രണ്ടാഴ്ചയോളം പഴക്കമുള്ള അജ്ഞാതന്റെ മൃതദേഹം മുക്കടവില്‍ കുന്നിന്‍ പ്രദേശത്തെ റബര്‍ തോട്ടത്തില്‍; കൈകാലുകള്‍ ചങ്ങല കൊണ്ട് ബന്ധിച്ച് റബര്‍ മരത്തില്‍ പൂട്ടിയ നിലയില്‍ മൃതദേഹം
പുനലൂര്‍: അജ്ഞാതന്റെ മൃതദേഹം മുക്കടവില്‍ കുന്നിന്‍ പ്രദേശത്തെ റബര്‍ തോട്ടത്തില്‍ കണ്ടെത്തി. കൈകാലുകള്‍ ചങ്ങല കൊണ്ട് ബന്ധിച്ച് റബര്‍ മരത്തില്‍ പൂട്ടിയ നിലയിലായിരുന്നു മൃതദേഹം.രണ്ടാഴ്ചയോളം പഴക്കമുള്ളതാണ് മൃതദേഹം.
സമീപത്തുനിന്നും കീറിയ ബാഗും കത്രികയും കന്നാസും കുപ്പിയും കണ്ടെത്തി. മുഖവും ശരീരഭാഗങ്ങളും ജീര്‍ണിച്ച നിലയിലാണ്. മുഖം അടക്കം പല ഭാഗങ്ങളിലും പൊള്ളലേറ്റിട്ടുണ്ട്. പുനലൂര്‍ ഫയര്‍ ഫോഴ്‌സ് എത്തിയാണ് റബര്‍ മരത്തില്‍ നിന്നു ചങ്ങല മുറിച്ച് നീക്കിയത്. ചൊവ്വ പകല്‍ കാന്താരി ശേഖരിക്കാന്‍ തോട്ടത്തില്‍ എത്തിയ പ്രദേശവാസികളാണ് മൃതദേഹം കണ്ടത്. അടുത്തിടെ റബര്‍ മരങ്ങള്‍ ടാപ്പിങ് നടത്തിയിരുന്നില്ല. ചെടികള്‍ വളര്‍ന്ന നില്‍ക്കുന്നതിനാല്‍ പെട്ടെന്ന് ശ്രദ്ധിക്കപ്പെടാതെ വിധത്തിലായിരുന്നു മൃതദേഹമുണ്ടായിരുന്നത്.
മൃതദേഹം പുനലൂര്‍ താലൂക്ക് ആശുപത്രി മോര്‍ച്ചറിയിലേക്ക് മാറ്റി. ബുധനാഴ്ച പാരിപ്പള്ളി മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടം നടത്തും. പൊലീസ് അന്വേഷണം ആരംഭിച്ചു.