കടയുടെ ഷട്ടറും പൂട്ടുകളും പൊളിച്ച് അകത്ത് കയറി; 23കാരൻ കവർന്നത് അറുപതോളം മൊബൈൽ ഫോണുകൾ; അന്തർ സംസ്ഥാന മോഷ്ടാവിനെ മണിക്കൂറുകൾക്കുള്ളിൽ പൊക്കി വളാഞ്ചേരി പോലീസ്

മലപ്പുറം: മൊബൈൽ ഫോൺ കട കുത്തിത്തുറന്ന് അറുപതോളം ഫോണുകൾ കവർന്ന സംഭവത്തിൽ പ്രതിയെ പോലീസ് പിടികൂടിയത് മണിക്കൂറുകൾക്കകം. അന്തർ സംസ്ഥാന മോഷ്ടാവിനെയാണ് വളാഞ്ചേരി പോലീസ് പിടികൂടിയത്. പശ്ചിമ ബംഗാൾ മുർഷിദാബാദ് സ്വദേശിയായ 23 വയസ്സുകാരൻ രാകേഷ് ഷായാണ് പോലീസിന്റെ പിടിയിലായത്. വളാഞ്ചേരി ബസ് സ്റ്റാൻഡിന് സമീപം പെരിന്തൽമണ്ണ റോഡിൽ പ്രവർത്തിക്കുന്ന കടയിലാണ് മോഷണം നടന്നത്.

ശനിയാഴ്ച പുലർച്ചെ നടന്ന മോഷണത്തിന് പിന്നാലെ വളാഞ്ചേരി പോലീസ് നടത്തിയ ഊർജിതമായ അന്വേഷണത്തിലാണ് അതേ ദിവസം തന്നെ പ്രതിയെ വലയിലാക്കാനായത്. കടയുടെ ഷട്ടറും പൂട്ടുകളും പൊളിച്ച് അകത്ത് കടന്നാണ് മോഷണം നടത്തിയത്. സർവീസിനായി കടയിൽ ഉപഭോക്താക്കൾ എത്തിച്ച അറുപതോളം വിലപിടിപ്പുള്ള മൊബൈൽ ഫോണുകളാണ് രാകേഷ് ഷാ കവർന്നതെന്ന് പോലീസ് വ്യക്തമാക്കി.