തെരുവുനായ ശല്യം കാരം പുറത്തിറങ്ങി നടക്കാന്‍ കഴിയാത്ത സ്ഥിതി; കുട്ടകളെയടക്കം പട്ടിക്കടിക്കുന്നു; ജനങ്ങള്‍ക്ക് ഭയം; എന്തെങ്കിലും ചെയ്‌തേ പറ്റൂവെന്ന് ഹൈക്കോടതി
കൊച്ചി: തെരുവുനായ ശല്യം കൊണ്ട് ജനങ്ങള്‍ പുറത്തിറങ്ങാന്‍ പോലും ഭയക്കുന്ന സ്ഥിതിയാണെന്ന് ഹൈക്കോടതി. കുട്ടികളെയടക്കം തെരുവുനായകള്‍ കടിക്കുന്ന സംഭവങ്ങള്‍ പതിവായ സാഹചര്യത്തില്‍ പ്രശ്‌നത്തിന് ഉടന്‍ പരിഹാരം കണ്ടെത്തേണ്ടതിന്റെ ആവശ്യം അതീവ ഗൗരവത്തോടെ ചൂണ്ടിക്കാട്ടിയാണ് ജസ്റ്റിസ് സി.എസ്. ഡയസിന്റെ നിരീക്ഷണം. ''ജനങ്ങള്‍ക്കാകെ ഭയമാണ്. ഈ അവസ്ഥ തുടരാന്‍ അനുവദിക്കാനാവില്ല. കോടതിയുടെ ഇടപെടല്‍ ആവശ്യമാകുന്നു,'' ജഡ്ജി പരാമര്‍ശിച്ചു. തെരുവുനായ ആക്രമണങ്ങളില്‍ പരിക്കേറ്റവര്‍ക്ക് നല്‍കേണ്ട നഷ്ടപരിഹാരം കാര്യക്ഷമമായി കൈകാര്യം ചെയ്യേണ്ടതിന്റെ ആവശ്യവുമായി സമര്‍പ്പിക്കപ്പെട്ട വിവിധ ഹര്‍ജികള്‍ പരിഗണിക്കവെയാണ് കോടതിയുടെ പരാമര്‍ശങ്ങള്‍.
നഷ്ടപരിഹാരവുമായി ബന്ധപ്പെട്ട് ജസ്റ്റിസ് സിരിജഗന്‍ കമ്മിറ്റിയുടെ പ്രവര്‍ത്തനം തുടരാന്‍ നിര്‍ദേശിക്കണമെന്ന ഹര്‍ജിയും കോടതി തിങ്കളാഴ്ച വീണ്ടും പരിഗണിക്കും. നിലവില്‍ 9000 ലധികം നഷ്ടപരിഹാര അപേക്ഷകള്‍ നടപടിയില്ലാതെ കെട്ടിക്കിടക്കുകയാണെന്നത് ഗുരുതര പ്രശ്നമായി കോടതി കാണുന്നു. തെരുവുനായകള്‍ വഴി റാബീസ് ബാധിതരാകുന്ന സംഭവങ്ങള്‍ കൂടി വരുമ്പോള്‍ ആരോഗ്യവിഭാഗത്തിന്റെയും തദ്ദേശസ്വയംഭരണ സ്ഥാപനങ്ങളുടെയും പ്രവര്‍ത്തനം കര്‍ശനമായി പരിശോധിക്കേണ്ടതുണ്ടെന്ന് കോടതി അഭിപ്രായപ്പെട്ടു.