കാര്‍ റിപ്പയര്‍ ഷോപ്പ് നടത്തവേ കല്യാണം കഴിച്ചു; എല്ലാം പച്ചപിടിച്ചുവരുന്നതിനിടെ ഭാര്യക്ക് പറ്റിയ മാരക രോഗം; സ്വന്തം മകളെ പോലും നേരെ കാണാന്‍ കഴിയാത്ത അവസ്ഥ; ഒടുവിൽ താളം തെറ്റിയ ജീവിതത്തെ ഭർത്താവ് തിരിച്ചുപിടിച്ചത് ഇങ്ങനെ
ക്വിങ്ദാവോ: 12 വർഷം മുൻപ് കാഴ്ചശക്തി നഷ്ടപ്പെട്ട ഭാര്യയെ സ്നേഹത്തോടെയും കരുതയോടെയും ചേർത്തുപിടിച്ച് മുന്നോട്ട് പോകുന്ന ഭർത്താവിനെ അഭിനന്ദിച്ച് ചൈനീസ് സാമൂഹിക മാധ്യമങ്ങൾ. ഇത് യഥാർത്ഥ സ്നേഹമാണെന്നും അർപ്പണബോധമുള്ള ഭർത്താവായാൽ ഇങ്ങനെയായിരിക്കുമെന്നും നിരവധി പോസ്റ്റുകൾ സാമൂഹിക മാധ്യമങ്ങളിൽ പ്രചരിക്കുന്നു. ഷാൻഡോങ് പ്രവിശ്യയിലെ ക്വിങ്ദാവോയിൽ നിന്നുള്ള 39-കാരനായ ലി ജൂസും ഭാര്യ ഷാങ് സിയാങ്ങുമാണ് ഈ ഹൃദയസ്പർശിയായ പ്രണയകഥയിലൂടെ ശ്രദ്ധേയരായത്.
2008-ൽ ലി ജൂസും ഷാങ് സിയാങ്ങും വിവാഹിതരായതിന് ശേഷം ഇവർക്ക് ഒരു മകളുമുണ്ടായി. 2013-ൽ ഷാങ് സിയാങ്ങിന് കടുത്ത നേത്രരോഗം സ്ഥിരീകരിക്കുകയും 2014 ജൂൺ ആയപ്പോഴേക്കും അവരുടെ കാഴ്ച പൂർണ്ണമായും നഷ്ടപ്പെടുകയും ചെയ്തു. രോഗം ഭേദമാക്കാൻ ലക്ഷങ്ങൾ ചെലവഴിച്ചെങ്കിലും ഫലം കണ്ടില്ല. ജീവിതത്തിന്റെ താളം തെറ്റിയ ഈ ഘട്ടത്തിൽ, മകളെപ്പോലും കാണാൻ കഴിയാത്ത നിരാശയിൽ ഷാങ് തളർന്നുപോയി. അന്ന് ലി ജൂസ് ഭാര്യക്ക് ഒരു വാക്ക് നൽകി - എവിടെപ്പോയാലും ഷാങ്ങിനെ താൻ കൂടെ കൊണ്ടുപോകും, അവളോടൊപ്പം നടക്കും.
ഈ വാക്ക് പാലിക്കാൻ ലി ജൂസ് അന്നുമുതൽ ശ്രമിച്ചുകൊണ്ടിരുന്നു. ഭാര്യക്ക് വീണ്ടും ജീവിതത്തിലേക്ക് തിരിച്ചുവരാൻ അദ്ദേഹം എല്ലാ പിന്തുണയും നൽകി. ബന്ധുക്കളും സുഹൃത്തുക്കളും ഷാങ്ങിനെ ആശ്വസിപ്പിക്കാനെത്തി. കാഴ്ചയുള്ളപ്പോൾ ഉപയോഗിച്ചിരുന്ന ഓർമ്മകളെ ആശ്രയിച്ച് വീടിനുള്ളിൽ സുരക്ഷിതമായി സഞ്ചരിക്കാൻ കഴിയുന്നതിനായി വീട്ടിലെ സാധനങ്ങളുടെ സ്ഥാനം മാറ്റാതെ ലി ശ്രദ്ധിച്ചു. ഷാങ് വീണ്ടും പാചകം ചെയ്യാനും ദൈനംദിന കാര്യങ്ങൾ ചെയ്യാനും പഠിച്ചു. "ഭക്ഷണത്തിന് പഴയതുപോലെ രുചിയുണ്ട്" എന്ന് പറഞ്ഞ് ഭാര്യയെ അഭിനന്ദിക്കാൻ ലി ഒരിക്കലും മറന്നില്ല. പതിയെ, ഈ ദമ്പതികൾ സാധാരണ ജീവിതത്തിലേക്ക് തിരിച്ചെത്തുകയും ചെയ്തു.
ലി ജൂസിന്റെ കരുതലും ഷാങ് സിയാങ്ങിന്റെ തിരിച്ചുവരവും സാമൂഹിക മാധ്യമങ്ങളിൽ പലരും പങ്കുവെക്കുകയും പ്രശംസിക്കുകയും ചെയ്യുന്നു. "ഈ സ്നേഹം വിലമതിക്കാനാവാത്തതാണ്," "ഇതാണ് യഥാർത്ഥ സ്നേഹത്തിന്റെ ഉദാഹരണം," എന്നിങ്ങനെയുള്ള പ്രതികരണങ്ങളാണ് ഏറെയും. ഭർത്താവിന്റെ അചഞ്ചലമായ പിന്തുണയാണ് ഭാര്യയുടെ ജീവിതത്തിൽ പുതിയ പ്രതീക്ഷ നൽകിയതെന്ന് നിരീക്ഷകർ പറയുന്നു. ഈ ദാമ്പത്യം സ്നേഹത്തിന്റെയും കരുതലിന്റെയും ഒരു പുതിയ മുഖമാണ് ലോകത്തിന് കാണിച്ചുതരുന്നത്.