സര്‍ക്കാറിനുണ്ടായ നാണക്കേടിന്റെ പ്രതികാരം; ഡോ. ഹാരിസിനെതിരായ നടപടി അപലപനീയമെന്നും സണ്ണി ജോസഫ് എം.എല്‍.എ
ഡോ. ഹാരിസിനെതിരായ നടപടി അപലപനീയമെന്നും സണ്ണി ജോസഫ് എം.എല്‍.എ
തിരുവനന്തപുരം: തിരുവനന്തപുരം മെഡിക്കല്‍ കോളജിലെ ദുരവസ്ഥ തുറന്നു പറഞ്ഞ ഡോ. ഹാരിസിനോട് സര്‍ക്കാര്‍ പ്രതികാരം ചെയ്യുകയാണെന്ന് കെ.പി.സി.സി പ്രസിഡന്റ് സണ്ണി ജോസഫ് എം.എല്‍.എ. ആരോഗ്യ മേഖലയിലെ കെടുകാര്യസ്ഥതയും കുറ്റകരമായ അനാസ്ഥയും ഹാരിസിലൂടെ കേരളീയ സമൂഹം തിരിച്ചറിഞ്ഞപ്പോള്‍ സംസ്ഥാന സര്‍ക്കാറിനുണ്ടായ നാണക്കേടിനെ തുടര്‍ന്നുള്ള പ്രതികാര നടപടിയാണ് അദ്ദേഹത്തിന് നല്‍കിയ കാരണം കാണിക്കല്‍ നോട്ടീസെന്നും അദ്ദേഹം കുറ്റപ്പെടുത്തി.
മുഖ്യമന്ത്രിയുടെ പ്രതികരണത്തില്‍ നിന്നത് അന്നേ മനസ്സിലാക്കിയതാണ്. ഹാരിസ് വെളിപ്പെടുത്തിയ യാഥാര്‍ഥ്യങ്ങള്‍ അംഗീകരിച്ച് അത് പരിഹരിക്കുന്നതിന് പകരം അദ്ദേഹത്തെ ഭീഷണിപ്പെടുത്തി വരുതിയില്‍ ആക്കാനാണ് ശ്രമിച്ചത്. അതില്‍ അവര്‍ പരാജയപ്പെട്ടതിനെ തുടര്‍ന്നാണ് ഇപ്പോള്‍ നടപടിയുമായി മുന്നോട്ടു പോകുന്നത്. അധികാര ദുര്‍വിനിയോഗമാണിത്. സത്യം പറയുന്നവരെ ഭീഷണിപ്പെടുത്തുകയും പ്രതികാര നടപടിയെടുക്കുകയും ചെയ്യുന്ന പിണറായി സര്‍ക്കാറിന്റെ നയങ്ങള്‍ അപലപനീയമാണെന്നും സണ്ണി ജോസഫ് പറഞ്ഞു.
അടിസ്ഥാനരഹിതമായ കുറ്റങ്ങള്‍ ചുമത്തി ഒരാഴ്ചയായി നിരപരാധികളായ കന്യാസ്ത്രീകളെ ബി.ജെ.പി ഭരണകൂടം ജയിലില്‍ അടച്ചിരിക്കുകയാണ്. പാവപ്പെട്ട ആളുകളെ സഹായിക്കാനും അവര്‍ക്ക് ജോലി നല്‍കാനും ശ്രമിച്ചതിന്റെ പേരിലാണ് സങ്കല്‍പ്പിക്കാന്‍ പോലും കഴിയാത്ത കുറ്റങ്ങള്‍ ചുമത്തി അവരെ അറസ്റ്റ് ചെയ്തത്. ആതുരസേവന രംഗത്തും ജീവകാരുണ്യ മേഖലയിലും അവര്‍ നടത്തുന്ന ശ്രമങ്ങളെ മതപരിവര്‍ത്തനമെന്ന് ആരോപിക്കുന്നത് ബി.ജെ.പിയുടെ തെറ്റായ നടപടിയാണ്. എത്രയും വേഗം കന്യാസ്ത്രീകളെ മോചിപ്പിക്കാന്‍ നടപടി ഉണ്ടാകണം. ഈ വിഷയത്തിലുള്ള ബി.ജെ.പിയുടെ ഇരട്ടത്താപ്പ് ജനം വിലയിരുത്തുമെന്നും സണ്ണി ജോസഫ് പറഞ്ഞു.