'ഐക്യദാര്‍ഢ്യത്തിനും പിന്തുണയ്ക്കും നന്ദി'; പലസ്തീന്‍ അംബാസഡര്‍ എ കെ ജി സെന്ററില്‍
തിരുവനന്തപുരം: ഇന്ത്യയിലെ ഫലസ്തീന് അംബാസഡര്‍ അബ്ദുള്ള അബു ഷാവേഷിന് സിപിഎം സംസ്ഥാന കമ്മിറ്റി ഓഫീസായ എ കെ ജി സെന്ററില്‍ സ്വീകരണം നല്‍കി. സിപിഎം കേന്ദ്രകമ്മിറ്റി അംഗങ്ങളായ ഡോ. ടി എം തോമസ് ഐസക്, പി രാജീവ്, പുത്തലത്ത് ദിനേശന്‍, സിപിഐ എം രാജ്യസഭാ കക്ഷി നേതാവ് ജോണ്‍ ബ്രിട്ടാസ്, സംസ്ഥാന സെക്രട്ടറിയറ്റ് അംഗങ്ങളായ എം വി ജയരാജന്‍, സി എന്‍ മോഹനന്‍, കെ ജയചന്ദ്രന്‍ എന്നിവര്‍ ചേര്‍ന്നാണ് സ്വീകരിച്ചത്.
ഫലസ്തീന് ജനതയോടുള്ള പാര്‍ടിയുടെ ഐക്യദാര്‍ഢ്യത്തിനും പിന്തുണയ്ക്കും പലസ്തീന്‍ അംബാസഡര്‍ നന്ദി അറിയിച്ചു. സാമ്രാജ്യത്വ പിന്തുണയോടെ എല്ലാ അന്താരാഷ്ട്ര ചട്ടങ്ങളെയും അട്ടിമറിച്ചാണ് ഫലസ്തീന്റെ ജനാധിപത്യ അവകാശങ്ങള്‍ ഇസ്രയേല്‍ നിഷേധിച്ചുപോരുന്നത്. ഫലസ്തീന് ജനതയുടെ സ്വയം നിര്‍ണ്ണയാവകാശത്തിനൊപ്പമാണ് എക്കാലവും സിപിഎം. സിപിഎമ്മിന്റെയും ലോകമെമ്പാടുമുള്ള കമ്മ്യൂണിസ്റ്റ് പ്രസ്ഥാനങ്ങളുടെയും നിലപാടില്‍ അദ്ദേഹം സന്തോഷം രേഖപ്പെടുത്തി.
ഇന്നലെ ഫലസ്തീന് അംബാസഡറുമായുള്ള കൂടിക്കാഴ്ചയില്‍ ഫലസ്തീന് ജനതയ്ക്ക് കേരളത്തിന്റെ ഐക്യദാര്‍ഢ്യം മുഖ്യമന്ത്രി പിണറായി വിജയന്‍ അറിയിച്ചിരുന്നു. നിയമസഭയിലെ മുഖ്യമന്ത്രിയുടെ ചേംബറിലായിരുന്നു കൂടിക്കാഴ്ച. കേരളം എന്നും ഫലസ്തീന് ജനതയ്‌ക്കൊപ്പമാണെന്ന് മുഖ്യമന്ത്രി ഫലസ്തീന് അംബാസിഡറോട് പറഞ്ഞു. എല്ലാ അന്താരാഷ്ട്ര കണ്‍വന്‍ഷനുകളും അട്ടിമറിച്ചാണ് യുഎസ് പിന്തുണയോടെ ഫലസ്തീന്റെ ജനാധിപത്യ അവകാശങ്ങള്‍ ഇസ്രയേല്‍ നിഷേധിച്ചുപോരുന്നത്. ഫലസ്തീന് ജനതയുടെ സ്വയം നിര്‍ണയാവകാശത്തിനൊപ്പമാണ് കേരളം. യുഎന്‍ പ്രമേയത്തിനനുസൃതമായി കിഴക്കന്‍ ജറുസലേം തലസ്ഥാനമായ ഫലസ്തീന് രാഷ്ട്രം സാധ്യമാക്കുകയും പശ്ചിമേഷ്യയില്‍ സമാധാനം പുനഃസ്ഥാപിക്കുകയും ചെയ്യാന്‍ ഐക്യരാഷ്ട്രസഭയും അന്താരാഷ്ട്ര സമൂഹവും അടിയന്തരമായി പ്രവര്‍ത്തിക്കണം എന്നതാണ് ഇടതുപക്ഷത്തിന്റെ നിലപാട് എന്നും മുഖ്യമന്ത്രി പറഞ്ഞു.
ഇസ്രയേലി അധിനിവേശവും ഫലസ്തീന് നേരിടുന്ന പ്രശ്‌നങ്ങളും അംബാസിഡര്‍ വിശദീകരിച്ചു. ഈ നിര്‍ണായ സന്ദര്‍ഭത്തില്‍ കേരളം നല്‍കുന്ന പിന്തുണ മഹത്തരമാണെന്നും അദ്ദേഹം പറഞ്ഞു. കൂടുതല്‍ പിന്തുണ ഫലസ്തീന് ആവശ്യമുണ്ട്. അത് ലോകത്തെമ്പാടുനിന്നും ലഭിക്കുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. കേരള മീഡിയ അക്കാദമി സംഘടിപ്പിക്കുന്ന ഇന്റര്‍നാഷണല്‍ മീഡിയ ഫെസ്റ്റിവല്‍ ഓഫ് കേരളയുടെ ഭാഗമായി പലസ്തീന്‍ ഐക്യദാര്‍ഢ്യ സമ്മേളനത്തില്‍ പങ്കെടുക്കാനായാണ് ഫലസ്തീന് അംബാസഡര്‍ അബ്ദുള്ള അബു ഷാവേഷ് കേരളത്തിലെത്തിയത്.