ഇനി വിൽക്കുന്ന എല്ലാ സ്മാർട്ട്ഫോണുകളിലും ഈ 'ആപ്പ്' നിർബന്ധമാക്കണമെന്ന് ഉറക്കെപ്പറഞ്ഞ സർക്കാർ; ഡിലീറ്റ് ചെയ്യാൻ സാധിക്കാത്ത വിധം പ്രീ-ഇന്സ്റ്റാള് ചെയ്യണമെന്നും ഉത്തരവ്; ഇതോടെ ആശങ്കയിലായ ജനങ്ങളും; ഇത് സൈബർ സുരക്ഷയുടെ ഭാഗമെന്ന് അധികൃതർ; സത്യത്തിൽ എന്താണ് ‘സഞ്ചാർ സാഥി’?
ഇന്ത്യയിൽ വിൽക്കുന്ന എല്ലാ സ്മാർട്ട്ഫോണുകളിലും സർക്കാർ ഉടമസ്ഥതയിലുള്ള 'സഞ്ചാർ സാഥി' എന്ന സൈബർ സുരക്ഷാ ആപ്പ് പ്രീ-ഇൻസ്റ്റാൾ ചെയ്യണമെന്ന് കേന്ദ്ര സർക്കാർ വൻകിട ടെക് കമ്പനികൾക്ക് നിർദ്ദേശം നൽകി. കളഞ്ഞുപോയതോ മോഷ്ടിക്കപ്പെട്ടതോ ആയ ഫോണുകൾ ബ്ലോക്ക് ചെയ്യാനും വ്യാജ കണക്ഷനുകൾ തിരിച്ചറിയാനും സഹായിക്കുന്ന ഒരു പൗരകേന്ദ്രീകൃത സുരക്ഷാ ടൂളാണ് ഈ ആപ്പ് എന്നാണ് സർക്കാർ വിശദീകരണം.
എന്നാൽ, ഈ നീക്കം വലിയ രാഷ്ട്രീയ പ്രതിഷേധത്തിനും നിരീക്ഷണ ഭീഷണിക്കും കാരണമായി. ഇത് പൗരന്മാരുടെ സ്വകാര്യതയിലേക്കുള്ള കടന്നുകയറ്റമാണെന്നും, രാജ്യത്തെ 730 ദശലക്ഷം സ്മാർട്ട്ഫോണുകളിൽ സർക്കാരിന് നിയന്ത്രണമില്ലാത്ത പ്രവേശനം നേടാനുള്ള 'ചാര ആപ്പ്' ആണിതെന്നും പ്രതിപക്ഷവും ഡിജിറ്റൽ സ്വാതന്ത്ര്യ പ്രവർത്തകരും ആരോപിച്ചു.
സുരക്ഷാ പ്രശ്നങ്ങൾ ചൂണ്ടിക്കാട്ടി ആപ്പിൾ ഉൾപ്പെടെയുള്ള കമ്പനികൾ ഈ ഉത്തരവ് പാലിക്കാൻ വിസമ്മതിക്കുന്നതായി റിപ്പോർട്ടുണ്ട്. അതേസമയം, ഈ ആപ്പ് നീക്കം ചെയ്യാനുള്ള പൂർണ്ണ സ്വാതന്ത്ര്യം ഉപയോക്താക്കൾക്കുണ്ടെന്നും, മറ്റ് ആപ്പുകൾ പോലെ ഡിലീറ്റ് ചെയ്യാമെന്നും കേന്ദ്ര കമ്മ്യൂണിക്കേഷൻസ് മന്ത്രി പ്രതികരിച്ചു. 90 ദിവസത്തിനകം ഉത്തരവ് നടപ്പാക്കാനാണ് കമ്പനികൾക്ക് നൽകിയിട്ടുള്ള നിർദ്ദേശം.
സൈബർ തട്ടിപ്പുകൾ തടയുന്നതിനും മൊബൈൽ സുരക്ഷ ഉറപ്പാക്കുന്നതിനുമായി രാജ്യത്ത് വിൽക്കുന്ന എല്ലാ സ്മാർട്ട്ഫോണുകളിലും സർക്കാർ ഉടമസ്ഥതയിലുള്ള 'സഞ്ചാർ സാഥി' (Sanchar Saathi) എന്ന സുരക്ഷാ ആപ്പ് പ്രീ-ഇൻസ്റ്റാൾ ചെയ്യണമെന്ന് കേന്ദ്ര ടെലികോം മന്ത്രാലയം നിർമ്മാതാക്കൾക്ക് കർശന നിർദ്ദേശം നൽകിയത് വലിയ രാഷ്ട്രീയ വിവാദങ്ങൾക്കും സ്വകാര്യത സംബന്ധിച്ച ആശങ്കകൾക്കും വഴിവെച്ചിരിക്കുകയാണ്. 90 ദിവസത്തിനകം പുതിയ ഫോണുകളിലും നിലവിൽ ഉപയോഗിക്കുന്ന ഫോണുകളിലെ സോഫ്റ്റ്വെയർ അപ്ഡേറ്റുകളിലൂടെയും ഈ ആപ്ലിക്കേഷൻ നിർബന്ധമാക്കാനാണ് കേന്ദ്രസർക്കാർ ഉത്തരവ്.
