റോഡ് അപകടം അടിയന്തര സാഹചര്യമെന്നും എംപാനല്‍ഡ് അല്ലാത്ത ആശുപ്രതികളിലെ ചികിത്സയ്ക്ക് റീഇമ്പേഴ്‌സ്‌മെന്റ് അനുവദിക്കുമെന്നും ധാരണാപത്രത്തില്‍; അപകടം ഉണ്ടായപ്പോള്‍ അത്യാഹിത ചികിത്സ അല്ല എന്ന ന്യായത്തില്‍ മെഡിസെപ്പ് ക്ലെയിം നിഷേധിച്ചു; ഉപഭോക്താവിന് 1.2 ലക്ഷം രൂപ നഷ്ടപരിഹാരം നല്‍കണം
ഉപഭോക്താവിന് 1.2 ലക്ഷം രൂപ നഷ്ടപരിഹാരം നല്‍കണം
കൊച്ചി: അത്യാഹിത ചികിത്സ അല്ല എന്ന കാരണം പറഞ്ഞ് റോഡ് ആക്സിഡന്റില് ചികിത്സ നേടിയ ഉപഭോക്താവിന്റെ ക്ലെയിം നിരസിച്ച നടപടി അധാര്‍മിക വ്യാപാര രീതിയും സേവനത്തിലെ ന്യൂനതയും ആണെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി.എറണാകുളം പല്ലാരിമംഗലം സ്വദേശി കെ എം മുഹിയുദ്ധീന്‍, ഓറിയന്റല്‍ ഇന്‍ഷുറന്‍സ് കമ്പനിക്കും മെഡിസെപ്പിനും എതിരെ സമര്‍പ്പിച്ച പരാതിയിലാണ് ഉത്തരവ്.
2023 ജനുവരി മാസം പരാതിക്കാരന് റോഡ് ആക്‌സിഡന്റ് സംഭവിക്കുകയുണ്ടായി. ജീപ്പുമായി കൂട്ടി ഇടിച്ചുണ്ടായ ആക്സിഡന്റില് പരാതിക്കാരന്റെ ഇടത് കാലിന് ഗുരുതരമായ പരിക്കുകയുണ്ടായി. ഉടന്‍തന്നെ അടുത്തുള്ള കോലഞ്ചേരി മെഡിക്കല്‍ കോളേജില്‍ പരാതിക്കാരനെ പ്രവേശിപ്പിക്കുകയും അടിയന്തര ചികിത്സയ്ക്ക് വിധേയമാക്കുകയും ചെയ്തു. empannelled hospital അല്ലാത്തതിനാല്‍ ഡിസ്ചാര്‍ജ് ആയശേഷം ചികിത്സക്ക് ചെലവായ 94,276/- രൂപ ലഭിക്കുന്നതിന് റീ ഇമ്പേഴ്‌സ്‌മെന്റ് ന് മെഡിസെപ്പ് സേവന ദാതാക്കളായ ഓറിയന്റല്‍ ഇന്‍ഷുറന്‍സ് കമ്പനിയെ സമീപിച്ചു. എന്നാല്‍ അടിയന്തര സാഹചര്യങ്ങളില്‍ അല്ലാതെ empanneled ചെയ്യാത്ത ഹോസ്പിറ്റലുകളിലെ ചികിത്സക്ക് reimbursment അനുവദിക്കാനാവില്ല എന്ന കാരണം പറഞ്ഞ് ഇന്‍ഷുറന്‍സ് കമ്പനി ക്ലെയിം നിരസിക്കുകയാണുണ്ടായത്.
ഈ സാഹചര്യത്തിലാണ് മെഡിസെപ് പോളിസി ഉടമയായ പരാതിക്കാരന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതിയെ സമീപിച്ചത്. എന്നാല്‍ പരാതിക്കാരന്റെ ചികിത്സ ഒരു അടിയന്തര സാഹചര്യത്തില്‍ അല്ല എന്നും കൂടാതെ മെഡിസെപ്പിന്റെ പരാതി പരിഹാര സംവിധാനത്തെ ഉപഭോക്താവ് സമീപിച്ചില്ല എന്നുമുള്ള നിലപാടാണ് ഇന്‍ഷുറന്‍സ് കമ്പനി കോടതിയില്‍ സ്വീകരിച്ചത്.
27. 06.2022 ല്‍ ഫിനാന്‍സ് ഡിപ്പാര്‍ട്ട്‌മെന്റും ഇന്‍ഷുറന്‍സ് കമ്പനിയും ഒപ്പുവച്ച MoU പ്രകാരം സ്‌ട്രോക്ക്, ഹൃദയാഘാതം, റോഡ് ആക്‌സിഡന്റ് എന്നിവ അടിയന്തര സാഹചര്യമാണ് എന്നും ഈ സാഹചര്യങ്ങളില്‍ empannelled അല്ലാത്ത ഹോസ്പിറ്റലുകളിലെ ചികിത്സക്ക് റീ ഇമ്പേഴ്‌സ്‌മെന്റ് അനുവദിക്കും എന്നും വ്യക്തമാക്കിയിട്ടുഉള്ളത് കോടതി ചൂണ്ടികാട്ടി.
