ആറന്മുള വള്ള സദ്യ ഓണ്‍ലൈനില്‍ ബുക്ക ചെയ്യാം; ദേവസ്വം ബോര്‍ഡിന്റെ തീരുമാനത്തിനെതിരെ എതിര്‍പ്പുമായി പള്ളിയോട സേവാസംഘം
ആറന്മുള വള്ള സദ്യ ഓണ്‍ലൈനില്‍ ബുക്ക ചെയ്യാം; എതിര്‍പ്പുമായി പള്ളിയോട സേവാസംഘം
പത്തനംതിട്ട: ഓണ്‍ലൈന്‍ ബുക്കിങ്ങിലൂടെ ആറന്മുള വള്ളസദ്യ നടത്താനുള്ള തിരുവിതാംകൂര്‍ ദേവസ്വം ബോര്‍ഡിന്റെ തീരുമാനത്തിനെതിരെ പള്ളിയോടസേവാസംഘം രംഗത്ത്. ഇത് ആചാരലംഘനമാണെന്ന് കാണിച്ച് സംഘം ദേവസ്വംബോര്‍ഡിന് പള്ളിയോട സംഘം കത്ത് നല്‍കി. ഞായറാഴ്ചകളില്‍ ഓണ്‍ലൈന്‍ ബുക്കിങ്ങിലൂടെ ആറന്മുള വള്ളസദ്യ നടത്താനാണ് ബോര്‍ഡ് തീരുമാനം. എന്നാല്‍ പള്ളിയോട കരകളുടെ കൂട്ടായ്മയായ പള്ളിയോടസേവാ സംഘത്തിന്റെ നേതൃത്വത്തിലാണ് വഴിപാടായി വള്ളസദ്യ നടന്നുവരുന്നത്. ഇതിനിടെയാണ്, താല്‍പര്യമുള്ളവര്‍ക്ക് 250 രൂപ അടച്ച് ഞായറാഴ്ചകളില്‍ സദ്യ ബുക്ക് ചെയ്ത് കഴിക്കാമെന്ന ദേവസ്വം ബോര്‍ഡിന്റെ പുതിയ തീരുമാനം. തികച്ചും വാണിജ്യ താല്‍പര്യമാണ് ഇതിന് പിന്നിലെന്ന് പള്ളിയോട സേവാസംഘം പറയുന്നു.
ഈ മാസം 27 മുതല്‍ ഓണ്‍ലൈന്‍ ബുക്കിങിലൂടെ വള്ളസദ്യ നടത്തുമെന്ന് ബോര്‍ഡ് അറിയിച്ചിരുന്നു. ഇതിനെതിരെയാണ് പ്രതിഷേധം. വള്ളസദ്യയുടെ പവിത്രതയും ആചാര പ്രാധാന്യവും തകര്‍ക്കുന്ന തീരുമാനമാണ് ബോര്‍ഡിന്റെതെന്നാണ് ആരോപണം. പള്ളിയോട സേവാസംഘം നടത്തുന്നതുപോലെയല്ല ദേവസ്വം ബോര്‍ഡ് നടത്താന്‍ പോകുന്ന വള്ളസദ്യ. പള്ളിയോടങ്ങള്‍ പങ്കെടുക്കാത്ത സദ്യക്ക് പിന്നില്‍ വാണിജ്യ താല്‍പര്യമാണെന്നും ഇവര്‍ ആരോപിക്കുന്നു. അതേസമയം, വള്ളസദ്യ പിടിച്ചെടുക്കാനുള്ള ദേവസ്വം ബോര്‍ഡിന്റെ ശ്രമമാണ് ഇതിന് പിന്നിലെന്നാണ് പള്ളിയോട സേവാസംഘത്തിന്റെ വിലയിരുത്തല്‍. വെള്ളിയാഴ്ച വിഷയം ചര്‍ച്ച ചെയ്യാനായി പള്ളിയോടസേവാസംഘം പൊതുയോഗം വിളിച്ചിട്ടുണ്ട്.
എന്നാല്‍, ആദ്യം ആറന്മുള ക്ഷേത്രം സമിതിയുമായും പിന്നീട് കഴിഞ്ഞ ജൂണില്‍ പള്ളിയോട സേവാസംഘം പ്രസിഡന്റ് അടക്കമുള്ളവര്‍ പങ്കെടുത്ത യോഗത്തിലും ഇക്കാര്യം ചര്‍ച്ച ചെയ്തതായി ദേവസ്വം ബോര്‍ഡ് അധികൃതര്‍ പറയുന്നു. വള്ളസദ്യ ഏറ്റെടുക്കണമെന്ന നിര്‍ദേശം ഹൈകോടതി നല്‍കിയിട്ടുണ്ടെന്നും ബോര്‍ഡ് വ്യക്തമാക്കുന്നു.
ഏകദേശം നാലര കോടിയോളം രൂപയാണ് പള്ളിയോട സേവാസംഘത്തിന് വള്ളസദ്യയില്‍ നിന്ന് ലഭിക്കുന്നത്. സദ്യക്കുള്ള പണമടക്കം ചെലവഴിക്കുന്നതും സംഘമാണ്. ഈ പണത്തില്‍ നിന്നുതന്നെയാണ് 52 പള്ളിയോടങ്ങള്‍ക്കും ഗ്രാന്റ് അനുവദിക്കുന്നത്. ഉതൃട്ടാതി ജലമേള അടക്കം സംഘടിപ്പിക്കുന്നതും പള്ളിയോടസേവാ സംഘമാണ്.