കിണറിൽ ഗ്രില്ല് അകപ്പെട്ടു; കിണറ്റിലിറങ്ങി മുകളിലേക്ക് ഉയർത്താൻ ശ്രമിക്കവേ അപകടം; യുവാവ് ശ്വാസം മുട്ടി മരിച്ചു; ദാരുണ സംഭവം പാലക്കാട്

പാലക്കാട്: വാണിയംകുളത്ത് കിണർ വൃത്തിയാക്കാൻ കിണറിൽ ഇറങ്ങിയ യുവാവിന് ദാരുണാന്ത്യം. ശ്വാസംമുട്ടിയാണ് യുവാവ് മരിച്ചത്. വാണിയംകുളം പുലാച്ചിത്രയിലാണ് സംഭവം നടന്നത്. പുലാച്ചിത്ര പുലാശ്ശേരി വീട്ടിൽ ഹരി (38) ആണ് മരിച്ചത്. കിണറിൽ അകപ്പെട്ട ഗ്രില്ല് മുകളിലേക്ക് കയറ്റാൻ വേണ്ടി കിണറിൽ ഇറങ്ങിയതായിരുന്നു. ഇന്ന് രാവിലെ 9.30യോടെയായിരുന്നു സംഭവം.

ഷൊർണൂരിൽ നിന്നും ഫയർഫോഴ്സ് എത്തി രക്ഷാപ്രവർത്തനം നടത്തിയെങ്കിലും വാണിയംകുളത്തെ സ്വകാര്യ ആശുപത്രിയിൽ എത്തിക്കുമ്പോഴേക്കും ഹരി മരണത്തിന് കീഴടങ്ങി. മൃതദേഹം വാണിയംകുളത്തെ സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്. പൊലീസിൻ്റെ നടപടിക്രമങ്ങൾക്കും പോസ്റ്റ്മോർട്ടത്തിനും ശേഷം മൃതദേഹം ബന്ധുക്കൾക്ക് വിട്ടുകൊടുക്കുമെന്നും അറിയിച്ചിട്ടുണ്ട്. സ്ഥലത്ത് പോലീസെത്തി മേൽനടപടികൾ സ്വീകരിച്ചു.