സ്‌കൂള്‍ കുട്ടികള്‍ക്ക് നാല് കിലോ വീതം അരി; അരി ലഭിക്കുക പ്രീ-പ്രൈമറി മുതല്‍ എട്ടാം ക്ലാസ് വരെയുള്ള കുട്ടികള്‍ക്ക്; സര്‍ക്കാരിന്റെ ഓണം സമ്മാനം എന്ന് മന്ത്രി ശിവന്‍കുട്ടി
തിരുവനന്തപുരം: ഓണാഘോഷത്തിന്റെ ഭാഗമായി സംസ്ഥാനത്തെ എല്ലാ സര്‍ക്കാര്‍, സഹായധന സ്‌കൂളുകളിലെ ഉച്ചഭക്ഷണ പദ്ധതിയുടെ ഗുണഭോക്താക്കളായ വിദ്യാര്‍ത്ഥികള്‍ക്ക് 4 കിലോഗ്രാം അരി വീതം നല്‍കുമെന്ന് വിദ്യാഭ്യാസമന്ത്രി അറിയിച്ചു. പ്രീ-പ്രൈമറി മുതല്‍ എട്ടാം ക്ലാസ് വരെയുള്ള 24,77,337 കുട്ടികള്‍ക്കാണ് പദ്ധതിയുടെ ഗുണം ലഭിക്കുക.
അരി വിതരണം ചെയ്യുന്നതിനായി സിവില്‍ സപ്ലൈസ് കോര്‍പ്പറേഷന്റെ (സപ്ലൈക്കോ) സ്റ്റോക്ക് സര്‍ക്കാര്‍ അനുവദിച്ചു. അരി നേരിട്ട് സ്‌കൂളുകളിലെത്തിക്കുന്നതിനുള്ള ചുമതല സപ്ലൈക്കോയ്ക്ക് നല്‍കിയിട്ടുണ്ട്. ഇതിനായി നിലവിലെ കടത്തുകൂലിക്ക് പുറമെ കിലോഗ്രാമിന് 50 പൈസ അധികമായി നല്‍കും.
ജില്ലകളില്‍ സ്റ്റോക്ക് കുറവുണ്ടെങ്കില്‍ സമീപ ജില്ലകളിലെ ഡിപ്പോകളില്‍ നിന്ന് അരി എത്തിച്ച് വിതരണം നടത്താന്‍ നിര്‍ദേശം നല്‍കിയിട്ടുണ്ട്. ഇതുമൂലം ഉണ്ടാകുന്ന അധിക ചെലവ് നിലവിലെ കടത്തുകൂലി നിരക്കിനുള്ളില്‍ തന്നെ നിയന്ത്രിക്കാമെന്ന് വ്യക്തമാക്കിയിട്ടുണ്ട്.