'ശെടാ..'; കാറിൽ വരുന്ന അച്ഛനെയും മകനെയും കണ്ട് പോലീസിന് സംശയം; പിടിച്ചുനിർത്തി പരിശോധിച്ചതും കുടുങ്ങി; പൊക്കിയത് 10 കിലോ കഞ്ചാവ്

പാലക്കാട്: നെന്മാറയിൽ 10 കിലോ കഞ്ചാവുമായി അച്ഛനും മകനും അറസ്റ്റിൽ. നെന്മാറ ചാത്തമംഗലം സ്വദേശികളായ കാർത്തിക് (23), പിതാവ് സെന്തിൽ കുമാർ (53) എന്നിവരെയാണ് പോലീസ് അറസ്റ്റ് ചെയ്തത്. ഇന്നലെ ഉച്ചയ്ക്ക് രണ്ടുമണിയോടെ കൊല്ലംകോട്-വടക്കഞ്ചേരി സംസ്ഥാന പാതയിൽ വിത്തനശ്ശേരിക്ക് സമീപമാണ് ഇവർ കുടുങ്ങിയത്.

ഇവർ സഞ്ചരിച്ച കാറും കസ്റ്റഡിയിലെടുത്തിട്ടുണ്ട്. സംശയം തോന്നിയതിനെ തുടർന്നാണ് പോലീസ് വാഹനം തടഞ്ഞുനിർത്തി പരിശോധിച്ചത്. പരിശോധനയിൽ വാഹനത്തിൽ നിന്ന് 10 കിലോയോളം കഞ്ചാവ് കണ്ടെത്തുകയായിരുന്നു.

നെന്മാറ എക്സൈസ് ഇൻസ്പെക്ടർ പി. സുരേഷിന്റെ നേതൃത്വത്തിലുള്ള സംഘമാണ് ഇവരെ പിടികൂടിയത്. പ്രിവന്റീവ് ഓഫീസർമാരായ പ്രവീൺ കെ. വേണുഗോപാൽ, കെ. സാബു, കെ. ആനന്ദ്, സീ. സനോജ്, ജെ. അജീഷ്, ആർ. രാജേഷ്, വി. ഷീജ എന്നിവരും സംഘത്തിലുണ്ടായിരുന്നു. അറസ്റ്റ് രേഖപ്പെടുത്തിയ ശേഷം പ്രതികളെ കോടതിയിൽ ഹാജരാക്കി.