എന്താണ് 'സഞ്ചാർ സാഥി?
സൈബർ തട്ടിപ്പുകൾ തടയുന്നതിനും ടെലികോം സുരക്ഷ ശക്തിപ്പെടുത്തുന്നതിനും വേണ്ടി രൂപകൽപന ചെയ്ത കേന്ദ്രീകൃത സംരംഭമാണ് സഞ്ചാർ സാഥി. തട്ടിപ്പ് കോളുകൾ റിപ്പോർട്ട് ചെയ്യാനും നഷ്ടപ്പെട്ട ഫോണുകൾ ബ്ലോക്ക് ചെയ്യാനുമടക്കമുള്ള സേവനങ്ങൾ സഞ്ചാർ സാഥിയിൽ ലഭ്യമാണ്. ഒരു ഫോൺ വാങ്ങുന്നതിനുമുമ്പ് അതിന്റെ ഐഎംഇഐ തടഞ്ഞതോ കരിമ്പട്ടികയിൽ പെടുത്തിയതോ ആണോയെന്ന് പരിശോധിക്കാൻ സഞ്ചാർ സാഥി ഉപയോക്താക്കളെ സഹായിക്കും. ടെലികോം സൈബർ സെക്യൂരിറ്റി (ടിസിഎസ്) നിയമങ്ങളുടെ പിന്തുണയോടെയാണ് ഈ സംരംഭം.
സൈബർ സുരക്ഷ ലക്ഷ്യം:
വർധിച്ചു വരുന്ന സൈബർ തട്ടിപ്പുകൾ, സിം കാർഡ് ദുരുപയോഗം, മോഷണം പോയ ഫോണുകൾ ഉപയോഗിച്ച് നടക്കുന്ന കുറ്റകൃത്യങ്ങൾ എന്നിവ തടയുക എന്നതാണ് സഞ്ചാർ സാഥി ആപ്പിലൂടെ സർക്കാർ ലക്ഷ്യമിടുന്നത്. ഈ ആപ്പിലെ പ്രധാനപ്പെട്ട ചില സവിശേഷതകൾ ഇവയാണ്:
കളഞ്ഞ ഫോൺ കണ്ടെത്തൽ (CEIR): നഷ്ടപ്പെട്ടതോ മോഷ്ടിക്കപ്പെട്ടതോ ആയ മൊബൈൽ ഫോണുകൾ ബ്ലോക്ക് ചെയ്യാനും ട്രാക്ക് ചെയ്യാനും ഈ പോർട്ടൽ മുഖേന ഉപയോക്താക്കൾക്ക് സാധിക്കും.
കണക്ഷൻ പരിശോധന (TAFCOP): ഒരു ഉപയോക്താവിന്റെ പേരിൽ എത്ര മൊബൈൽ കണക്ഷനുകൾ രജിസ്റ്റർ ചെയ്തിട്ടുണ്ട് എന്ന് പരിശോധിക്കാൻ സഹായിക്കും. തട്ടിപ്പിനായി എടുത്ത വ്യാജ കണക്ഷനുകൾ തിരിച്ചറിയാനും അവ വിച്ഛേദിക്കാനും ഇത് ഉപകരിക്കും.
IMEI പരിശോധന: ഒരു ഫോൺ വാങ്ങുന്നതിന് മുമ്പ് അതിന്റെ IMEI നമ്പർ കരിമ്പട്ടികയിൽ ഉൾപ്പെട്ടതോ മോഷണം പോയതോ ആണോയെന്ന് പരിശോധിച്ച് ഉറപ്പുവരുത്താൻ ഉപയോക്താക്കൾക്ക് കഴിയും.
തട്ടിപ്പ് റിപ്പോർട്ടിങ്: സംശയാസ്പദമായ തട്ടിപ്പ് കോളുകളും സന്ദേശങ്ങളും റിപ്പോർട്ട് ചെയ്യാനുള്ള സംവിധാനവും ഇതിൽ ഉൾപ്പെടുത്തിയിട്ടുണ്ട്.
