ഒളിച്ചുതാമസിച്ച മോഷ്ടാക്കളെ റെയില്‍വേ പോലീസ് കണ്ടെത്തി; പിടികൂടിയത് സ്‌പെഷ്യല്‍ ബ്രാഞ്ച് പോലീസ് ഉദ്യോഗസ്ഥന്റെ സഹായത്തോടെ
ഒളിച്ചുതാമസിച്ച മോഷ്ടാക്കളെ റെയില്‍വേ പോലീസ് കണ്ടെത്തി
പത്തനംതിട്ട :ആറന്മുള ഇടയാറന്മുളയിലെ ഒരു വീട്ടില്‍ ജൂലൈ 22 മുതല്‍ വാടകയ്ക്ക് താമസിച്ചു വന്ന മോഷ്ടാക്കളായ രണ്ടു യുവാക്കളെ എറണാകുളം സൗത്ത് റയില്‍വേ പോലീസ് കസ്റ്റഡിയിലെടുത്തു. ജില്ലാ പോലീസ് പോലീസ് രഹസ്യാന്വേഷണവിഭാഗം ഉദ്യോഗസ്ഥന്റെ സഹായത്തോടെയാണ് പ്രതികളെ കണ്ടെത്തി പിടികൂടിയത്.
കോതമംഗലം നെല്ലിക്കുഴി തംഗലാം പി ഒയില്‍ കാട്ടുകുടി വീട്ടില്‍ ഫൈസല്‍ അലി(36), ഇടുക്കി കാരിക്കോട് തൊടുപുഴ ഈസ്റ്റ് പാമ്പുതൂക്കിമാക്കല്‍ വീട്ടില്‍ പാമ്പു കൊത്തി എന്ന് വിളിക്കുന്ന നിസ്സാര്‍ സിദ്ദീഖ് (42) എന്നിവരെയാണ് ആറന്മുള സ്‌പെഷ്യല്‍ ബ്രാഞ്ച് പോലീസ് ഉദ്യോഗസ്ഥന്‍ ടി തിലകന്‍ നല്‍കിയ വിവരങ്ങളുടെ അടിസ്ഥാനത്തില്‍ ഇന്നലെ രാവിലെ അറസ്റ്റ് ചെയ്തത്. രാവിലെ 8.45 ന് കോഴിപ്പാലത്ത് എത്തിയ അന്വേഷണസംഘം പ്രതികളെ പറ്റിയുള്ള വിവരം കൈമാറി.
ഇലക്ട്രോണിക് ഉല്‍പ്പന്നങ്ങള്‍ മാത്രം മോഷ്ടിക്കുന്നതില്‍ കമ്പമുള്ളയാളാണ് ഫൈസല്‍ അലി. ഇയാള്‍ എറണാകുളം, കോട്ടയം റയില്‍വേ സ്റ്റേഷനുകളില്‍ നിന്നും രണ്ട് ലാപ്‌ടോപ്പുകള്‍, ഒരു ടാബ്, 6 മൊബൈല്‍ ഫോണുകള്‍, സിം കാര്‍ഡുകള്‍, 2 പവര്‍ ബാങ്ക്, 2 റെയില്‍വേ ബെഡ് ഷീറ്റ് എന്നിവ മോഷ്ടിച്ചു കടന്ന ഇയാള്‍ നിസാറിനൊപ്പം ഇവിടെ ഒളിവില്‍ താമസിക്കുകയായിരുന്നു. നിസാര്‍ വീടുകളുടെയും മറ്റും വാതില്‍ തകര്‍ത്ത് ഉള്ളില്‍ കടന്ന് മോഷണം നടത്തുന്നയാളുമാണ് . പ്രതികള്‍ ഇവിടെയുണ്ടെന്ന് രഹസ്യ വിവരം ലഭിച്ചതിന്റെ അടിസ്ഥാനത്തില്‍ റെയില്‍വേ പോലീസ് അധികൃതര്‍ ജില്ലാ പോലീസ് മേധാവിയെ വിവരം ധരിപ്പിച്ചു, തുടര്‍ന്നാണ് അന്വേഷണസംഘം ആറന്മുളയിലെത്തിയത്.
ജില്ലാ പോലീസ് മേധാവി അറിയിച്ചതനുസരിച്ച്, ജില്ലാ സ്‌പെഷ്യല്‍ ബ്രാഞ്ച് ഡി വൈ എസ് പി ആര്‍ ശ്രീകുമാറിന്റെ നിര്‍ദേശപ്രകാരം രഹസ്യാന്വേഷണ വിഭാഗം പോലീസ് വിവരങ്ങള്‍ തേടുകയും പ്രതികളെ കണ്ടെത്തുകയുമായിരുന്നു. പ്രതികള്‍ ഒളിച്ചുകഴിയുന്ന സ്ഥലത്തിനടുത്ത് താമസിക്കുന്ന പത്തനംതിട്ട പോലീസ് സ്റ്റേഷനിലെ സിപിഓ വിഷ്ണു കെ രാജേന്ദ്രനെ ബന്ധപ്പെട്ട് തിലകന്‍ കാര്യങ്ങള്‍ അന്വേഷിച്ചു. ഇരുവരും ചേര്‍ന്ന് നടത്തിയ രഹസ്യനീക്കത്തില്‍ മോഷ്ടാക്കളെ വീട്ടില്‍ കണ്ടെത്തിയശേഷം സംഘത്തെ വീടിന്റെ ലൊക്കേഷന്‍ സംബന്ധിച്ച വിവരം കൈമാറി. തുടര്‍ന്ന് അവരെത്തി കസ്റ്റഡിയിലെടുത്തു. നിസ്സാര്‍ മൂവാറ്റുപുഴ ബസ്സ് സ്റ്റാന്റില്‍ നിന്നും മോഷ്ടിച്ച ഡിയോ സ്‌കൂട്ടറും വീട്ടില്‍ നിന്നും പോലീസ് സംഘം കണ്ടെടുത്തു.