രഹസ്യ വിവരത്തിൽ പരിശോധന; ബാഗിനുള്ളിൽ കഞ്ചാവുമായി യുവാക്കൾ പിടിയിൽ; പിടിച്ചെടുത്തത് 5.65 കിലോഗ്രാം കഞ്ചാവ്
കൊച്ചി: അന്യസംസ്ഥാനത്ത് നിന്നും കഞ്ചാവ് കടത്തി ചില്ലറ വിൽപ്പന നടത്തുന്ന സംഘത്തിലെ യുവാക്കൾ പിടിയിൽ. പാലക്കാട് അലനല്ലൂ൪ സ്വദേശി റിസ്‌വാൻ, കോട്ടോപ്പാടം സ്വദേശി റിയാസ് എന്നിവരാണ് പിടിയിലായത്. കളമശ്ശേരിയിൽ വെച്ചാണ് 5.65 കിലോഗ്രാം കഞ്ചാവുമായി ഇവർ പിടിയിലായത്. ഒഡീഷയിൽ നിന്നും കഞ്ചാവ് എത്തിച്ച് വിൽപ്പന നടത്തുന്ന സംഘത്തിലെ അംഗങ്ങളാണിവരെന്ന് എക്സൈസ് പറഞ്ഞു
രഹസ്യ വിവരത്തിന്‍റെ അടിസ്ഥാനത്തിൽ നടത്തിയ പരിശോധനയിൽ പ്രതികൾ പിടിയിലാവുകയായിരുന്നു. ബാഗിലാക്കി എത്തിച്ച കഞ്ചാവുമായി കളമശ്ശേരി പരിസരത്ത് ചില്ലറ വിൽപ്പന നടത്താൻ എത്തിയതാണ് ഇവരെന്നാണ് എക്സൈസ് പറയുന്നത്. എറണാകുളം എക്സൈസ് റേഞ്ച് ഇൻസ്പെക്ടർ അഭിരാജ്.ആർ ന്റെ നേതൃത്വത്തിലാണ് പ്രതികളെ പിടികൂടിയത്. എക്സൈസ് സംഘത്തിൽ സിവില്‍ എക്സൈസ് ഓഫീസർമാരായ അമല്‍ദേവ്, ജിബിനാസ്.വി.എം, പ്രവീണ്‍ കുമാര്‍, ജിഷ്ണു മനോജ്‌, സിവിൽ എക്സൈസ് ഓഫീസർ ഡ്രൈവർ പ്രവീൺ.പി.സി എന്നിവരുമുണ്ടായിരുന്നു.