ബസും സ്കൂട്ടറും കൂട്ടിയിടിച്ച് അപകടം; സ്‌കൂട്ടർ യാത്രക്കാരിയായ വയോധിക മരിച്ചു; ഒരാൾക്ക് പരിക്ക്; സംഭവം കണ്ണൂരിൽ

കണ്ണൂർ: കക്കാട് കുഞ്ഞിപ്പള്ളി പെട്രോൾ പമ്പിന് സമീപം ബസും സ്കൂട്ടറും കൂട്ടിയിടിച്ചുണ്ടായ അപകടത്തിൽ വയോധിക മരിച്ചു. അത്താഴക്കുന്ന് അരുംഭാഗം തഖ്വ പള്ളിക്ക് സമീപം കെ.പി. ഹൗസിൽ കെ.പി. റഷീദ (65) ആണ് മരിച്ചത്. ബന്ധുവായ റാഹിലയാണ് സ്കൂട്ടർ ഓടിച്ചത്. അപകടത്തിൽ പരിക്കേറ്റ ഇവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

ഇന്നലെ വൈകിട്ട് നാലോടെയാണ് സംഭവം. കണ്ണൂർ ഭാഗത്തേക്ക് പോവുകയായിരുന്ന സ്കൂട്ടറിലാണ് എതിർദിശയിൽ നിന്നെത്തിയ ബസ് ഇടിച്ചത്. അപകടത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. റോഡിന്റെ വശത്തുനിന്ന് ബസ് വരുന്നത് ശ്രദ്ധിക്കാതെ റോഡ് കുറുകെ കടക്കുന്നതിനിടെയാണ് സ്കൂട്ടറിൽ ബസ് ഇടിച്ചതെന്ന് ദൃശ്യങ്ങളിൽ വ്യക്തമായി കാണാം. സാരമായി പരിക്കേറ്റ റഷീദയെ ഉടൻതന്നെ നാട്ടുകാർ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.