കൂടാതെ ഇന്‍ഷുറന്‍സ് പോളിസികളുടെ terms ആന്‍ഡ് കണ്ടീഷനില്‍ അവ്യക്തമായ എന്തെങ്കിലും നിബന്ധനകള്‍ ഉണ്ടെങ്കില്‍, അത് ഉപഭോക്താവിന് അനുകൂലമായ തരത്തില്‍ വ്യാഖ്യനിക്കണം എന്ന സുപ്രീംകോടതി ഉത്തരവും ഈ വിഷയത്തില്‍ ഉപഭോക്തൃ കോടതി പരിഗണിച്ചു. മെഡിസെപ്പിന്റെ ആഭ്യന്തര പരാതി പരിഹാര സംവിധാനങ്ങള്‍ ( Internal Redressal mechanissam ) ഉപയോഗിക്കാതെ നേരിട്ട് കോടതിയെ സമീപിച്ചതിനാല്‍ പരാതി നിലനില്‍ക്കില്ലെന്ന ഓറിയന്റല്‍ ഇന്‍ഷുറന്‍സിന്റെ വാദം കോടതി തള്ളി. ഉപഭോക്തൃ സംരക്ഷണ നിയമപ്രകാരമുള്ള പരിഹാരങ്ങള്‍ മറ്റ് നിയമങ്ങള്‍ക്ക് പുറമെയാണെന്നും (in addition to other remedies) ഉപഭോക്തൃ കോടതികളുടെ അധികാരപരിധിക്ക് ഇത് തടസ്സമല്ലെന്നും സുപ്രീം കോടതി ഉത്തരവ് ഉദ്ധരിച്ച് കോടതി വ്യക്തമാക്കി.
അര്‍ഹമായ ക്ലെയിമുകള്‍ വൈകുകയോ നിഷേധിക്കപ്പെടുകയോ ചെയ്യുമ്പോള്‍ ഓരോ വ്യക്തിയുടെയും ദൈനംദിന ജീവിതം താളം തെറ്റുന്നുവെന്ന് കോടതി നിരീക്ഷിച്ചു. സാങ്കേതിക കാരണം പറഞ്ഞ് ക്ലെയിം നിരസിക്കുന്നത് നടപടിക്രമങ്ങളിലെ പിഴവുകള്‍ക്കപ്പുറം അവശ്യ സേവനങ്ങളിലുള്ള വിശ്വാസം ഇല്ലാതാക്കും. ഉപഭോക്താക്കള്‍ക്ക് അര്‍ഹമായത് ലഭിക്കാന്‍ കോടതിയെ സമീപിക്കേണ്ട അവസ്ഥ ഒഴിവാക്കാന്‍, ഇന്‍ഷുറന്‍സ് ദാതാക്കള്‍ സഹാനുഭൂതിയോടെയും വ്യക്തമായ കാരണങ്ങളോടെയും സമയബന്ധിതമായും പ്രതികരിക്കണം. ഈ ഉത്തരവ് നഷ്ടപരിഹാരം നല്‍കാന്‍ മാത്രമല്ല, ഉപഭോക്താവിന്റെ ആത്മാഭിമാനവും വിശ്വാസവും പുനഃസ്ഥാപിക്കാന്‍ ഉദ്ദേശിച്ചുള്ളതാണെന്നും ഡി.ബി ബിനു അധ്യക്ഷനും വി. രാമചന്ദ്രന്‍, ടി.എന്‍ ശ്രീവിദ്യ എന്നിവരുടെ ബെഞ്ച് ചൂണ്ടിക്കാട്ടി.
മെഡിക്കല്‍ ഇന്‍ഷുറന്‍സ് പദ്ധതി പ്രകാരമുള്ള അര്‍ഹമായ ക്ലെയിം നിഷേധിച്ചതിനും സേവനത്തിലെ അപര്യാപ്തതയ്ക്കും (Deficiency in Service) അന്യായമായ വ്യാപാര നടപടിക്കും (Unfair Trade Practice) ഓറിയന്റല്‍ ഇന്‍ഷുറന്‍സ് കമ്പനിയും മെഡിസെപ്പും പരാതിക്കാരന് ചികിത്സക്ക് ചിലവായ 94276/- രൂപ 9% പലിശ സഹിതം തിരികെ നല്‍കാനും, കൂടാതെ, മാനസിക ബുദ്ധിമുട്ടിന് നഷ്ടപരിഹാരമായി 20,000/- രൂപയും കോടതി ചിലവായി 5000/- രൂപയും 45 ദിവസത്തിനകം നല്‍കാന്‍ എതിര്‍കക്ഷികള്‍ക്ക് കോടതി ഉത്തരവ് നല്‍കി. പരാതിക്കാരന് വേണ്ടി അഡ്വ. ടോം ജോസഫ് കോടതിയില്‍ ഹാജരായി.