ഒരുവശത്ത് കടലായതിനാല്‍ വാഹനങ്ങളുടെ റീല്‍ എടുക്കുന്നവരുടെയും വിവാഹ ഫോട്ടോ എടുക്കുന്നവരുടെയും ഇഷ്ടസ്ഥലം; ബീച്ച് റോഡിലെ പ്രമോഷന്‍ വീഡിയോ ചിത്രീകരണത്തില്‍ ആല്‍വിന്റെ ജീവനെടുത്തത് ബെന്‍സ് കാര്‍; ചേസിങ്ങിന് കര്‍ശന നടപടിയുമായി എം വി ഡി
ആല്‍വിന്റെ ജീവനെടുത്തത് ബെന്‍സ് കാര്‍
കോഴിക്കോട്: കോഴിക്കോട് ബീച്ച് റോഡില്‍ ഡിവൈഡറില്‍ നിന്ന് പ്രമോഷന്‍ വീഡിയോ ചിത്രീകരിക്കുമ്പോള്‍ ആല്‍വിന്റെ മരണത്തിന് ഇടയാക്കിയ അപകടമുണ്ടാക്കിയത് ബെന്‍സ് കാറെന്ന് കണ്ടെത്തി. രണ്ടു വാഹനങ്ങളുടെ ഡ്രൈവര്‍മാര്‍ക്കെതിരെയും കര്‍ശന നടപടി സ്വീകരിക്കാനും എം വി ഡി തീരുമാനിച്ചു. ഈ ഡ്രൈവര്‍മാരുടെ ലൈസന്‍സ് സസ്പെന്ഡ് ചെയ്യാനാണ് മോട്ടോര്‍ വാഹന വകുപ്പിന്റെ തീരുമാനം. അന്വേഷണത്തിന് ശേഷം വാഹനങ്ങളുടെ ആര്‍ സി യും സസ്പെന്ഡ് ചെയ്യാന്‍ ആലോചനയുണ്ടെന്ന് എം വി ഡി ഉദ്യോഗസ്ഥര്‍ വ്യക്തമാക്കി.
ഇന്ന് രാവിലെയാണ് കോഴിക്കോട് ബീച്ച് റോഡില്‍ പ്രമോഷന്‍ വീഡിയോ ചിത്രീകരിക്കുന്നതിനിടെ വാഹനമിടിച്ച് വടകര കടമേരി സ്വദേശി ആല്വിന് ദാരുണാന്ത്യം സംഭവിച്ചത്. വാഹനങ്ങളുടെ ചേസിംഗ് വീഡിയോ ചിത്രീകരിക്കുന്നതിനിടയില്‍ കൂട്ടത്തിലുള്ള വാഹനമിടിച്ചാണ് അപകടമുണ്ടായത്.
ബീച്ച് റോഡില്‍ വെള്ളയില്‍ പൊലീസ് സ്റ്റേഷന് സമീപത്ത് വെച്ച് രാവിലെ ഏഴരയോടെയായിരുന്നു അപകടമുണ്ടായത്. ആല്വിന് മുമ്പ് ജോലി ചെയ്തിരുന്ന 999 ഓട്ടോ മോട്ടീവ് എന്ന സ്ഥാപനത്തിനു വേണ്ടി പ്രമോഷണല്‍ വീഡിയോ ചിത്രീകരിക്കുമ്പോഴാണ് അപകടമുണ്ടായത്. രണ്ട് ആഡംബര കാറുകള്‍ ചേയ്‌സ് ചെയ്ത് വരുന്നതിന്റെ ദൃശ്യങ്ങള്‍ റോഡിന്റെനടുവില്‍ നിന്ന് ആല്വിന് പകര്‍ത്തുകയായിരുന്നുവെന്നാണ് പൊലീസ് പറയുന്നത്. ഇതിനിടെ നിയന്ത്രണം വിട്ട ഒരു കാര്‍ ആല്‍വിനെ ഇടിച്ചിടുകയായിരുന്നു. കാറിലുണ്ടായിരുന്നവര്‍ ഉടന്‍ തന്നെ ആല്‍വിനെ സ്വകാര്യ ആശുപത്രിയില്‍ എത്തിച്ചെങ്കിലും ഉച്ചയോടെ മരണം സംഭവിക്കുകയായിരുന്നു.
