സ്ത്രീശക്തി ലോട്ടറിയുടെ ഒന്നാം സമ്മാനമടിച്ചു; തുക കൈപ്പറ്റി ഒരാഴ്ചയ്ക്കകം വാഹനാപകടത്തിൽപ്പെട്ടു; ഗുരുതരമായി പരിക്കേറ്റ് ചികിത്സയിലായിരുന്ന വയോധികൻ മരിച്ചു

കൊച്ചി: എറണാകുളം കോലഞ്ചേരി മൂശാരിപ്പടയിൽ ഇരുചക്രവാഹനങ്ങൾ കൂട്ടിയിടിച്ച് ഉണ്ടായ അപകടത്തിൽ വയോധികൻ മരണപ്പെട്ടത് ലോട്ടറി അടിച്ച തുക കൈപറ്റി ഒരാഴ്ചയ്ക്കകം. മനയത്ത് വീട്ടിൽ എം സി യാക്കോബ് (75) ആണ് മരിച്ചത്. മൂന്ന് മാസങ്ങൾക്ക് മുൻപാണ് സർക്കാരിന്റെ സ്ത്രീശക്തി ലോട്ടറി അടിച്ചിരുന്നു.

തിങ്കളാഴ്ച്ച വൈകീട്ട് 6 മണിയോടെയാണ് അപകടമുണ്ടായത്. മൂശാരിപ്പടി ഭാഗത്ത് നിന്നും വരികയായിരുന്ന യാക്കോബ് ബിവറേജിന്റെ ഭാഗത്തുള്ള കടയിലേക്ക് തിരിയുന്നതിനിടെ എതിരെ വന്ന ബൈക്കുമായി കൂട്ടിയിടിച്ച് അപകടമുണ്ടാക്കുകയായിരുന്നു.

അപകടത്തിൽ ഗുരുതരമായി പരിക്കേറ്റ യാക്കോബിനെ കോലഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരുന്നു. എന്നാൽ ചികിത്സയിലിരിക്കെ ഇന്ന് വൈകിട്ട് 5 മണിയോടെ മരണം സംഭവിക്കുകയായിരുന്നു.

കഴിഞ്ഞ ജൂലൈ മാസത്തിലെ സ്ത്രീശക്തി ലോട്ടറിയുടെ ഒന്നാം സമ്മാനമായ 75 ലക്ഷം രൂപയുടെ സമ്മാനർഹനായിരുന്നു യാക്കോബ്. മൂന്നാഴ്ച്ച മുമ്പാണ് സമ്മാന തുക യാക്കോബ് കൈപ്പറ്റിയത്.