തെക്കന് തമിഴ്നാട് തീരത്തിന് മുകളില് നിലനില്ക്കുന്ന ചക്രവാതച്ചുഴി; സംസ്ഥാനത്ത് വിവിധയിടങ്ങളില് മഴ തുടരും
തിരുവനന്തപുരം: സംസ്ഥാനത്ത് വിവിധയിടങ്ങളില് മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. തെക്കന് തമിഴ്നാട് തീരത്തിന് മുകളില് നിലനില്ക്കുന്ന ചക്രവാതച്ചുഴിയുടെയും ന്യൂനമര്ദ്ദ പാത്തിയുടെയും സ്വാധീനഫലമായി ഇന്ന് കേരളത്തിലെ എട്ട് ജില്ലകളില് മഴയ്ക്ക് സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, പാലക്കാട് എന്നീ ജില്ലകളിലാണ് ഇന്ന് മഴ മുന്നറിയിപ്പുള്ളത്. ഈ ജില്ലകളില് ഒറ്റപ്പെട്ടയിടങ്ങളില് നേരിയതോ മിതമായതോ ആയ മഴയ്ക്കാണ് സാധ്യത.
ചിലയിടങ്ങളില് ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മഴയ്ക്കൊപ്പം ശക്തമായ കാറ്റിനും സാധ്യതയുള്ളതിനാല് മലയോര മേഖലയിലുള്ളവര് ജാഗ്രത പാലിക്കണം. എന്നാല് കേരളാ തീരത്ത് മത്സ്യബന്ധനത്തിന് നിലവില് തടസ്സമില്ല. അതേസമയം, തെക്കന് തമിഴ്നാട് തീരം, ഗള്ഫ് ഓഫ് മാന്നാര്, കന്യാകുമാരി പ്രദേശം എന്നിവിടങ്ങളില് ശക്തമായ കാറ്റിന് സാധ്യതയുള്ളതിനാല് ആ ഭാഗങ്ങളില് മത്സ്യബന്ധനത്തിന് പോകുന്നവര് ജാഗ്രത പാലിക്കണമെന്നും നിര്ദ്ദേശമുണ്ട്. വരും ദിവസങ്ങളില് മഴയുടെ തീവ്രത കുറയാനാണ് സാധ്യതയെന്നും കാലാവസ്ഥാ വകുപ്പ് വ്യക്തമാക്കുന്നു.