ആറ്റിങ്ങലിൽ പാഞ്ഞെത്തിയ ബസ് ഭിന്നശേഷിക്കാരനെ റോഡിൽ ഇടിച്ചുതെറിപ്പിച്ചു; ദാരുണാന്ത്യം; അപകടം സ്കൂട്ടറിനെ ഓവർടേക്ക് ചെയ്യാൻ ശ്രമിക്കുന്നതിനിടെ; ഡ്രൈവറുടെ അശ്രദ്ധയെന്ന് നാട്ടുകാർ

തിരുവനന്തപുരം: പാഞ്ഞെത്തിയ സ്വകാര്യ ബസ് ഇടിച്ച് ഭിന്നശേഷിക്കാരന് ദാരുണാന്ത്യം. ആറ്റിങ്ങലിലാണ് ദാരുണ സംഭവം നടന്നത്. കടമ്പാട്ടുകോണം സ്വദേശിയായ കുട്ടപ്പൻ എന്ന വിപിൻ ലാൽ (28) ആണ് മരിച്ചത്.

കച്ചേരി ജങ്ഷന് സമീപം ഇന്നലെ രാത്രിയായിരുന്നു അപകടം നടന്നത്. കിളിമാനൂർ ഭാഗത്തേക്ക് പോവുകയായിരുന്ന ബസ് കച്ചേരി ജംങ്ഷനിൽ അതേ ദിശയിൽ സഞ്ചരിക്കുകയായിരുന്ന വിപിൻ ലാലിന്‍റെ സ്കൂട്ടറിനെ മറികടക്കുന്നതിനിടെ ഇടിക്കുകയായിരുന്നു.

ബസിന്‍റെ അമിത വേഗമാണ് അപകടകാരണമെന്നും നാട്ടുകാർ പറയുന്നു. ഇടിയുടെ ആഘാതത്തിൽ റോഡിലേക്ക് തെറിച്ചു വീണു ഗുരുതരമായി പരുക്കേറ്റ വിപിൻ ലാലിനെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. ബസും ജീവനക്കാരെയും പോലീസ് കസ്റ്റഡിയിലെടുത്തു. സ്ഥലത്ത് പോലീസെത്തി മേൽനടപടികൾ സ്വീകരിച്ചു.