എയിംസ് ആലപ്പുഴയില്‍ തന്നെയെന്ന് സൂചിപ്പിച്ച് കേന്ദ്രമന്ത്രി സുരേഷ് ഗോപി: സ്ഥലത്തിന് ഉറപ്പ് ലഭിച്ചാല്‍ തുടര്‍ നടപടി ഉടന്‍ എന്ന് സുരേഷ് ഗോപി
തിരുവനന്തപുരം: എയിംസ് വിഷയത്തില്‍ വീണ്ടും പ്രതികരണവുമായി കേന്ദ്രമന്ത്രി സുരേഷ് ഗോപി. ആലപ്പുഴയില്‍ സ്ഥലം ഏറ്റെടുത്തത് സര്‍ക്കാര്‍ രേഖാമൂലം അറിയിക്കുകയാണെങ്കില്‍ അതിനുവേണ്ട നടപടി ഉണ്ടാകും. മന്ത്രി സജി ചെറിയാന്‍ വാക്കാല്‍ പറഞ്ഞതുകൊണ്ട് കാര്യമില്ലെന്നും രേഖാമൂലം അറിയിക്കണമെന്നും സുരേഷ് ഗോപി പറഞ്ഞു.രേഖാമൂലം സ്ഥലം സര്‍ക്കാര്‍ അറിയിക്കണം. തൃശ്ശൂരിലും എവിടെ പദ്ധതി നടപ്പാക്കാന്‍ പറ്റും എന്നത് രേഖാമൂലം അറിയിക്കാന്‍ സര്‍ക്കാര്‍ തയ്യാറാകണം.
അങ്ങനെയെങ്കില്‍ പദ്ധതി യാഥാര്‍ത്ഥ്യമാക്കാം എന്ന് ജെപി നദ്ദ തന്നെ അറിയിച്ചതാണെന്ന് സുരേഷ് ഗോപി പറഞ്ഞു.നേരത്തെ എയിംസ് ആലപ്പുഴയില്‍ സ്ഥാപിക്കണമെന്ന കേന്ദ്രമന്ത്രി സുരേഷ്ഗോപിയുടെ പ്രസ്താവനയെ സ്വാഗതം ചെയ്ത് ബിജെപി ആലപ്പുഴ സൗത്ത് ജില്ലാ കമ്മിറ്റി പ്രമേയം പാസാക്കിയിരുന്നു. അതേസമയം, എയിംസ് കേരളത്തില്‍ എവിടെ വന്നാലും സ്വാഗതം ചെയ്യും എന്നാണ് ബിജെപിയുടെ നിലപാട്. ഓരോ ജില്ലാ കമ്മിറ്റിക്കാരും എവിടെ വേണം എന്ന് ആവശ്യപ്പെടുമെന്നും കേന്ദ്രം അതില്‍ തീരുമാനം എടുക്കുമെന്നും സംസ്ഥാന നേതാവ് എം.ടി. രമേശ് വ്യക്തമാക്കിയിരുന്നു.