നിർമാണത്തിലിരുന്ന വീട്ടിൽ ജോലി ചെയ്യുന്നതിനിടെ അപകടം; ഡ്രില്ലിങ് മെഷീനില്‍ നിന്ന് ഷോക്കേറ്റ് യുവാവിന് ദാരുണാന്ത്യം; ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല; വേദനയോടെ കുടുംബം

കോഴിക്കോട്: നിർമാണത്തിലിരുന്ന വീട്ടിൽ ജോലി ചെയ്യുന്നതിനിടെ ഡ്രില്ലിംഗ് മെഷീനിൽ നിന്ന് ഷോക്കേറ്റ് യുവാവ് മരിച്ചു. കുറ്റ്യാടി കോവക്കുന്നിൽ ഇന്നലെയാണ് ദാരുണമായ അപകടം സംഭവിച്ചത്. കായക്കൊടി ഈച്ചക്കുന്നിലെ അഖിലേഷ് (27) ആണ് ജീവൻ നഷ്ടപ്പെട്ടത്.

ഇന്നലെ വൈകിട്ടോടെയാണ് സംഭവം. നിർമാണത്തിലിരിക്കുന്ന വീട്ടിൽ ഡ്രില്ലിംഗ് മെഷീൻ ഉപയോഗിച്ച് ജോലി ചെയ്യുന്നതിനിടെയാണ് അഖിലേഷിന് വൈദ്യുതാഘാതമേറ്റത്. ഉടൻ തന്നെ ഇദ്ദേഹത്തെ കുറ്റ്യാടി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തെ തുടർന്ന് മൃതദേഹം കോഴിക്കോട് മെഡിക്കൽ കോളേജ് ആശുപത്രിയിൽ പോസ്റ്റ്‌മോർട്ടം നടത്തി. തുടർന്ന് ബന്ധുക്കൾക്ക് വിട്ടുനൽകി. അപകടത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്.