കാട്ടുപന്നി ബൈക്കിന് കുറുകെ ചാടി; യുവാവിന് പരിക്ക്; അപകടം ഹോട്ടൽ ജോലി കഴിഞ്ഞ് മടങ്ങവേ

പാലക്കാട്: കാട്ടുപന്നി കുറുകെ ചാടി ബൈക്ക് യാത്രികനായ യുവാവിന് പരിക്ക്. കരിമ്പ കാഞ്ഞിരംപാറ സ്വദേശി ബവിൻ കെ.ആർ (36) ആണ് അപകടത്തിൽപ്പെട്ടത്. തിങ്കളാഴ്ച്ച രാത്രിയിൽ വാക്കോട് ഭാഗത്ത് വെച്ചാണ് അപകടം നടന്നത്.

കല്ലടിക്കോട് ഹോട്ടൽ ജീവനക്കാരനായ ബവിൻ ജോലികഴിഞ്ഞ് വീട്ടിലേയ്ക്ക് മടങ്ങുമ്പോൾ കാട്ടുപന്നി ബൈക്കിന് കുറുകെ ചാടുകയായിരുന്നു.

തലയ്ക്കും കൈകാലുകൾക്കും ഗുരുതരമായി പരിക്കേറ്റ ബവിനെ ഉടനെ തന്നെ ആശുപത്രിലേക്ക് മാറ്റി. ബവിൻ തീവ്രപരിചരണ വിഭാഗത്തിൽ ചികിത്സയിൽ ഇപ്പോൾ തുടരുകയാണ്.