പെന്ഷന് വിതരണത്തിന് 73.72 കോടിയും മറ്റ് ആവശ്യങ്ങള്ക്ക് 20 കോടിയും; കെഎസ്ആര്ടിസിക്ക് 93.72 കോടി രൂപ അനുവദിച്ചു
തിരുവനന്തപുരം : കെഎസ്ആര്ടിസിക്ക് സര്ക്കാര് സഹായമായി 93.72 കോടി രൂപകൂടി അനുവദിച്ചതായി ധനമന്ത്രി കെ എന് ബാലഗോപാല് അറിയിച്ചു. പെന്ഷന് വിതരണത്തിന് 73.72 കോടി രൂപയും മറ്റ് ആവശ്യങ്ങള്ക്ക് 20 കോടി രൂപയുമാണ് അനുവദിച്ചത്.
ഈ വര്ഷം ഇതിനകം 1,201.56 കോടി രൂപയാണ് കെഎസ്ആര്ടിസിക്ക് സര്ക്കാര് സഹായമായി നല്കിയത്. പെന്ഷന് വിതരണത്തിന് 731.56 കോടി രൂപയും പ്രത്യേക സഹായമായി 470 കോടി രൂപയുമാണ് അനുവദിച്ചത്. ഈ വര്ഷം ബജറ്റില് കോര്പ്പറേഷനായി നീക്കിവച്ചത് 900 കോടി രൂപയാണ്. ബജറ്റ് വകയിരുത്തലിനുപുറമെ 301.56 കോടി രൂപകൂടി ഇതിനകം കെഎസ്ആര്ടിസിക്ക് അനുവദിച്ചു.
ഈ സര്ക്കാരിന്റെ കാലത്ത് 8,027.72 കോടി രൂപയാണ് കെഎസ്ആര്ടിസിക്ക് സര്ക്കാര് സഹായമായി ഇതുവരെ ലഭിച്ചത്. കഴിഞ്ഞ സര്ക്കാരിന്റെ കാലത്ത് 5,002 കോടി രൂപ ലഭിച്ചിരുന്നു. ഒന്നും രണ്ടും ഇടതു സര്ക്കാരുകള് ചേര്ന്ന് ആകെ 13,029.72 കോടി രൂപയാണ് കോര്പ്പറേഷന് സഹായമായി നല്കിയത്. കഴിഞ്ഞ യുഡിഎഫ് സര്ക്കാര് അഞ്ചുവര്ഷത്തില് 1,467 കോടി രൂപ മാത്രമാണ് സഹായമായി ലഭ്യമാക്കിയത്.