ഗുരുവിന്റെ അഷ്ട ലക്ഷ്യങ്ങള്‍ പ്രചരിപ്പിക്കും; ഗുരുദേവ സര്‍വ്വീസ് സൊസൈറ്റിയുടെ ലോഗോ പ്രകാശനം അരുവിപ്പുറത്ത്
തിരുവനന്തപുരം: ഗുരുദേവ സര്‍വ്വീസ് സൊസൈറ്റിയുടെ ലോഗോ പ്രകാശനം അരുവിപ്പുറം മഠാധിപതി ബ്രഹ്‌മശ്രീ സാന്ദ്രാനന്ദ സ്വാമികള്‍ നിര്‍വ്വഹിച്ചു. സംസ്ഥാന പ്രസിഡന്റ് ആര്‍.സി. രാജീവ് ലോഗോ ഏറ്റുവാങ്ങി. ചടങ്ങില്‍ സംസ്ഥാന ജനറല്‍ സെക്രട്ടറി ആര്‍.എസ് സമ്പത്ത്, സംസ്ഥാന ട്രഷറര്‍ കെ സതീഷ്‌കുമാര്‍, സംസ്ഥാന വൈസ് പ്രസിഡന്റുമാരായ മാന്നാനം സുരേഷ്, പ്രദീപ് എക്കിത്തറ, പി സുധീര്‍, സംസ്ഥാന സെക്രട്ടറിമാരായ ശ്രീജ ഒ. വി, ആര്‍. റീജ തുടങ്ങിയവര്‍ സന്നിഹിതരായിരുന്നു. സംഘടനയുടെ മുഖ്യരക്ഷാധികാരിമാര്‍ ഡോ രാജീവ് മേനോനും, ഡോക്ടര്‍ കെ കെ മനോജനുമാണ്.
23.04.2025 രാവിലെ 7.30ന് ഭഗവാന്‍ ശ്രീ നാരായണ ഗുരുദേവന്‍ ശിവപ്രതിഷ്ഠ നടത്തിയ അരു വിപ്പുറത്തുനിന്നുമാണ് തുടക്കം കുറിക്കുവാന്‍ സംഘടനയ്ക്ക് കഴിഞ്ഞിട്ടു ള്ളത്. സാധാരണ ജനങ്ങള്‍ക്ക് ഗുരുവിനെ കുറിച്ച് കുടുതല്‍ അറിയുന്ന തിനും ഗുരുദേവ പഠനം, ഗുരുദര്‍ശനം തുടങ്ങിയ കാര്യങ്ങള്‍ എല്ലായിടത്തും എത്തിക്കുക എന്നതാണ് സംഘടന ലക്ഷ്യമിടുന്നത്. മറ്റേതെങ്കിലും സംഘടനകളുമായി മത്സരത്തിനുള്ളതല്ല ഗുരുദേവ സര്‍വ്വീസ് സൊസൈറ്റിയെന്ന് ഭാരവാഹികള്‍ പറഞ്ഞു. ഇതോടൊപ്പം തന്നെ കേന്ദ്ര-സംസ്ഥാന സര്‍ക്കാരുകളുടെ പദ്ധതികള്‍ അര്‍ഹതപ്പെട്ട ആളുകളിലേയ്ക്ക് എത്തിക്കുവാനും ആളുകളെ അവ ബോധ്യപ്പെടുത്തുവാനും വേണ്ടിയുള്ള സെമിനാറുകള്‍ സംഘടിപ്പിക്കുക, പദ്ധതികള്‍ നേടിയെടുക്കാന്‍ അവരെ പ്രാപ്തരാക്കുക, ഡീ-അഡിക്ഷന്‍ ക്യാമ്പുകള്‍ സംഘടിപ്പിക്കുക, മദ്യത്തിനും മയക്കുമരുന്നിനും എതിരായുള്ള പോരാട്ടം ശക്തമാക്കുക എന്നീ ലക്ഷ്യത്തോടെയുള്ള പ്രവര്‍ത്തനമാണ് സജ്ജമാക്കുന്നത്.
കേരളത്തിലാകമാനമുള്ള ആള്‍ക്കാരെ കോര്‍ത്തിണക്കിക്കൊണ്ടുള്ള പ്രവര്‍ത്തനമാണ് ഉദ്ദേശിക്കുന്നത്. ഗുരു അരുളി ചെയ്ത ഗുരുവിന്റെ അഷ്ട ലക്ഷ്യങ്ങള്‍ കൂടുതല്‍ ജനങ്ങളിലെത്തിക്കുവാനും അതിന്റെ ഭാഗമായി ജീവിതവിജയം ജനങ്ങള്‍ കൈവരിക്കുന്നതിനുള്ള പദ്ധതികളാണ് ഇതിലൂടെ ലക്ഷ്യം വയ്ക്കുന്നത്.