വാഹന പരിശോധനയിൽ മെത്താംഫിറ്റമിനുമായി യുവതിയും യുവാവും പിടിയിൽ; വലയിലായത് മയക്കുമരുന്ന് ശൃംഖലയിലെ പ്രധാന കണ്ണികൾ

കല്പറ്റ: ലക്കിടിയിൽ വാഹന പരിശോധനയ്ക്കിടെ 3.06 ഗ്രാം മെത്താംഫിറ്റമിനുമായി യുവതിയും യുവാവും എക്സൈസ് സംഘത്തിന്റെ പിടിയിലായി. കൊടുവള്ളി മാനിപുരം വട്ടോത്തുപുറായിൽ മുഹമ്മദ് ശിഹാബ് വി പി (42), താമരശ്ശേരി തിരുവമ്പാടി മാട്ടുമ്മൽ ശാക്കിറ എകെ (30) എന്നിവരെയാണ് അറസ്റ്റ് ചെയ്തത്. മയക്കുമരുന്ന് ശൃംഖലയിലെ പ്രധാന കണ്ണികളാണ് ഇരുവരുമെന്ന് എക്സൈസ് സംഘം അറിയിച്ചു.

കല്പറ്റ എക്സൈസ് റേഞ്ച് ഇൻസ്പെക്ടർ ജിഷ്ണു ജിയുടെ നേതൃത്വത്തിലുള്ള സംഘമാണ് ഇവരെ പിടികൂടിയത്. പരിശോധനാ സംഘത്തിൽ സിവിൽ എക്സൈസ് ഓഫീസർമാരായ മുഹമ്മദ് മുസ്തഫ ടി, വൈശാഖ് വികെ, പ്രജീഷ്, വനിതാ സിവിൽ എക്സൈസ് ഓഫീസർ സിബിജ, പ്രിവന്റീവ് ഓഫീസർ ഡ്രൈവർ (ഗ്രേഡ്) അബ്ദുൾ റഹീം എന്നിവരും ഉണ്ടായിരുന്നു. ഇരുവരെയും ചോദ്യം ചെയ്തതിൽ നിന്നും ലഹരിക്കടത്തുമായി ബന്ധപ്പെട്ട് കൂടുതൽ വിവരങ്ങൾ പുറത്തുവരുമെന്നാണ് പോലീസിന്റെ കണക്കുകൂട്ടൽ.