ഓട്ടോറിക്ഷയുമായി വീട്ടിൽ നിന്നിറങ്ങി ഡ്രൈവറെ കാണാനില്ല; തെരച്ചിലിൽ കായലില്‍ മൃതദേഹം; സംഭവം തിരുവനന്തപുരത്ത്
By : സ്വന്തം ലേഖകൻ
Update: 2025-02-09 16:26 GMT
തിരുവനന്തപുരം: ഓട്ടോറിക്ഷ ഡ്രൈവറെ വെള്ളായണി കായലില്‍ മുങ്ങി മരിച്ച നിലയില്‍ കണ്ടെത്തിയ സംഭവത്തിൽ ദുരൂഹത. കല്ലിയൂര്‍ ഐരാല്‍ രാധാലയത്തില്‍ ദിലീപ് കുമാര്‍ (54) ആണ് മരിച്ചത്. രാവിലെ ഒന്‍പത് മണിയോടുകൂടി കായലിന്റെ കാക്കമൂല കുളങ്ങര ക്ഷേത്രത്തിനു സമീപത്തെ കടവിലാണ് ചെളിയില്‍ പുതഞ്ഞ നിലയില്‍ മൃതദേഹം കണ്ടെത്തിയത്.
രാവിലെ ഓട്ടോയുമായി വീട്ടിൽ നിന്നിറങ്ങിയ ദിലീപ്കുമാറിനെ കാണാതായതോടെ തെരച്ചിൽ നടത്തുകയായിരുന്നു. തുടർന്ന് കുളങ്ങര ഭാഗത്ത് ഓട്ടോ കണ്ടെത്തി. വിവരം അറിയിച്ചതിനെ തുടർന്ന് വിഴിഞ്ഞത്ത് നിന്നെത്തിയ അഗ്നിരക്ഷാസേന കായലിലിറങ്ങി മൃതദേഹം പുറത്തെടുക്കുകയും ചെയ്തു. സംഭവത്തിൽ നേമം പൊലീസ് കേസെടുത്ത് തുടർ നടപടികൾ സ്വീകരിച്ചു. ഭാര്യ പ്രിയ, മക്കള്‍ ദീപക്ക്, ദീപ്തി.