രാജ്യത്തെ സൈബര്‍ സുരക്ഷയുമായി ബന്ധപ്പെട്ടുള്ള ഗവേഷണങ്ങള്‍ ശക്തിപ്പെടുത്താന്‍ അമൃത വിശ്വവിദ്യാപീഠവുമായി സഹകരിച്ച് മിലിട്ടറി കോളേജ് ഓഫ് ടെലികമ്മ്യൂണിക്കേഷന്‍ എഞ്ചിനീയറിംഗ്; ധാരണാപത്രം ഒപ്പവച്ചു
ഇന്‍ഡോര്‍ (മധ്യപ്രദേശ്) : ഇന്ത്യയുടെ ഡിജിറ്റല്‍ പ്രതിരോധ രംഗത്തെ ശക്തിപ്പെടുത്തുന്നതിനുള്ള സുപ്രധാന കരാറില്‍ അമൃത വിശ്വവിദ്യാപീഠവും മിലിട്ടറി കോളേജ് ഓഫ് ടെലികമ്മ്യൂണിക്കേഷന്‍ എഞ്ചിനീയറിംഗും ഒപ്പു വച്ചു. ഗവേഷണവും നവീകരണവും ശക്തിപ്പെടുത്താനുള്ള ഈ പദ്ധതിയിലൂടെ സൈബര്‍ സുരക്ഷരംഗത്ത് നൂതനമായ സാങ്കേതികവിദ്യ ഉള്‍പ്പെടുത്തല്‍, വിദഗ്ദ പരിശീലനം എന്നിവയില്‍ ശ്രദ്ധ കേന്ദ്രീകരിച്ചുള്ള സഹകരണത്തിനാണ് അമൃത വിശ്വവിദ്യാപീഠത്തിന്റെ കോയമ്പത്തൂര്‍ ക്യാമ്പസും മിലിട്ടറി കോളേജ് ഓഫ് ടെലികമ്മ്യൂണിക്കേഷന്‍ എഞ്ചിനീയറിംഗ് (എം.സി.ടി.ഇ.) ഇന്‍ഡോറുമായി ധാരണയായത്.
സൈബര്‍ സുരക്ഷയിലും അനുബന്ധ മേഖലകളിലെയും മികവിന് പേരുകേട്ട രാജ്യത്തെ മുന്‍നിര ഗവേഷണ സ്ഥാപനങ്ങളിലൊന്നാണ് അമൃത വിശ്വവിദ്യാപീഠം. പ്രതിരോധ മേഖല അഭിമുഖീകരിക്കുന്ന പ്രശ്നങ്ങള്‍ തത്സമയം സംയുക്തമായി വിശകലനം ചെയ്യുക, പരിശീലന മൊഡ്യൂളുകള്‍, കാപ്സ്യൂള്‍ കോഴ്സുകള്‍, സര്‍ട്ടിഫിക്കേഷന്‍ പ്രോഗ്രാമുകള്‍ എന്നിവ സഹകരിച്ച് നടപ്പിലാക്കുക, വൈജ്ഞാനിക വിഭാഗം, വിദ്യാര്‍ത്ഥി, കൈമാറ്റ സംരംഭങ്ങള്‍ ആരംഭിക്കുക, ഉയര്‍ന്നുവരുന്ന സാങ്കേതിക വിദ്യകളില്‍ ഭാവിയിലേക്കാവശ്യമായ ഗവേഷണങ്ങള്‍ നടത്തുക എന്നിവയാണ് പ്രധാനമായും ഈ ഒരു സഹകരണത്തിലൂടെ ലക്ഷ്യമിടുന്നത്.
അമൃത സര്‍വകലാശാലയുടെ അക്കാദമിക്, ഗവേഷണ രംഗത്തെ അനുഭവ സമ്പത്തും എംസിടിഇ യുടെ പ്രവര്‍ത്തന, സാങ്കേതിക വൈദഗ്ധ്യവും ഒത്തുചേരുമ്പോള്‍ നൂതനമായ കണ്ടുപിടുത്തങ്ങള്‍ ഉണ്ടാകുമെന്നാണ് പ്രതീക്ഷിക്കുന്നത്. അമൃത വിശ്വ വിദ്യാപീഠം സൈബര്‍ സെക്യൂരിറ്റി ടി.ഐ.എഫ്.എ.സി. കോര്‍ ഡയറക്ടര്‍ പ്രൊഫ. സേതുമാധവന്റെ സാന്നിധ്യത്തില്‍ അമൃത വിശ്വ വിദ്യാപീഠം രജിസ്ട്രാര്‍ ഡോ. പി. അജിത് കുമാര്‍, എം.സി.ടി.ഇ. യിലെ ഡെപ്യൂട്ടി കമാന്‍ഡന്റും ചീഫ് ഇന്‍സ്ട്രക്ടറുമായ മേജര്‍ ജനറല്‍ ഗൗതം മഹാജന്‍ എന്നിവര്‍ ചേര്‍ന്നാണ് ധാരണാപത്രത്തില്‍ ഒപ്പുവച്ചത്.
രാജ്യത്തെ പ്രതിരോധ മേഖലയ്ക്കായി സൈബര്‍ സുരക്ഷാ രംഗത്തും മറ്റും നൂതന പരിഹാരങ്ങള്‍ വികസിപ്പിക്കുന്നതിനുള്ള ഒരു വേദിയാണ് അമൃതയുമായുള്ള സഹകരണത്തിലൂടെ സൃഷ്ടിക്കപ്പെടുന്നതെന്ന് എം.സി.ടി.ഇ. ഡെപ്യൂട്ടി കമാന്‍ഡന്റും ചീഫ് ഇന്‍സ്ട്രക്ടറുമായ മേജര്‍ ജനറല്‍ ഗൗതം മഹാജന്‍ അഭിപ്രായപ്പെട്ടു.