അസതോ മാ സദ്ഗമയാ എന്ന മന്ത്രത്തില് തുടങ്ങി ലോകാ സമസ്താ സുഖിനോ ഭവന്തു എന്ന പ്രാര്ത്ഥനയോടെ അവസാനിച്ച ചരിത്ര പ്രസംഗം; മാതാ അമൃതാനന്ദമയി യുഎന്നില് പ്രഭാഷണം നടത്തിയിട്ട് കാല് നൂറ്റാണ്ട്
കൊല്ലം: കാരുണ്യത്തിന്റെയും സേവനത്തിന്റെയും വിശ്വശാന്തിയുടെയും ശബ്ദം ഐക്യ രാഷ്ട്രസഭയുടെ ജനറല് അസംബ്ലി ഹാളില് മലയാളത്തില് മുഴങ്ങിക്കേട്ട ദിനത്തിന് ഇന്നേക്ക് 25 വര്ഷം. 2000 ആഗസ്റ്റ് 29 ന് നടന്ന സഹസ്രാബ്ദ ലോക സമാധാനാധ്യാത്മിക ഉച്ചകോടിയിലാണ് മാതാ അമൃതാനന്ദമയി മലയാളത്തില് സംസാരിച്ചത്.
മതങ്ങള് തമ്മിലുള്ള സൗഹാര്ദ്ദത്തിന്റേയും ജനങ്ങള് തമ്മിലുള്ള സഹവര്ത്തിത്വത്തിന്റേയും ശാന്തിമന്ത്രമാണ് അന്ന് ജനത കേട്ടത്. ലോകത്തിലെ പ്രസിദ്ധരായ വാഗ്മികളെല്ലാം അണിനിരന്ന വേദിയില് മാതാ അമൃതാനന്ദമയി സംസാരിച്ചപ്പോള് അമ്മയുടെ ജീവിതത്തിന്റെ സന്ദേശമാണ് അവിടെ മുഴങ്ങിക്കേട്ടത്. ദാരിദ്ര്യ നിര്മ്മാര്ജ്ജനത്തിന്റെ ആവശ്യകതയും പ്രകൃതിയുടെ പരിരക്ഷയും മതങ്ങളുടെ സമത്വവും വിഷയമാക്കി മാതാ അമൃതാനന്ദമയി നടത്തിയ പ്രഭാഷണത്തിന്റെ കാതല് പ്രമേയമായി സമ്മേളനം അംഗീകരിക്കുകയും ചെയ്തു.
അസതോ മാ സദ്ഗമയാ എന്ന മന്ത്രത്തില് തുടങ്ങി ലോകത്തിന് മുഴുവന് സുഖം പകരട്ടെ എന്നര്ത്ഥം വരുന്ന ലോകാ സമസ്താ സുഖിനോ ഭവന്തു എന്ന പ്രാര്ത്ഥനയോടെയാണ് തന്റെ പ്രഭാഷണം അവസാനിപ്പിച്ചത്. ഭാരതീയ സംസ്കാരത്തിന്റെ സനാതനസ്വരമാണ് അന്ന് ലോകത്തിനു മുമ്പില് മുഴങ്ങിയത്. ഇന്നിപ്പോള് ആ ശുഭ ദിനത്തിന്റെ രജത ജൂബിലി ആഘോഷിക്കുമ്പോഴും അത് ചരിത്രമായി തുരുന്നു. മാതാ അമൃതാനന്ദമയിയല്ലാതെ ഐക്യ രാഷ്ട്ര സഭയില് അന്നും ഇന്നും ആരും മലയാളത്തില് സംസാരിച്ചിട്ടില്ല എന്ന വലിയ വസ്തുത.
ഈ പ്രഭാഷണം വലിയ വാര്ത്തയായിരുന്നു അന്ന്. മത്സര പരീക്ഷകളിലും ക്വിസ് മത്സരങ്ങളിലുമെല്ലാം ചോദ്യമായി വന്ന ഈ പ്രഭാഷണം കേരളക്കര ഏറെ അഭിമാനത്തോടെയാണ് അന്നും ഇന്നും ഓര്ക്കുന്നത്.