അഹമ്മദാബാദില്‍ തകര്‍ന്ന എയര്‍ ഇന്ത്യ ഡ്രീം ലൈനറിന്റെ ബ്ലാക്ക് ബോക്സുകള്ക്ക് തകരാറുണ്ടായോ? വിശകലനം ചെയ്യാന്‍ അമേരിക്കയിലേക്ക് അയയ്‌ക്കേണ്ടി വരുമോ? വിമാന ഇന്ധനം കത്തിയപ്പോഴുണ്ടായ ചൂട് ഏകദേശം ആയിരം ഡിഗ്രി; 1100 ഡിഗ്രീസെന്റിഗ്രേഡ് ചൂടില്‍ കിടന്നാലും വിവരങ്ങള്‍ നഷ്ടമാകില്ല: ജേക്കബ് കെ ഫിലിപ്പിന്റെ കുറിപ്പ്
അഹമ്മദാബാദില്‍ തകര്‍ന്ന എയര്‍ ഇന്ത്യ ഡ്രീം ലൈനറിന്റെ ബ്ലാക്ക് ബോക്സുകള്ക്ക് തകരാറുണ്ടായോ?
കൊച്ചി: അഹമ്മദാബാദില്‍ തകര്‍ന്ന എയര്‍ ഇന്ത്യ ഡ്രീംലൈനറിനോ, എഞ്ചിനുകള്‍ക്കോ പറന്നുയരുന്നതിന് മുമ്പ് പ്രശ്‌നങ്ങള്‍ ഒന്നും ഉണ്ടായിരുന്നില്ലെന്ന് എയര്‍ ഇന്ത്യ സി ഇ ഒ ക്യാംപ്‌ബെല്‍ വില്‍സണ്‍ വ്യാഴാഴ്ച വ്യക്തമാക്കിയിരുന്നു. അതേസമയം തന്നെ വിമാനത്തിന്റെ ബ്ലാക്ബോക്സുകള്ക്ക് തകരാറുളളതിനാല്‍ വിശകലനത്തിനായി യുഎസിലേക്ക് അയയ്ക്കുന്നുവെന്ന വാര്‍ത്ത വന്നു. എന്നാല്‍, ഡ്രീം ലൈനറിന്റെ ബ്ലാക്ബോക്സുകള്ക്ക് കേടുപാട് വന്നിരിക്കാന്‍ സാധ്യതയില്ല എന്നാണ് വ്യോമയാന വിദഗ്ധനായ ജേക്കബ് കെ ഫിലിപ്പ് വിലയിരുത്തുന്നത്. അദ്ദേഹം തന്റെ പോസ്റ്റില്‍ നിരത്തുന്ന കാരണങ്ങള്‍ ഇങ്ങനെ:
ജേക്കബ് കെ ഫിലിപ്പിന്റെ പോസ്റ്റ്
അഹമ്മദാബാദില്‍ തകര്‍ന്ന എയര്‍ ഇന്ത്യ ഡ്രീംലൈനര്‍ വിമാനത്തിന്റെ ബ്ലാക് ബോക്സുകള്ക്ക് കേടുപാടുകളുള്ളതിനാല്‍ വിശകലനം ചെയ്യാന്‍ അമേരിക്കയിലേക്ക് അയയ്ക്കുമെന്ന ആദ്യ മാധ്യമ റിപ്പോര്‍ട്ടകളും, അങ്ങനെയൊന്നും ഇതേവരെ തീരുമാനിച്ചിട്ടില്ലെന്ന വ്യോമയാന മന്ത്രാലയത്തിന്റെ വിശദീകരണവും ഇന്നുതന്നെയാണ് കണ്ടത്.
വാസ്തവം എന്തായാലും കോക്പിറ്റ് വോയ്സ് റിക്കോര്‍ഡര്‍ എന്ന സിവിആറും ഡിജിറ്റല്‍ ഫ്ളൈറ്റ് ഡാറ്റാ റിക്കോര്‍ഡര്‍ എന്ന ഡിഎഫ്ഡിആറും പൂര്‍ണമായി വിശകലനം ചെയ്യാന്‍ സര്‍വസജ്ജമായ സംവിധാനം ഡല്‍ഹിയിലെ എയര്‍ക്രാഫ്റ്റ് ആക്സിഡന്റ് ഇന്‍വെസ്റ്റിഗേഷന്‍ ബ്യൂറോയിലുണ്ട് എന്നതാണ് വസ്തുത.
