വ്യാജനാണ് പെട്ടുപോകല്ലേ! ഇ ചെല്ലാന്‍ തട്ടിപ്പ് മലയാളത്തിലും; ക്ലിക്ക് ചെയ്യരുത്; തട്ടിപ്പില്‍ ഇരയായത് നിരവധി പേര്‍: വ്യാജനെ തിരിച്ചറിയാന്‍ വഴി പറഞ്ഞുകൊടുത്ത് മോട്ടോര്‍ വാഹന വകുപ്പ്
കൊച്ചി: ട്രാഫിക് നിയമലംഘനം നടത്തി fine അടയ്ക്കണമെന്ന് കാണിച്ച് വ്യാജ സന്ദേശങ്ങള്‍ വാട്സ്ആപ്പിലൂടെ പ്രചരിപ്പിച്ച് നടത്തുന്ന തട്ടിപ്പില്‍ നിരവധിപ്പേര്‍ കുടുങ്ങിയ പശ്ചാത്തലത്തില്‍ മോട്ടോര്‍ വാഹനവകുപ്പ് മുന്നറിയിപ്പുമായി രംഗത്ത്.
'Traffic Violation Notice' എന്ന പേരില്‍ മലയാളത്തില്‍ വരുന്ന സന്ദേശത്തോടൊപ്പം 'mParivahan' എന്ന പേരിലുള്ള APK ഫയല്‍ അറ്റാച്ച് ചെയ്യുന്നതായി പരാതികള്‍ ഉയരുന്നതായാണ് മോട്ടോര്‍ വാഹനവകുപ്പ് അറിയിച്ചത്. ആദ്യം ഇംഗ്ലീഷിലായിരുന്നു ഇത്തരം തട്ടിപ്പുകള്‍, എന്നാല്‍ ഇപ്പോള്‍ മലയാളത്തിലും പ്രചരണം തുടങ്ങിയിരിക്കുകയാണ്.
വ്യാജമായ ഈ ഫയല്‍ ഫോണ്‍ ഓപ്പണ്‍ ചെയ്താല്‍ ഉപഭോക്താക്കളുടെ വ്യക്തിഗത വിവരങ്ങള്‍, ബാങ്ക് അക്കൗണ്ട് വിവരങ്ങള്‍, പാസ്വേഡുകള്‍ തുടങ്ങിയവ ഹാക്ക് ചെയ്യപ്പെടാനുള്ള സാധ്യതയുണ്ടെന്ന് വകുപ്പിന്റെ മുന്നറിയിപ്പില്‍ വ്യക്തമാക്കി.
'ഇത്തരം സന്ദേശങ്ങള്‍ ലഭിച്ചാല്‍ അവ(ignore) ചെയ്യുകയും, സന്ദേശത്തിലുള്ള APK ഫയല്‍ ഒരിക്കലും ഇന്‍സ്റ്റാള്‍ ചെയ്യരുതെന്നും,' മോട്ടോര്‍ വാഹനവകുപ്പ് ഫെയ്സ്ബുക്ക് കുറിപ്പില്‍ മുന്നറിയിപ്പ് നല്‍കി.
കുറിപ്പ്:
വ്യാജനാണ് പെട്ടു പോകല്ലെ.
Traffic violation notice എന്ന പേരിൽ പലരുടെയും വാട്സ് ആപ്പ് നമ്പരിലേക്ക് മലയാളത്തിൽ താഴെ പറയുന്ന ഒരു മെസേജും mParivahan എന്ന ഒരു APK ഫയലും വരുന്നതായി പരാതി ഉയരുന്നുണ്ട്.
നേരത്തെ ഇത്തരം വ്യാജസന്ദേശങ്ങളും കെണികളും ഇംഗ്ലീഷിലായിരുന്നു. കഴിഞ്ഞ ദിവസങ്ങളിലാണ് മലയാളത്തിലും വന്ന് തുടങ്ങിയിട്ടുള്ളത്.
ഇത് വ്യാജനാണ്. നിങ്ങൾ ആ ഫയൽ ഓപ്പൺ ചെയ്താൽ നിങ്ങളുടെ ഫോണിലുളള പ്രധാനപ്പെട്ട വിവരങ്ങൾ, ബാങ്ക് Details,പാസ് വേർഡുകൾ തുടങ്ങിയവ ഹാക്കർമാർ കൈക്കലാക്കാൻ സാധ്യത ഉണ്ട്. ആയതിനാൽ ഒരു കാരണവശാലും APK ഫയൽ ഓപ്പൺ ചെയ്യരുത്.
മോട്ടോർ വാഹന വകുപ്പോ, പോലിസോ സാധാരണയായി വാട്ട്സ് അപ്പ് നമ്പറിലേക്ക് നിലവിൽ ചലാൻ വിവരങ്ങൾ അയക്കാറില്ല. അത്തരം വിവരങ്ങൾ നിങ്ങളുടെ ആർ സി യിൽ നിലവിലുള്ള മൊബൈൽ നമ്പറിലേക്ക് ടെക്സ്റ്റ് മെസേജ് ആയാണ് ഇ ചലാൻ സൈറ്റ് വഴി അയക്കാറുള്ളത്.
ഏതെങ്കിലും സാഹചര്യത്തിൽ ഇത്തരം മെസേജുകൾ വന്നാൽ https://echallan.parivahan.gov.in എന്ന സൈറ്റിൽ കയറി Check Pending transaction എന്ന മെനുവിൽ നിങ്ങളുടെ വാഹന നമ്പറോ,ചലാൻ നമ്പറോ നൽകിയാൽ നിങ്ങളുടെ വാഹനത്തിന് ഏതെങ്കിലും ചലാൻ പെൻ്റിങ്ങ് ഉണ്ടോ എന്ന് അറിയാവുന്നതാണ്. ഏതെങ്കിലും തരത്തിൽ പണം നഷ്ടപ്പെട്ടാൽ ഉടനടി 1930 എന്ന നമ്പറിലേക്ക് ബന്ധപ്പെടുക.