ഒരേ ദിവസം ഒരുമിച്ച് ജനിച്ച് പഠിച്ച് വളര്‍ന്നു; 23-ാം വയസ്സില്‍ ഒരേ ദിവസം ഒരേ വകുപ്പില്‍ ഒരേ തസ്തികയില്‍ ഒരു സ്ഥലത്തു തന്നെ ജോലി നേടി: അപൂര്‍വ്വ നേട്ടവുമായി ഇരട്ടസഹോദരികള്‍
ഒരേ ദിവസം ഒരേ വകുപ്പില്‍ ഒരേ തസ്തികയില്‍ ഒരു സ്ഥലത്തു തന്നെ ജോലി നേടി ഇരട്ടസഹോദരികള്‍
കാസര്‍കോട്: ജനിച്ചപ്പോള്‍ മുതല്‍ എല്ലാ കാര്യങ്ങളിലും ഒരുമിച്ചായിരുന്നു സവിതയും സംഗീതയും. ഇരട്ടകളായ ഈ സഹോദരിമാര്‍ പഠനകാര്യങ്ങളില്‍ പോലും വേര്‍പിരിഞ്ഞില്ല. സ്‌കൂള്‍ പഠനവും പ്ലസ്ടുവും കഴിഞ്ഞും ഇരുവരും ഒരുമിച്ച് പിഎസ് സി പഠിച്ച് ഒരേ ദിവസം ഒരേ വകുപ്പില്‍ ഒരേ തസ്തികയില്‍ ഒരു സ്ഥലത്തു തന്നെ ജോലി നേടിയിരിക്കുകയാണ്. കാസര്‍കോട് ഭീമനടി കൂരാംകുണ്ട് സ്വദേശികളായ സഹോദരികളാണ് ജനനം മുതല്‍ ഒരുമിച്ചു തുടങ്ങിയ യാത്ര 23-ാം വയസ്സിലും ഒരുമിച്ചു തുടരുന്നത്.
ഒരുമിച്ച് സര്‍ക്കാര്‍ ജോലിയില്‍ പ്രവേശിച്ചപ്പോഴും വേര്‍പിരിയേണ്ടി വന്നില്ല എന്നതാണ് സവിതയേയും സംഗീതയേയും ഏറെ സന്തോഷിപ്പിക്കുന്നത്. പഠനത്തില്‍ പരിമിതികളുണ്ടായിരുന്ന ഇരുവരും വലിയ പരിശ്രമത്തിനൊടുവിലാണ് സര്‍ക്കാര്‍ ജോലിയില്‍ പ്രവേശിക്കുന്നത്. ഡിസംബര്‍ നാലിന് ഇരുവരും ഒരുമിച്ച് ജോലിയില്‍ പ്രവേശിക്കും. കൂരാംകുണ്ടിലെ കളരിമുറിയില്‍ ജോസഫിന്റെയും സുനിജോര്‍ജിന്റെയും മക്കളാണ് സവിത ജോസഫും, സംഗീത ജോസഫും.
2002 മാര്‍ച്ച് 11ന് ജനിച്ച സവിതയ്ക്ക് ഹൊസ്ദുര്‍ഗ് സബ്‌കോടതിയിലും സംഗീതയ്ക്ക് ഹൊസ്ദുര്‍ഗ് മുന്‍സിഫ് കോടതിയിലും ലാസ്റ്റ് ഗ്രേഡ് സെര്‍വന്റായാണ് 23-ാം വയസ്സില്‍ നിയമനം ലഭിച്ചത്. ഇരു കോടതികളും ഒരുവളപ്പിലാണ്. വെള്ളിയാഴ്ചയാണ് ഇരുവര്‍ക്കും നിയമന ഉത്തരവ് ലഭിച്ചത്. സ്‌കൂളില്‍ പഠിക്കുമ്പോഴും ഒരേ ക്ലാസിലായിരുന്നു. പ്ലസ് ടുവിനുശേഷം ആനിമേഷനാണ് ഇരുവരും പഠിച്ചത്. തുടര്‍ന്ന് പിഎസ്സി കോച്ചിങ്ങിന് പോകുകയായിരുന്നു. ഒടുവില്‍ ജോലിക്ക് പ്രവേശിക്കാന്‍ പോകുന്നതും ഒരുമിച്ച് ഒരിടത്തു തന്നെ.
ജോലി ലഭിച്ചെങ്കിലും പിഎസ്സി പരിശീലനം തുടരാനാണ് ഇരുവരും ആഗ്രഹിക്കുന്നതെന്ന് കല്ലഞ്ചിറ കെഐഎ എല്‍പി സ്‌കൂള്‍ പ്രധാനാധ്യാപികയും അമ്മയുമായ സുനി ജോര്‍ജ് പറഞ്ഞു. ഓണ്‍ലൈനായാണ് പഠനം തുടരുന്നതെന്നും അവര്‍ പറഞ്ഞു. കെഎസ്ഇബിയില്‍ നിന്ന് സീനിയര്‍ സൂപ്രണ്ടായാണ് പിതാവ് ജോസഫ് വിരമിച്ചത്. ഇവരുടെ ജ്യേഷ്ഠ സഹോദരി കവിത ജോസഫ് വിവാഹത്തിനു ശേഷം ബെംഗളൂരുവില്‍ ജോലി ചെയ്യുകയാണ്.