ന്യൂനപക്ഷങ്ങളെ ബിജെപി സര്‍ക്കാര്‍ അടിച്ചമര്‍ത്തുന്നു; കുരിശിന്റെ വഴിക്ക് അനുമതി നിഷേധിക്കാന്‍ പറഞ്ഞ കാര്യങ്ങള്‍ വിശ്വസനീയമല്ലെന്ന് എം എ ബേബി
ന്യൂനപക്ഷങ്ങളെ ബിജെപി സര്‍ക്കാര്‍ അടിച്ചമര്‍ത്തുന്നു;
ന്യൂഡല്‍ഹി: ന്യൂനപക്ഷങ്ങളെ ബിജെപി സര്‍ക്കാര്‍ അടിച്ചമര്‍ത്തുകയാണെന്ന് സിപിഎം ജനറല്‍ സെക്രട്ടറി എം.എ. ബേബി. ഡല്‍ഹിയില്‍ കുരുത്തോല പ്രദക്ഷിണത്തിന് അനുമതി നിഷേധിച്ചത് പൊലീസിന്റെ ന്യൂനപക്ഷ വിരുദ്ധമായ നടപടിയാണെന്ന് എം.എ. ബേബി പറഞ്ഞു.
രാജ്യത്ത് പലയിടത്തും ന്യൂനപക്ഷങ്ങള്‍ വേട്ടയാടപ്പെടുന്നു. കുരുത്തോല പ്രദക്ഷിണത്തിന് അനുമതി നിഷേധിക്കാന്‍ പറഞ്ഞ കാര്യങ്ങള്‍ വിശ്വസനീയമല്ല. ഹോളി ആഘോഷ സമയത്ത് ന്യൂനപക്ഷ ആരാധനാലയങ്ങള്‍ ഷീറ്റുകൊണ്ട് മറച്ചു. ഭരണഘടന ഉറപ്പുനല്‍കുന്ന അവകാശങ്ങളുടെ ലംഘനമാണിതെന്ന് എം.എ. ബേബി വ്യക്തമാക്കി.
സുരക്ഷാകരണങ്ങള്‍ ചൂണ്ടിക്കാട്ടിയാണ് ഡല്‍ഹി സേക്രഡ് ഹാര്‍ട്‌സ് ദേവാലയത്തില്‍ കുരിശിന്റെ വഴിക്ക് ഡല്‍ഹി പൊലീസ് അനുമതി നിഷേധിച്ചത്. തുടര്‍ന്ന് പള്ളി ഗ്രൗണ്ടിലാണ് കുരിശിന്റെ വഴി ചടങ്ങ് നടത്തിയത്. സെന്റ്‌മേരീസ് പള്ളിയില്‍ നിന്ന് സേക്രഡ് ഹാര്‍ട്ട് പള്ളിയിലേക്ക് പ്രദക്ഷിണം നടത്താനായിരുന്നു തീരുമാനം. സംഭവത്തില്‍ ഡല്‍ഹി പൊലീസ് ഇതുവരെ ഔദ്യോഗിക വിശദീകരണം നല്‍കിയിട്ടില്ല.