കുന്നിൽ ശക്തമായ മണ്ണിടിച്ചിൽ; പൊടുന്നനെ ഉഗ്ര ശബ്ദം; പരിഭ്രാന്തിയിൽ നാട്ടുകാർ; കെട്ടിടത്തിന് മുകളിലേക്ക് അട‍ർന്നു വീണത് കൂറ്റന്‍ പാറക്കല്ല്; ഒഴിവായത് വൻ അപകടം

കോഴിക്കോട്: ഉള്ള്യേരി മുണ്ടോത്ത് കുറ്റിയില്‍ കുന്നിലുണ്ടായ ശക്തമായ മണ്ണിടിച്ചിലില്‍ കൂറ്റന്‍ പാറക്കല്ല് കെട്ടിടത്തിന് മുകളിലേക്ക് അടര്‍ന്നുവീണു. മറ്റൊരു പാറക്കല്ല് കൂടി താഴേക്ക് പതിക്കുന്ന തരത്തില്‍ നിലനില്‍ക്കുന്നതിനാല്‍ പ്രദേശം അപകട ഭീഷണിയിലാണ്. മൂടാടി സ്വദേശി ഹുസൈന്‍ എന്നയാളുടെ കെട്ടിടത്തിന് മുകളിലേക്കാണ് പാറക്കല്ല് പതിച്ചത്.

സമീപത്തെ തെങ്ങ് കടപുഴകുകയും കെട്ടിടത്തിന് മുകളില്‍ പതിക്കുകയും ചെയ്തു. ഈ കെട്ടിടം കൂടാതെ നിരവധി വീടുകള്‍ ഇവിടെയുണ്ട്. ഒരു പാറക്കല്ല് കൂടി മുകളില്‍ ഉള്ളതിനാല്‍ മഴ കനക്കുന്ന സാഹചര്യത്തില്‍ അപകടം ആവര്‍ത്തിക്കുമെന്ന ഭീതിയിലാണ് പ്രദേശവാസികൾ.