'നിരീക്ഷണ ആപ്പ്' എന്ന ആരോപണവും പ്രതിഷേധവും:
സൈബർ സുരക്ഷാ നടപടി എന്ന പേരിൽ സർക്കാർ ഈ നീക്കം നടത്തുമ്പോൾ, പ്രതിപക്ഷവും ഡിജിറ്റൽ സ്വാതന്ത്ര്യത്തിനായി പ്രവർത്തിക്കുന്ന ആക്ടിവിസ്റ്റുകളും കടുത്ത പ്രതിഷേധമാണ് ഉയർത്തുന്നത്. രാജ്യത്തെ 730 ദശലക്ഷം സ്മാർട്ട്ഫോൺ ഉപയോക്താക്കളുടെ സ്വകാര്യതയിലേക്ക് കേന്ദ്രം കടന്നുകയറാൻ ശ്രമിക്കുകയാണെന്നും, ഓരോ പൗരനെയും നിരീക്ഷിക്കാനുള്ള ഒരു ഉപകരണമായാണ് സർക്കാർ ഈ ആപ്പിനെ ഉപയോഗിക്കാൻ പോകുന്നതെന്നുമാണ് ഇവരുടെ പ്രധാന ആരോപണം.
"ഇതൊരു ഏകാധിപത്യപരമായ നടപടിയാണ്. പൗരന്മാരെ നിരീക്ഷിക്കാനുള്ള 'ചാര ആപ്പ്' (Snooping App) ആണിത്," എന്ന് കോൺഗ്രസ് നേതാക്കൾ ഉൾപ്പെടെയുള്ളവർ വിമർശിച്ചു. ഭരണഘടനാപരമായ സ്വകാര്യതാവകാശത്തെ ലംഘിക്കുന്ന നടപടിയാണ് ഇതെന്നും, ഈ ഉത്തരവ് ഉടൻ പിൻവലിക്കണമെന്നും ഡിജിറ്റൽ അവകാശ ഗ്രൂപ്പുകൾ ആവശ്യപ്പെട്ടു.
ആപ്പിളിന്റെ പ്രതിരോധവും കേന്ദ്രത്തിന്റെ വിശദീകരണവും:
സ്വകാര്യതയ്ക്കും സുരക്ഷയ്ക്കും വലിയ പ്രാധാന്യം നൽകുന്ന ആപ്പിൾ ഉൾപ്പെടെയുള്ള വൻകിട ടെക് കമ്പനികൾ സുരക്ഷാ പ്രോട്ടോക്കോളുകളെ ബാധിക്കുമെന്ന കാരണം ചൂണ്ടിക്കാട്ടി ഈ ഉത്തരവിനോട് സഹകരിക്കാൻ വിസമ്മതിക്കുന്നതായി റിപ്പോർട്ടുകളുണ്ട്.
പ്രതിഷേധങ്ങൾ ശക്തമായ സാഹചര്യത്തിൽ കേന്ദ്ര കമ്മ്യൂണിക്കേഷൻസ് മന്ത്രി ജ്യോതിരാദിത്യ സിന്ധ്യ വിഷയത്തിൽ വ്യക്തത വരുത്തി. "ഈ ആപ്പ് മൊബൈലിൽ ഉപയോഗിക്കണമെന്ന് നിർബന്ധമില്ല. ഇത് സുരക്ഷയ്ക്കു വേണ്ടിയാണ് കൊണ്ടുവരുന്നത്.
ആവശ്യമില്ലാത്തവർക്ക് മറ്റ് ആപ്പുകൾ പോലെ ഇത് ഡിലീറ്റ് ചെയ്യാൻ സാധിക്കും," എന്ന് മന്ത്രി വ്യക്തമാക്കി. ആപ്പ് ഡിലീറ്റ് ചെയ്യാനോ ഡിസേബിൾ ചെയ്യാനോ കഴിയാത്ത തരത്തിലായിരിക്കും പ്രീ-ഇൻസ്റ്റാൾ ചെയ്യുക എന്ന ആദ്യ റിപ്പോർട്ടുകൾ ഇതോടെ തെറ്റാണെന്ന് തെളിഞ്ഞു. എങ്കിലും, കേന്ദ്ര സർക്കാരും പൗരന്മാരും തമ്മിലുള്ള വിശ്വാസ്യതയെ ബാധിക്കുന്ന ഈ നീക്കം രാജ്യത്ത് വലിയ സംവാദങ്ങൾക്ക് തുടക്കം കുറിച്ചിരിക്കുകയാണ്.