അഞ്ചുകൊല്ലം മുമ്പ് കോഴിക്കോട് തകര്‍ന്ന എയര്‍ ഇന്ത്യ എക്സ്പ്രസ് വിമാനത്തിന്റെ രണ്ടു ബ്ലാക്ബോക്സിലെ വിവരങ്ങളും ശേഖരിച്ചത് ഇവിടെയായിരുന്നു. അതിനും പത്തുകൊല്ലം മുമ്പ് മംഗലാപുരത്ത് അപകടത്തില്‍പ്പെട്ട എയര്‍ ഇന്ത്യ എക്സ്പ്രസ് വിമാനത്തിന്റെ സിവിആറും ഡിഎഫ്ഡിആറും പക്ഷേ അമേരിക്കയിലേക്ക് അയയ്ക്കുകയായിരുന്നു. മേല്‍പ്പറഞ്ഞ എഎഐബി ലാബ് മാത്രമല്ല, എഎഐബി എന്ന സ്ഥാപനം പോലും അന്നു നിലവിലുണ്ടായിരുന്നില്ല എന്നതാണ് കാരണം.
ഇനി, ബ്ലാക്ബോക്സുകള്ക്ക് സാരമായ തകരാറുണ്ടായിട്ടുണ്ടെന്നും അതിനാലാണ് പുറത്തേക്ക് അയയ്ക്കുന്നതെന്നുമുള്ള വാര്‍ത്തയും ശരിയാകാനിടയില്ല. ഒരു മണിക്കൂര്‍ നേരം 1100 ഡിഗ്രീസെന്റിഗ്രേഡ് ചൂടില്‍ കിടന്നാലും ഉള്ളിലെ വിവരങ്ങള്‍ നഷ്ടപെടാത്ത മട്ടിലുള്ള പുറംചട്ടയാണ് ഈ പെട്ടികള്‍ക്ക്. അഹമ്മദാബാദ് അപകടത്തില്‍ വിമാന ഇന്ധനം കത്തിയപ്പോഴുണ്ടായ ചൂട് ഏകദേശം ആയിരം ഡിഗ്രിയായിരുന്നു എന്നാണ് കണക്കാക്കപ്പെട്ടത്.
3400ജി, 6.5 മില്ലിസെക്കന്‍ഡുനേരം- ഇതാണ് ഈ പെട്ടികള്‍ക്ക് സഹിക്കാനാവുന്ന ആഘാതം. ജി എന്നാല്‍ ഭൂഗുരുത്വാകര്‍ഷണം മൂലമുള്ള പ്രവേഗം. ഒരു കിലോഗ്രാം ഭാരമുള്ള ഒരു വസ്തു, മണിക്കൂറില്‍ 780 കിലോമീറ്റര്‍ വേഗത്തില്‍ വന്നിടിക്കുമ്പോഴുള്ള ആഘാതമെന്നു പറയാം. ഇടിക്കുന്നത് 6.5 മില്ലിസെക്കന്‍ഡു നേരത്തേക്കും.
അഹമ്മദാബാദിലെ ഹോസ്റ്റല്‍ കെട്ടിടത്തിലേക്കു ഇടിച്ചിറങ്ങുന്ന നേരം വിമാനത്തിന്റെ വേഗം മണിക്കൂറില്‍ 200-300 കിലോമീറ്ററായിരുന്നിരിക്കാനാണ് സാധ്യത. വിമാനത്തിന്റെ വാലറ്റത്ത് ഉള്ളിലായി ഇരുന്ന ബ്ലാക്ബോക്സുകളുടെ മേല്‍ അന്നേരമുണ്ടാകുന്ന ഇടിയുടെ ആഘാതം മേല്‍പ്പറഞ്ഞ, ഒരു കിലോ-മണിക്കൂറില്‍ 780 കിലോമീറ്റര്‍ വേഗത്തില്‍ എന്നതിനേക്കാള്‍ വളരെ കുറവായിരുന്നിരിക്കുമെന്ന് വ്യക്തം.
