അമ്മയ്ക്കുനേരേ ലൈംഗികാതിക്രമം; ചെറുത്തപ്പോള് മൂര്ച്ചയേറിയ ആയുധംകൊണ്ട് നെഞ്ചില് കുത്തി: മകന് ജീവപര്യന്തം ശിക്ഷ
അമ്മയ്ക്കുനേരേ ലൈംഗികാതിക്രമം; മകന് ജീവപര്യന്തം ശിക്ഷ
ബെംഗളൂരു: ചിക്കബല്ലാപുരയില് അമ്മയ്ക്കുനേരേ ലൈംഗികാതിക്രമം നടത്തിയ കേസില് മകന് ജീവപര്യന്തം തടവുശിക്ഷ. ചിന്നഹള്ളി ഗ്രാമത്തിലെ മുപ്പത്തെട്ടുകാരനെയാണ് കോടതി ശിക്ഷിച്ചത്. മദ്യലഹരിയില് ഇയാള് സ്വന്തം അമ്മയെ ലൈംഗികമായി ആക്രമിക്കുകയും പീഡിപ്പിക്കാന്ശ്രമിക്കുകയും ആയിരുന്നു. മകന്റെ ശ്രമം ചെറുത്ത അമ്മയെ ക്രൂരമായി ആക്രമിക്കുകയും കത്തിക്ക് കുത്തുകയുംചെയ്തു.
കഴിഞ്ഞവര്ഷംനടന്ന സംഭവത്തില് വിചാരണ പൂര്ത്തിയാക്കിയ ജില്ലാ സെഷന്സ് കോടതി ജീവപര്യന്തം തടവുശിക്ഷയും 25,000 രൂപ പിഴയും വിധിക്കുകയായിരുന്നു. മദ്യത്തിനടിമയായിരുന്ന ഇയാള് കഴിഞ്ഞവര്ഷം ഓഗസ്റ്റ് നാലിനാണ് അമ്മയെ ആക്രമിച്ചത്. വീടിനുപുറത്ത് ഉറങ്ങിക്കിടന്ന അമ്മയെ ആക്രമിക്കുകയായിരുന്നു.
ലൈംഗികാതിക്രമം ചെറുത്തതോടെ മുഖത്ത് അടിക്കുകയും മൂര്ച്ചയേറിയ ആയുധംകൊണ്ട് നെഞ്ചില് കുത്തുകയുമായിരുന്നു. ഗുരുതരപരിക്കുകളോടെ ആശുപത്രിയില് പ്രവേശിപ്പിച്ച ഇവര് പിന്നീട് സുഖംപ്രാപിച്ചു. പ്രതി കുറ്റക്കാരനാണെന്ന് തെളിഞ്ഞെന്ന് ശിക്ഷവിധിച്ച ജഡ്ജി എസ്.വി. കണ്ഠരാജു വ്യക്തമാക്കി.