ആഗോള അയ്യപ്പ സംഗമം നടത്താം; ഹര്‍ജികള്‍ തള്ളിയതോടെ ദേവസ്വം ബോര്‍ഡിന് സംഗമവുമായി മുന്നോട്ടുപോകാമെന്ന് ഹൈക്കോടതി; പമ്പയുടെ വിശുദ്ധി കാത്തുസൂക്ഷിക്കണമെന്ന് കര്‍ശന നിര്‍ദ്ദേശം; സ്ഥിരം നിര്‍മ്മാണ പ്രവര്‍ത്തനങ്ങള്‍ പാടില്ലെന്നും കോടതി
ആഗോള അയ്യപ്പ സംഗമം നടത്താം
കൊച്ചി: തിരുവിതാംകൂര്‍ ദേവസ്വം ബോര്‍ഡ് സംഘടിപ്പിക്കുന്ന ആഗോള അയ്യപ്പ സംഗമത്തിനെതിരെയുള്ള ഹര്‍ജികള്‍ ഹൈക്കോടതി തള്ളി. സംഗമവുമായി ദേവസ്വം ബോര്‍ഡിന് മുന്നോട്ട് പോകാമെന്ന് ഹൈക്കോടതി വ്യക്തമാക്കി. പമ്പയിലാണ് ആഗോള അയ്യപ്പ സംഗമം സംഘടിപ്പിക്കുന്നത്.
സര്‍ക്കാരും ദേവസ്വം ബോര്‍ഡും നല്‍കിയ വിശദീകരണങ്ങളെ തുടര്‍ന്നാണ് ഹര്‍ജികള്‍ തള്ളിയത്. അയ്യപ്പ സംഗമത്തില്‍ ഇടപെടുന്നില്ലെന്ന് ഹൈക്കോടതി പറഞ്ഞു. പരിപാടി നടത്താന്‍ ബോര്‍ഡിന് അനുമതി നല്‍കിയ കോടതി, പമ്പ നദിയുടെ വിശുദ്ധി കാത്തുസൂക്ഷിക്കണമെന്നും കര്‍ശന നിര്‍ദേശം നല്‍കി. സ്ഥിരമായ നിര്‍മ്മാണ പ്രവര്‍ത്തനങ്ങള്‍ പമ്പയില്‍ പാടില്ലെന്നും, കണക്കുകള്‍ കൃത്യമായി രേഖപ്പെടുത്തി 45 ദിവസത്തിനുള്ളില്‍ ശബരിമല സ്‌പെഷ്യല്‍ കമ്മീഷണര്‍ക്ക് സമര്‍പ്പിക്കണമെന്നും കോടതി ഇടക്കാല ഉത്തരവിലൂടെ വ്യക്തമാക്കി.
ഭക്തിയുടെയും വിനോദസഞ്ചാരത്തിന്റെയും മറവില്‍ രാഷ്ട്രീയ-വാണിജ്യ ലക്ഷ്യങ്ങളോടെയാണ് ആഗോള അയ്യപ്പ സംഗമം നടത്തുന്നതെന്നാരോപിച്ച് നിരവധി ഹര്‍ജികള്‍ ഹൈക്കോടതിയുടെ മുന്നിലെത്തിയിരുന്നു. ഇതിന്റെ പശ്ചാത്തലത്തില്‍, പരിപാടിയുടെ സ്വഭാവം, ലക്ഷ്യങ്ങള്‍, സംസ്ഥാന സര്‍ക്കാരിന്റെ പങ്കാളിത്തം, ധനസമാഹരണം, പങ്കെടുക്കുന്നവരെ തിരഞ്ഞെടുക്കുന്നതിനുള്ള മാനദണ്ഡം എന്നിവയെക്കുറിച്ച് സര്‍ക്കാര്‍, ദേവസ്വം ബോര്‍ഡ് എന്നിവരോട് കോടതി വിശദീകരണം തേടിയിരുന്നു. ഇവരുടെ മറുപടി ലഭിച്ച ശേഷമാണ് കോടതി സംഗമത്തില്‍ ഇടപെടുന്നില്ലെന്ന് അറിയിച്ചത്.