അപകട ദൃശ്യങ്ങളില്‍, ഏറ്റവും കൂടുതല്‍ ഷെയര്‍ ചെയ്യപ്പെട്ട താഴെക്കൊടുത്തിരിക്കുന്ന പടം നോക്കുക. വിമാനത്തിന്റെ വാലറ്റമാണ് കാര്യമായ കേടൊന്നുമില്ലാതെ ആ തള്ളി നില്‍ക്കുന്നത്. അതിനു തൊട്ടു സമീപത്തായായിരുന്നു ബ്ലാക്ക്ബോക്സുകളുടെ സ്ഥാനം. രണ്ടാമത്തെ പടവും നോക്കുക.
കറുത്തപെട്ടികളെന്നു വിളിക്കുന്ന ഈ ഓറഞ്ചുപെട്ടികള്‍ക്ക്, ഇവിടുത്തെ പരിശോധനയ്ക്കു വഴങ്ങാതിരിക്കത്തക്കവണ്ണമുള്ള കേടുപാടണ്ടായിരിക്കാനുള്ള സാധ്യത കുറവു തന്നെയാണ്. അപകടം നടക്കുന്ന നിമിഷം വരെയുള്ള അവസാനത്തെ രണ്ടു മണിക്കൂര്‍ നേരത്ത് കോക്പിറ്റില്‍ പൈലറ്റുമാരുടെ സംസാരമുള്‍പ്പെടെയുള്ള എല്ലാ ശബ്ദങ്ങളുമാണ് സിവിആറിലുണ്ടാവുക. കോക്പിറ്റ് അലാമുകളും മറ്റ് ശബ്ദങ്ങളുമെല്ലാം പിടിച്ചെടുക്കും.
2021 ലെ ഐസിഎഒ നിബന്ധനയനുസരിച്ച് അത് 25 മണിക്കൂര്‍ വേണമെന്നാണ്. എന്നാല്‍ പതിനൊന്നു കൊല്ലം പഴക്കമുണ്ടായിരുന്ന ഈ വിമാനത്തില്‍ ആ നിബന്ധന പാലിക്കുന്ന സിവിആര്‍ ഉണ്ടായിരിക്കാനിടയില്ല. എന്നാല്‍ ഡിഎഫ്ഡിആറിന്റെ റിക്കോര്‍ഡിങ്ങുകളുടെ ദൈര്‍ഘം 25 മണിക്കൂറും ഉണ്ടാകും. വിമാനത്തിന്റെ വേഗം, ഉയരം, പറക്കുന്ന ദിശ, എന്‍ജിന്റെ ചൂടും കറക്കവും എന്നു തുടങ്ങി പറക്കലിനെ ബാധിക്കുന്ന എല്ലാറ്റിന്റെയും തല്‍സമയ വിവരങ്ങള്‍ ഡിജിറ്റലായി രേഖപ്പെടുത്തി വയ്ക്കുകയാണ് ഈ റിക്കോര്‍ഡര്‍. സിവിആറിനേക്കാള്‍ ഇത് വിലപ്പെട്ട രേഖയാകുന്നതും അതുകൊണ്ടുതന്നെ.
ഇനി, ഇടിയില്‍ കേടുണ്ടായി വിവരങ്ങള്‍ ബ്ലാക്ക്ബോക്സില്‍ നിന്നെടുക്കാനാവാതിരുന്ന സംഭവങ്ങളുണ്ടോ എന്നു ചോദിച്ചാല്‍, കുറേയുണ്ട് എന്നു തന്നെയാണുത്തരം. 998ലെ സ്വിസ് എയര്‍ ഫ്ളൈറ്റ് 111, 1996 ലെ ട്രാന്‍സ്വേള്‍ഡ് എയര്‍ലൈന്‍സ് ഫ്ളൈറ്റ് 800, 2002 ലെ ചൈന എയര്‍ലൈന്‍സ് ഫ്ളൈറ്റ് 611, 1999 ലെ ഈജിപ്ത് എയര്‍ ഫ്ളൈറ്റ് 990, 1991ലെ നൈജീരിയ എയര്‍വേയ്സ് ഫ്ളൈറ്റ് 2120 എന്നീ അപകടങ്ങള്‍ ബ്ലാക്ക്ബോക്സുകള്‍ പൂര്‍ണമായോ ഭാഗികമായോ കേടാക്കിയവ ആയിരുന്നു.