പാര്ക്ക് ചെയ്യുന്നതിനിടെ കാര് നിയന്ത്രണം വിട്ടു; ബേക്കറിയിലെ സെക്യൂരിറ്റി ജീവനക്കാരനെ ഇടിച്ചു വീഴ്ത്തി; ഗുരുതര പരുക്കേറ്റത് തിരുവല്ല കെആര് ബേക്കേഴ്സിലെ സെക്യൂരിറ്റി ജീവനക്കാരന്
പാര്ക്ക് ചെയ്യുന്നതിനിടെ കാര് നിയന്ത്രണം വിട്ടു
തിരുവല്ല: പാര്ക്ക് ചെയ്യുന്നതിനിടെ നിയന്ത്രണം നഷ്ടപ്പെട്ട കാര് തിരുവല്ല നഗരമധ്യത്തില് പ്രവര്ത്തിക്കുന്ന ബേക്കറിയിലെ സെക്യൂരിറ്റി ജീവനക്കാരന്റെ മേല് പാഞ്ഞു കയറി. ടികെ റോഡില് പ്രവര്ത്തിക്കുന്ന കെ ആര് ബേക്കേഴ്സിലെ സെക്യൂരിറ്റി ജീവനക്കാരന് മാന്നാര് കുട്ടമ്പേരൂര് കമ്മട്ടില് കിഴക്കേതില് വീട്ടില് 71 വയസുള്ള വിജയാനന്ദനാണ് പരുക്കേറ്റത്. ചൊവ്വാഴ്ച ഉച്ചയ്ക്ക് രണ്ടരയോടെ ആയിരുന്നു സംഭവം.
മുത്തൂര് സ്വദേശിയായ മാത്യു ഓടിച്ചിരുന്ന ബ്രസ കാര് ആണ് അപകടമുണ്ടാക്കിയത്. വിജയാനന്ദന് കാര് പാര്ക്ക് ചെയ്യുന്നതിന് സഹായിക്കുന്നതിനിടെയാണ് സംഭവം. നിയന്ത്രണം നഷ്ടപ്പെട്ട കാര് വിജയനന്ദന് നേരെ പാഞ്ഞു കയറുകയായിരുന്നു. വിജയാനന്ദന്റെ ശരീരത്തിലൂടെ കയറിയിറങ്ങിയ കാര് സമീപത്ത് പാര്ക്ക് ചെയ്തിരുന്ന മറ്റൊരു കാറില് ഇടിച്ച് നില്ക്കുകയായിരുന്നു. വാരിയെല്ലിന് അടക്കം ഗുരുതര പരുക്കേറ്റ വിജയനന്ദനെ തിരുവല്ല പുഷ്പഗിരി മെഡിക്കല് കോളേജ് ആശുപത്രിയില് പ്രവേശിപ്പിച്ചു. സംഭവത്തില് വാഹനം ഓടിച്ചിരുന്ന മാത്യുവിനെതിരേ തിരുവല്ല പോലീസ് കേസെടുത്തു.