വീടിന് സമീപം ഇറക്കാമെന്ന് പറഞ്ഞ് പ്ലസ്ടു വിദ്യാര്‍ത്ഥിനിയെ ഓട്ടോയില്‍ കയറ്റി; ആളൊഴിഞ്ഞ സ്ഥലത്ത് കൊണ്ട് പോയി ലൈംഗികാതിക്രമം നടത്തിയ 50കാരൻ പിടിയിൽ
കോഴിക്കോട്: ക്ലാസ് കഴിഞ്ഞ് വീട്ടിലേക്ക് പോകാനായി ബസ് സ്റ്റോപ്പിൽ നിന്ന പ്ലസ്ടു വിദ്യാര്‍ത്ഥിനിക്കെതിരെ ലൈംഗികാതിക്രമം നടത്തിയ ഓട്ടോ ഡ്രൈവര്‍ അറസ്റ്റിൽ. കൊടുവള്ളി വാവാട് പേക്കണ്ടിയില്‍ വീട്ടില്‍ അബ്ദുല്‍ ഗഫൂര്‍(50)നെയാണ് കുന്ദമംഗലം പോലീസ് അറസ്റ്റ് ചെയ്തത്. പോക്‌സോ നിയമപ്രകാരമുല്ല വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്.
വൈകീട്ടോടെ ക്ലാസ് കഴിഞ്ഞ് വീട്ടിലേക്കു പോകുന്നതിനായി ബസ് കാത്തു നില്‍കുകയായിരുന്ന വിദ്യാര്‍ത്ഥിനിയെ ഗഫൂര്‍ നിര്‍ബന്ധിച്ച് തന്റെ ഓട്ടോയില്‍ കയറ്റി. വീടിന് സമീപം ഇറക്കിത്തരാമെന്ന് പറഞ്ഞാണ് ഇയാൾ വിദ്യാർത്ഥിനിയെ കൊണ്ട് പോയത്. ശേഷം ആളൊഴിച്ച സ്ഥലത്ത് വെച്ച് ലൈംഗികാതിക്രമം നടത്തുകയായിരുന്നു. വിദ്യാര്‍ത്ഥിനി വാഹനം നിര്‍ത്താനാവശ്യപ്പെട്ട് ബഹളം വെച്ചപ്പോള്‍ ഇയാള്‍ ഓട്ടോയില്‍ നിന്ന് ഇറക്കി വിട്ട് സ്ഥലം വിട്ടു.
തുടർന്ന് വിദ്യാർത്ഥിനി പോലീസിൽ പരാതി നൽകുകയായിരുന്നു. കേസ് രജിസ്റ്റര്‍ ചെയ്ത പോലീസ് നടത്തിയ അന്വേഷണത്തിൽ ഗഫൂർ പിടിയിലായി. സബ് ഇന്‍സ്‌പെക്ടര്‍മാരായ നിധിന്‍, ജിബിഷ എന്നിവര്‍ ചേര്‍ന്ന് പ്രതിയെ കുന്ദമംഗലത്ത് നിന്നുമാണ് കസ്റ്റഡിയില്‍ എടുത്തത്. പ്രതിയെ കോടതിയിൽ ഹാജരാക്കി തുടർ നടപടികൾ സ്വീകരിക്കുമെന്ന് പോലീസ് അറിയിച്ചു.