അറസ്റ്റ് ഭയന്ന് രാഹുല്‍ മാങ്കൂട്ടത്തിലിനെ കോണ്‍ഗ്രസ് ഒളിപ്പിക്കുന്നു; രാഹുല്‍ മാങ്കൂട്ടത്തിന്റെ ചെയ്തികളില്‍ കോണ്‍ഗ്രസിന്റെ ജീര്‍ണ സംസ്‌കാരമാണ് വെളിപ്പെട്ടതെന്ന് എം വി ഗോവിന്ദന്‍
അറസ്റ്റ് ഭയന്ന് രാഹുല്‍ മാങ്കൂട്ടത്തിലിനെ കോണ്‍ഗ്രസ് ഒളിപ്പിക്കുന്നു
കോഴിക്കോട്: നിര്‍ബന്ധിത ഗര്‍ഭഛിദ്രം, ലൈംഗികപീഡനം തുടങ്ങിയ ഗുരുതര കുറ്റകൃത്യങ്ങളില്‍ പ്രതിയായ യൂത്ത് കോണ്‍ഗ്രസ് മുന്‍സംസ്ഥാന പ്രസിഡന്റ് രാഹുല്‍ മാങ്കൂട്ടത്തെ അറസ്റ്റ് ഭയന്ന് കോണ്‍ഗ്രസ് ഒളിപ്പിക്കുകയാണെന്ന് എന്ന് സിപിഐ എം സംസ്ഥാന സെക്രട്ടറി എം വി ഗോവിന്ദന്‍. രാഹുല്‍ മാങ്കൂട്ടത്തിന്റെ ചെയ്തികളില്‍ കോണ്‍ഗ്രസിന്റെ ജീര്‍ണ സംസ്‌കാരമാണ് വെളിപ്പെട്ടത്. ഇക്കാര്യത്തില്‍ കോണ്‍ഗ്രസില്‍ ഭിന്നത ശക്തമാണെന്നും അദ്ദേഹം പറഞ്ഞു. കോഴിക്കോട് പ്രസ് ക്ലബ് സംഘടിപ്പിച്ച 'മീറ്റ് ദ ലീഡര്‍' പരിപാടിയില്‍ സംസാരിക്കുകയായിരുന്നു അദ്ദേഹം.
കുറ്റകൃത്യവുമായി ബന്ധപ്പെട്ട ഇരയുടെ വെളിപ്പെടുത്തലും പരാതികളും കേരളം വളരെ ഗൗരവത്തോടെയാണ് ചര്‍ച്ചചെയ്യുന്നത്. കേവലം രാഷ്ട്രീയനേട്ടത്തിനുള്ള വിഷയമല്ലിത്. കേരളത്തിന്റെ മനസാക്ഷിയുടെ മുന്നില്‍ ഇതുപോലൊരു പ്രശ്നം സമീപകാലചരിത്രത്തിലൊന്നും ഉണ്ടായിട്ടില്ല. കോണ്‍ഗ്രസ് നേതാക്കള്‍ക്കുപോലും ഇക്കാര്യം എതിര്‍ക്കാന്‍ സാധിക്കില്ല. ജനങ്ങള്‍ എല്ലാം വ്യക്തമായി മനസിലാക്കിയിട്ടുണ്ട്.
മുന്‍കൂര്‍ ജാമ്യാപേക്ഷയില്‍ കൃത്യം തെളിയിക്കത്തക്ക വിധത്തിലുള്ള കുറ്റസമ്മതംകൂടിയാണ് രാഹുല്‍ മാങ്കൂട്ടം നടത്തിയത്. ഇത്തരത്തിലൊരാള്‍ക്ക് തക്കതായ ശിക്ഷകിട്ടണമെന്നാണ് ഇന്ന് ഏവരും ചര്‍ച്ചചെയ്യുന്നത്. അതിന് ഉചിതമായ നിയമനടപടികളാണ് കൈക്കൊള്ളുന്നതെന്നും എം വി ഗോവിന്ദന്‍ പറഞ്ഞു.