തമിഴ്‌നാട്ടിലെ മുൻ മന്ത്രി സഞ്ചരിച്ച കാർ മറ്റൊരു കാറുമായി കൂട്ടിയിടിച്ചു; ആർക്കും പരിക്കില്ല; സംഭവം പാലക്കാട്

പാലക്കാട്: തമിഴ്‌നാട് മുൻ മന്ത്രി ശെന്തിൽകുമാർ സഞ്ചരിച്ചിരുന്ന കാർ പാലക്കാട് അപകടത്തിൽപെട്ടു. പട്ടാമ്പി കൊപ്പത്ത് വെച്ച് മറ്റൊരു കാറുമായി കൂട്ടി ഇടിക്കുകയായിരുന്നു. ഇന്ന് രാവിലെ കൊപ്പം സെന്ററിലാണ് അപകടം സംഭവിച്ചത്. വളാഞ്ചേരി ഭാഗത്ത് നിന്നും വരികയായിരുന്നു മുൻ മന്ത്രിയുടെ കാറും, പെരിന്തൽമണ്ണ ഭാഗത്ത് നിന്ന് വരികയായിരുന്ന മറ്റൊരു കാറും കൂട്ടിയടിക്കുകയായിരുന്നു.

മന്ത്രി സഞ്ചരിച്ചിരുന്ന കാറിന്റെ മുൻ വശം പൂർണ്ണമായും തകർന്ന നിലയിലാണ്. അപകടത്തിൽപെട്ട രണ്ടാമത്തെ വാഹനത്തിനും കാര്യമായ തകരാർ സംഭവിച്ചു. ഇരുവാഹനങ്ങളിലും യാത്രക്കാർ ഉണ്ടായിരുന്നുവെങ്കിലും ആർക്കും കാര്യമായ പരിക്ക് പറ്റിയിട്ടില്ല.സ്ഥലത്ത് പോലീസെത്തി മേൽനടപടികൾ സ്വീകരിച്ചു.