനായ സക്ഷം ടേറ്റിന്റെ മൃതദേഹത്തിൽ മഞ്ഞൾ ചാർത്തുകയും സ്വന്തം നെറ്റിയിൽ സിന്ദൂരം അണിയുകയും ചെയ്താണ് കാമുകി ആഞ്ചൽ പ്രതീകാത്മകമായി വിവാഹം നടത്തിയത്. തൻ്റെ ജീവിതകാലം മുഴുവൻ ടേറ്റിൻ്റെ വീട്ടിൽ ഒരു മരുമകളായി കഴിയാനാണ് യുവതിയുടെ തീരുമാനം.

സക്ഷം ടേറ്റും ആഞ്ചലും തമ്മിൽ മൂന്ന് വർഷമായി പ്രണയത്തിലായിരുന്നു. ആഞ്ചലിന്റെ സഹോദരങ്ങൾ വഴിയാണ് ടേറ്റിനെ പരിചയപ്പെട്ടതെങ്കിലും, ഇരുവരുടെയും വ്യത്യസ്ത ജാതികൾ ബന്ധത്തിന് തടസ്സമായി. ആഞ്ചലിന്റെ കുടുംബം ഈ ബന്ധത്തെ ശക്തമായി എതിർക്കുകയും പിന്മാറാൻ ഭീഷണിപ്പെടുത്തുകയും ചെയ്തു. നിരവധി ഭീഷണികളുണ്ടായിട്ടും ആഞ്ചൽ ടേറ്റുമായുള്ള ബന്ധം തുടർന്നു.

ഇരുവരും വിവാഹം കഴിക്കാൻ തീരുമാനിച്ച വിവരം അറിഞ്ഞതോടെ ആഞ്ചലിന്റെ കുടുംബം പകയോടെ പ്രതികരിച്ചു. വ്യാഴാഴ്ച, ആഞ്ചലിന്റെ പിതാവും സഹോദരങ്ങളും ചേർന്ന് ടേറ്റിനെ അതിക്രൂരമായി ആക്രമിച്ചു. മർദ്ദനത്തിന് ശേഷം ടേറ്റിനെ വെടിവയ്ക്കുകയും കല്ലുകൊണ്ട് തല ചതയ്ക്കുകയും ചെയ്തു. ടേറ്റ് സംഭവസ്ഥലത്ത് വെച്ച് തന്നെ മരിച്ചു.

ടേറ്റിന്റെ കൊലപാതകത്തിന് ശേഷം, അന്ത്യകർമ്മങ്ങൾ നടക്കുന്നതിനിടെയാണ് ആഞ്ചൽ ടേറ്റിന്റെ വീട്ടിലെത്തിയത്. അവിടെ വെച്ച്, മരിച്ച കാമുകന്റെ മൃതദേഹത്തിൽ ആചാരപ്രകാരം മഞ്ഞൾ ചാർത്തിയും, സ്വന്തം നെറ്റിയിൽ സിന്ദൂരം അണിഞ്ഞും ആഞ്ചൽ ടേറ്റിനെ വിവാഹം കഴിച്ചു.

"സക്ഷമിന്റെ മരണത്തിലും ഞങ്ങളുടെ പ്രണയം ജയിച്ചു, എൻ്റെ അച്ഛനും സഹോദരങ്ങൾക്കും തോറ്റു," എന്ന് ആഞ്ചൽ ദുഃഖത്തോടെയും രോഷത്തോടെയും പറഞ്ഞു. തങ്ങളുടെ പ്രണയം ഇപ്പോഴും ജീവനോടെയുണ്ടെന്നും, അതുകൊണ്ടാണ് ഈ വിവാഹം കഴിച്ചതെന്നും അവർ കൂട്ടിച്ചേർത്തു.

കാമുകന്റെ കൊലയാളികൾക്ക് വധശിക്ഷ നൽകണമെന്നും ആഞ്ചൽ ആവശ്യപ്പെട്ടു. ഈ സംഭവത്തിൽ ആഞ്ചലിന്റെ പിതാവും സഹോദരങ്ങളും ഉൾപ്പെടെ ആറ് പേർക്കെതിരെ പോലീസ് വിവിധ വകുപ്പുകൾ പ്രകാരം കേസെടുക്കുകയും അറസ്റ്റ് ചെയ്യുകയും ചെയ്തു. ജാതിയുടെ പേരിലുള്ള ഈ ദുരഭിമാനക്കൊല രാജ്യത്ത് വീണ്ടും വലിയ ചർച്ചാവിഷയമായിരിക്കുകയാണ്.