ക്യാമറയില്‍ കുടുങ്ങിയില്ല: അയ്യന്‍കുന്നില്‍ കടുവയുടെ സാന്നിധ്യമില്ലെന്ന് വനംവകുപ്പ്
ക്യാമറയില്‍ കുടുങ്ങിയില്ല: അയ്യന്‍കുന്നില്‍ കടുവയുടെ സാന്നിധ്യമില്ലെന്ന് വനംവകുപ്പ്
ഇരിട്ടി: അയ്യന്‍കുന്നില്‍ വനം വകുപ്പ് നടത്തിയ പരിശോധനയില്‍ കടുവയുടെ സാന്നിധ്യം കണ്ടെത്താന്‍ കഴിഞ്ഞില്ലെന്ന് വനം-വന്യജീവി വകുപ്പ് കൊട്ടിയൂര്‍ റേഞ്ച് ഓഫീസ് അധികൃതര്‍ അറിയിച്ചു. കടുവയിറങ്ങിയെന്ന സംശയത്തില്‍ അയ്യന്‍കുന്നിലും പരിസര പ്രദേശങ്ങളിലും വനം വകുപ്പ് അധികൃതരുടെ നേതൃത്വത്തില്‍ നടത്തിയ വ്യാപക തിരച്ചിലില്‍ തെളിവുകളൊന്നും ലഭിച്ചില്ല.
കഴിഞ്ഞ ദിവസങ്ങളില്‍ പ്രദേശത്ത് സ്ഥാപിച്ച നാല് ക്യാമറകള്‍ പരിശോധിച്ചതില്‍ കടുവയുടെ ദൃശ്യങ്ങള്‍ പതിഞ്ഞിട്ടില്ല. തിങ്കളാഴ്ച വനം വകുപ്പും ആര്‍.ആര്‍.ടി ജീവനക്കാരും ചേര്‍ന്ന് നടത്തിയ പട്രോളിങ്ങിലും രണ്ട് ദിവസത്തെ തുടര്‍ച്ചയായ പട്രോളിങ്ങിലും ക്യാമറ ട്രാപ്പ് പരിശോധനയിലും ഡ്രോണ്‍ നിരീക്ഷണത്തിലും വന്യജീവി സാന്നിധ്യം കണ്ടെത്താന്‍ സാധിച്ചിട്ടില്ല.
ഈ സാഹചര്യത്തില്‍, വന്യജീവി കാട്ടിലേക്ക് തന്നെ തിരികെ പോയതായി കൊട്ടിയൂര്‍ റേഞ്ച് ഓഫീസ് അധികൃതര്‍ സ്ഥിരീകരിച്ചു. എന്നാല്‍ പ്രദേശത്തെ പട്രോളിങ്ങും നിരീക്ഷണവും തുടരും.