സ്വകാര്യ സ്ഥാപനത്തിന്റെ ഉടമയുടേയും ബന്ധുവിന്റെയും വാഹനമാണ് വീഡിയോ ചിത്രീകരിക്കാനായി ഉപയോഗിച്ചത്. രണ്ട് വാഹനങ്ങളും പൊലീസ് കസ്റ്റഡിയിലെടുത്തു. സംഭവത്തില്‍ മനഃപൂര്‍വ്വമല്ലാത്ത നരഹത്യക്കാണ് പൊലീസ് കേസെടുത്തത്. വിദേശത്തായിരുന്ന ആല്വിന് ആരോഗ്യപ്രശ്‌നങ്ങളെ തുടര്‍ന്ന് അടുത്തിടെയാണ് നാട്ടിലെത്തിയത്. അതിനിടയിലാണ് ദാരുണാന്ത്യം സംഭവിച്ചത്.
സിസിടിവി ദൃശ്യങ്ങളും ആല്‍വിന്റെ മൊബൈലും പൊലീസിന് ലഭിച്ചു. ഈ ദൃശ്യങ്ങളില്‍ നിന്ന്, ഇടിച്ച കാര്‍ ഏതാണെന്ന് കണ്ടെത്താന്‍ സാധിക്കും. സാബിത് കല്ലിങ്കല്‍ എന്നയാളുടെയാണ് കാറുകള്‍. ആഡംബര കാറുകളുടെ ഇടപാടാണ് ഇയാള്‍ക്ക്. സ്ഥിരമായി വാഹനങ്ങളുടെയും മറ്റും റീല്‍ എടുക്കുന്ന ആളാണ് സാബിത്. ഇന്‍സ്റ്റഗ്രാമില്‍ അറുപതിനായിരത്തോളം ഫോളോവേഴ്‌സുണ്ട്. സാബിത്തിനു വേണ്ടി ആല്വിന് സ്ഥിരമായി റീല്‍ എടുത്തു നല്‍കാറുണ്ടായിരുന്നു
ഒരാഴ്ച മുന്‍പാണ് ആല്വിന് ഗള്‍ഫില്‍ നിന്ന് എത്തിയത്. രണ്ടു വര്‍ഷം മുമ്പ് ആല്വിന് കിഡ്നി ഓപ്പറേഷന്‍ കഴിഞ്ഞിരുന്നു. കുറച്ചു നാളുകളായി വിദേശത്താണ് ജോലി ചെയ്തുവന്നിരുന്നത്. ആറു മാസം കൂടുമ്പോള്‍ മെഡിക്കല്‍ ചെക്കപ്പ് നടത്തുന്നതിന്റെ ഭാഗമായി നാട്ടിലെത്തിയതായിരുന്നു. ഈ സമയത്താണ് കോഴിക്കോട് വീഡിയോ പ്രമോഷന്‍ ചിത്രീകരണത്തിനെത്തിയതെന്നും അയല്‍വാസി പറഞ്ഞു.
ഒരാഴ്ച മുന്‍പാണ് ആല്വിന് ഗള്‍ഫില്‍ നിന്ന് എത്തിയത്. രണ്ടു വര്‍ഷം മുമ്പ് ആല്വിന് കിഡ്നി ഓപ്പറേഷന്‍ കഴിഞ്ഞിരുന്നു. കുറച്ചു നാളുകളായി വിദേശത്താണ് ജോലി ചെയ്തുവന്നിരുന്നത്. ആറു മാസം കൂടുമ്പോള്‍ മെഡിക്കല്‍ ചെക്കപ്പ് നടത്തുന്നതിന്റെ ഭാഗമായി നാട്ടിലെത്തിയതായിരുന്നു. ഈ സമയത്താണ് കോഴിക്കോട് വീഡിയോ പ്രമോഷന്‍ ചിത്രീകരണത്തിനെത്തിയതെന്നും അയല്‍വാസി പറഞ്ഞു.
ഒരുവശത്ത് കടലായതിനാല്‍ വാഹനങ്ങളുടെ റീല്‍ എടുക്കുന്നവരുടെയും വിവാഹ ഫോട്ടോ എടുക്കുന്നവരുടെയുമൊക്കെ ഇഷ്ടസ്ഥലമാണ് ബീച്ച് റോഡ്.