നാല് നിമിഷത്തില്‍ ഓര്‍ത്തെടുത്ത് പറഞ്ഞത് 48 നമ്പറുകള്‍; കേരളത്തിന്റെ ഐക്യു മാന് ഓര്‍മ്മ ശക്തിക്കുള്ള ഗിന്നസ് ലോക റെക്കോര്‍ഡ്; അജി തകര്‍ത്തെറിഞ്ഞത് പാക്കിസ്താനിയുടെ റെക്കോര്‍ഡ്: രാജ്യത്തിന്റെ അഭിമാനമായി കൊല്ലം സ്വദേശി
കേരളത്തിന്റെ ഐക്യു മാന് ഓര്‍മ്മ ശക്തിക്കുള്ള ഗിന്നസ് ലോക റെക്കോര്‍ഡ്
തിരുവനന്തപുരം: കേരളത്തിന്റെ ഐക്യു മാന് എന്നറിയപ്പെടുന്ന അജി ആറിന് ഓര്‍മ്മ ശക്തിക്കുള്ള ഗിന്നസ് ലോക റെക്കോര്‍ഡ്. നാല് നിമിഷം കൊണ്ട് സ്‌ക്രീനില്‍ ഉണ്ടായിരുന്ന 48 നമ്പറുകള്‍ ഓര്‍ത്തെടുത്താണ് കൊല്ലം കുണ്ടറ സ്വദേശിയായ അജി ഗിന്നസ് റെക്കോര്‍ഡ് സ്വന്തമാക്കിയത്. പാക്കിസ്താന്‍ സ്വദേശിയുടെ റെക്കോര്‍ഡ് തകര്‍ത്താണ് അജി ആര്‍ ഗിന്നസില്‍ ഇടംപിടിച്ചത്. 30 നമ്പറുകള്‍ നാല് സെക്കന്റ് കൊണ്ട് ഓര്‍ത്തു പറഞ്ഞ പാകിസ്ഥാന്‍ സ്വദേശിയുടെ ഗിന്നസ് റെക്കോര്‍ഡ് ആണ് അജി തകര്‍ത്തത്.
വിമാനയാത്രക്കിടയില്‍ ആണ് തനിക്കു ഗിന്നസ് റെക്കോര്‍ഡ് ലഭിച്ച ഔദ്യോഗിക വിവരം അജി അറിയുന്നത്. ക്യാപ്റ്റനും, ക്യാബിന്‍ ക്രൂ അംഗങ്ങളും സഹ യാത്രികരും ചേര്‍ന്ന് ആകാശത്തു വെച്ച് അജിയ ആദരിച്ച് സന്തോഷം പങ്കുവെച്ചു. ഷാര്‍ജയില്‍ നടന്ന പുസ്തകോത്സവത്തില്‍ വെച്ച് അറേബ്യന്‍ ബുക്ക് ഓഫ് റെക്കോര്‍ഡ് അജി ഏറ്റു വാങ്ങിയിരുന്നു. ലോറി ഡ്രൈവര്‍ ആയ അച്ഛന്റെയും തൊഴിലുറപ്പ് ജോലിക്കാരിയായ അമ്മയുടെയും രണ്ടാമത്തെ മകനായ അജി, ചെറുപ്പം മുതല്‍ തന്നെ ഗണിത ശാസ്ത്ര കഴിവുകള്‍ വികസിപ്പിക്കാനും ഓര്‍മ്മ ശ്കതി വികസിപ്പിക്കാനുമുള്ള വഴികള്‍ കണ്ടെത്തിയിരുന്നു.
വനംവകുപ്പ് ഉദ്യോഗസ്ഥനായ അജി 33 പിഎസ്സി പരീക്ഷകള്‍ വിജയിക്കുകയും, 2 തവണ യുപിഎസ്സി മെയിന്‍ പാസ്സാവുകയും, അതോടൊപ്പം തന്നെ ഇന്റലിജന്‍സ് ബ്യുറോ, ബാങ്ക് പരീക്ഷകളുടെ ഫൈനല്‍ ലിസ്റ്റില്‍ വരുകയും ചെയ്തിട്ടുണ്ട്്. സ്‌ക്രീനില്‍ തെളിയുന്ന നമ്പറുകള്‍ നിമിഷങ്ങള്‍ കൊണ്ട് ഓര്‍ത്തെടുത്ത്, അത് മുന്നോട്ടും പിന്നോട്ടും പറയാന്‍ അജിക്ക് സാധിക്കും. ന്യൂറോ റിസേര്‍ച്ചിനായുള്ള വിദേശത്തു നിന്നും ലഭിച്ച വിവിധ ഓഫറുകള്‍ നിരസിച്ച അജി, ബാംഗ്ലൂര്‍ നിംഹാന്‍സിനൊപ്പം ചേര്‍ന്ന് റിസര്‍ച് ചെയ്യാനുള്ള അവസരമാണ് തിരഞ്ഞെടുത്തത്.
ഗിന്നസ് ലോക റെക്കോര്‍ഡ്, അറേബ്യന്‍ ബുക്ക് ഓഫ് റെക്കോര്‍ഡ്സ് ഇന്ത്യ ബുക്ക് ഓഫ് റെക്കോര്‍ഡ് തുടങ്ങി നിരവധി അംഗീകാരങ്ങള്‍ അജി സ്വന്തമാക്കിയിട്ടുണ്ട്. വിദ്യാര്‍ത്ഥികളുടെ ഗണിത ശാസ്ത്ര കഴിവുകളും ഓര്‍മ്മ ശക്തി വര്‍ധിപ്പിക്കാനുള്ള കഴിവും വികസിപ്പിക്കുന്നതിനായി തന്റെ ജീവിതം ഉഴിഞ്ഞു വെച്ചിരിക്കുകയാണ് അജി. വനം വകുപ്പില്‍ ഡെപ്യൂട്ടി റേഞ്ച് ഓഫീസര്‍ ആയി ജോലി നോക്കുന്ന അദ്ദേഹം, ഇപ്പോള്‍ കുട്ടികള്‍ക്ക് തന്റെ ഈ വിദ്യ പകര്‍ന്നു കൊടുക്കുന്നതിനായി അഞ്ചു വര്‍ഷത്തേക്ക് അവധിയില്‍ പ്രവേശിച്ചിരിക്കുകയാണ്.