പെട്ടെന്ന് പോകൂ..എന്ന് അലറിവിളിക്കുന്നവർ; ചുറ്റും ഭയന്ന് നിലവിളിക്കുന്ന ഒരുകൂട്ടം വിദ്യാർത്ഥികൾ; ചിലർ പടിക്കെട്ടിൽ നിൽക്കുന്നത് ഒരുവിധം ബാലൻസ് ചെയ്ത്; വീണുപോകാതെ പരസ്പ്പരം എങ്ങനെയൊകെയോ...പിടിച്ചു നിൽക്കുന്ന കാഴ്ച; എസ്കലേറ്ററിന്റെ അസാധാരണ പ്രവർത്തനത്തിൽ സംഭവിച്ചത്

ധാക്ക: ബംഗ്ലാദേശിലെ ധാക്കയിലുള്ള BRAC യൂണിവേഴ്സിറ്റിയിൽ നിന്ന് പുറത്തുവന്ന ഒരു ഞെട്ടിക്കുന്ന വീഡിയോ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. എസ്‌കലേറ്റർ അപ്രതീക്ഷിതമായി അതിവേഗത്തിൽ താഴേക്ക് കുതിച്ചതിനെ തുടർന്ന് വിദ്യാർത്ഥികൾ പരിഭ്രാന്തരായി നിലവിളിക്കുകയും ബാലൻസ് തെറ്റി വീഴാതിരിക്കാൻ പാടുപെടുകയും ചെയ്യുന്ന ദൃശ്യങ്ങളാണ് വീഡിയോയിലുള്ളത്.

വെറും 16 സെക്കൻഡ് ദൈർഘ്യമുള്ള ഈ വീഡിയോ, എക്‌സ് (മുമ്പ് ട്വിറ്റർ) പോലുള്ള പ്ലാറ്റ്‌ഫോമുകളിൽ വളരെ വേഗമാണ് പ്രചരിച്ചത്. വീഡിയോ തുടങ്ങുമ്പോൾ, വിദ്യാർത്ഥികൾ സാധാരണ വേഗതയിൽ എസ്‌കലേറ്ററിൽ കാൽവെച്ച് കയറുന്നതായി കാണാം. എന്നാൽ നിമിഷങ്ങൾക്കകം, എസ്‌കലേറ്ററിന്റെ ഒരു ഭാഗം പതിവിലും വളരെ വേഗത്തിൽ, നിയന്ത്രണം നഷ്ടപ്പെട്ടപോലെ താഴേക്ക് കുതിക്കുകയായിരുന്നു. എന്നാൽ മറുഭാഗം സാധാരണ വേഗതയിൽ തന്നെ നീങ്ങുന്നതും വീഡിയോയിൽ വ്യക്തമാണ്.

പെട്ടെന്നുണ്ടായ വേഗമാറ്റത്തിൽ വിദ്യാർത്ഥികളെല്ലാം പരിഭ്രാന്തരായി, നിലവിളിക്കാൻ തുടങ്ങി. ബാലൻസ് നഷ്ടപ്പെട്ട് വീഴാതിരിക്കാൻ അവർ പരസ്പരം പിടിക്കുകയും എസ്‌കലേറ്ററിന്റെ കൈവരികളിൽ മുറുകെ പിടിക്കുകയും ചെയ്തു. എത്രയും വേഗം അടുത്ത നിലയിൽ എത്താനായി 'വേഗം നീങ്ങൂ' എന്ന് പറഞ്ഞ് ബഹളം വെക്കുന്നതും വീഡിയോയിൽ കേൾക്കാം. ഈ അപ്രതീക്ഷിത സംഭവം വിദ്യാർത്ഥികളിൽ ഉണ്ടാക്കിയ പേടിയും പരിഭ്രമവും വീഡിയോയിൽ വ്യക്തമാണ്. വലിയ അപകടത്തിലേക്ക് വഴിതെളിക്കാമായിരുന്ന ഈ സാഹചര്യത്തിൽ, വിദ്യാർത്ഥികളെല്ലാം ഭാഗ്യവശാൽ സുരക്ഷിതമായി താഴെയെത്തി.

വീഡിയോ വ്യാപകമായി ശ്രദ്ധിക്കപ്പെട്ടതോടെ നിരവധി പേരാണ് കമന്റുകളുമായി എത്തിയത്. കുറച്ച് ദിവസങ്ങൾക്ക് മുമ്പ് റോമിലും സമാനമായ ഒരു എസ്‌കലേറ്റർ അപകടം ഉണ്ടായെന്നും അതിൽ ആളുകൾക്ക് പരിക്കേറ്റതായും ഒരു ഉപയോക്താവ് കമന്റ് ചെയ്തു.

ഇത്തരം സംഭവങ്ങൾ ആവർത്തിക്കാതിരിക്കാൻ അധികൃതർ ശ്രദ്ധിക്കണമെന്നും, ഇത് വലിയ അപകടത്തിന് കാരണമാകുമായിരുന്നെന്നും മറ്റു പലരും അഭിപ്രായപ്പെട്ടു. സാങ്കേതിക തകരാറുകൾ കാരണം എസ്‌കലേറ്ററുകൾക്ക് വേഗത കൂടുന്നത് യാത്രക്കാരുടെ സുരക്ഷയ്ക്ക് ഗുരുതരമായ ഭീഷണിയാണ് ഉയർത്തുന്നത്. അതിനാൽ, പൊതുഇടങ്ങളിലെ ഇത്തരം സംവിധാനങ്ങളുടെ കൃത്യമായ പരിശോധനയും പരിപാലനവും അത്യന്താപേക്ഷിതമാണെന്ന് ഈ സംഭവം ഓർമ്മിപ്പിക്കുന്നു.