മഹാരാഷ്ട്രയില്‍ ഫ്‌ലാറ്റിന് തീപിടിച്ച് മൂന്ന് മലയാളികള്‍ ഉള്‍പ്പടെ നാലുപേര്‍ മരിച്ചു; ദുരന്തമുണ്ടായത് നവി മുംബൈയിലെ വാഷി സെക്ടര്‍- 14ലെ രഹേജ റെസിഡന്‍സി ഹൗസിംഗ് സൊസൈറ്റിയില്‍
By : സ്വന്തം ലേഖകൻ
Update: 2025-10-21 05:41 GMT
മുംബൈ: മഹാരാഷ്ട്രയില്‍ ഫ്‌ലാറ്റിന് തീപിടിച്ച് മൂന്ന് മലയാളികള്‍ ഉള്‍പ്പടെ നാലുപേര്‍ മരിച്ചു. പത്തു പേര്‍ക്ക് പരിക്കേറ്റു. പലരുടേയും നില ഗുരുതരമാണ്. നവി മുംബൈയിലെ വാഷി സെക്ടര്‍- 14 ല്‍ സ്ഥിതി ചെയ്യുന്ന രഹേജ റെസിഡന്‍സി ഹൗസിംഗ് സൊസൈറ്റിയിലാണ് തീപിടിത്തമുണ്ടായത്.
പൂജ രാജന്‍ (39), സുന്ദര്‍ ബാലകൃഷ്ണന്‍ (44), വേദിക സുന്ദര്‍ ബാലകൃഷ്ണന്‍ (ആറ്), കമല ഹിരാല്‍ ജെയിന്‍ (84) എന്നിവരാണ് മരിച്ചത്. കെട്ടിടത്തിന്റെ പത്താം നിലയിലുണ്ടായ തീപിടിത്തം പിന്നീട് മറ്റ് നിലകളിലേക്കും പടരുകയായിരുന്നു. ഷോര്‍ട്ട് സര്‍ക്യൂട്ടാണ് തീപിടുത്തമുണ്ടാകാനുള്ള കാരണമെന്നാണ് പ്രാഥമിക നിഗമനം. എസി യൂണിറ്റ് പൊട്ടിത്തെറിച്ചാണ് അപകടമുണ്ടായതെന്നാണ് ദൃക്സാക്ഷികള്‍ പറയുന്നത്. അഗ്‌നിശമനയുടെ അഞ്ച് ഫയര്‍ എഞ്ചിനുകള്‍ എത്തിച്ചാണ് തീ നിയന്ത്രണവിധേയമാക്കിയത്.