മുന്‍കൂര്‍ ജാമ്യ ഹര്‍ജി ബുധനാഴ്ച എടുത്താലും അന്ന് വാദം കേള്‍ക്കാന്‍ സാധ്യത കുറവ്; പോലീസ് റിപ്പോര്‍ട്ട് അടക്കം വാങ്ങി തിങ്കളാഴ്ചയ്ക്ക് മുമ്പ് വിധി വരില്ലെന്നും വിലയിരുത്തല്‍; പാലക്കാട്ടെ എംഎല്‍എയെ ഒളിവില്‍ തുടരുന്നത് തിരിച്ചടിയെന്ന് മുഖ്യമന്ത്രി; അതിവേഗ അറസ്റ്റ് വേണമെന്ന് പോലീസിന് പിണറായിയുടെ നിര്‍ദ്ദേശം; വോട്ടെണ്ണല്‍ ചര്‍ച്ചകളില്‍ പോലീസ് വീഴ്ച വരരുതെന്നും നിര്‍ദ്ദേശം; മാങ്കുട്ടത്തിലിനെ പൊക്കാന്‍ ഇനി പഴുതടച്ച അന്വേഷണം
പാലക്കാട്: രാഹുല്‍ മാങ്കൂട്ടത്തിലിനെ അതിവേഗം മുഖ്യമന്ത്രി പിണറായി വിജയന്റെ നിര്‍ദ്ദേശം. പോലീസിലെ ബന്ധപ്പെട്ടവരോട് ഇക്കാര്യം ആവശ്യപ്പെട്ടിട്ടാണ് മുഖ്യമന്ത്രി ദുബായിലേക്ക് വിമാനം കയറിയത്. ദുബായിലെത്തിയ മുഖ്യമന്ത്രി കേസ് അന്വേഷണം നിരീക്ഷിക്കുന്നുണ്ട്. രാഹുലിനെ പിടിക്കാന്‍ വൈകുന്നത് സര്‍ക്കാരിന് നാണക്കേടാകുമെന്ന് പോലീസിലെ ഉന്നതരെ മുഖ്യമന്ത്രി അറിയിച്ചിട്ടുണ്ട്. ഇതോടെയാണ് തിരുവനന്തപുരത്തു നിന്നുള്ള അന്വേഷണ സംഘം പാലക്കാട് എത്തിയത്. ബുധനാഴ്ച രാഹുലിന്റെ മുന്‍കൂര്‍ ജാമ്യ ഹര്‍ജി തിരുവനന്തപുരം കോടതി പരിഗണിക്കും. ബുധനാഴ്ച വാദത്തിലേക്ക് കടക്കില്ലെന്നാണ് വിലയിരുത്തല്‍. കോടതി പോലീസ് റിപ്പോര്‍ട്ട് ആവശ്യപ്പെടും. തിങ്കളാഴ്ചയോടെ മാത്രമേ ജാമ്യ ഹര്‍ജിയില്‍ വിധി വരൂവെന്നാണ് സര്‍ക്കാര്‍ വിലയിരുത്തല്‍.
ഇതിന് മുമ്പ് രാഹുലിനെ പിടിച്ചേ മതിയാകൂവെന്നാണ് മുഖ്യമന്ത്രിയുടെ നിലപാട്. ഇല്ലാത്ത പക്ഷം തദ്ദേശ തിരഞ്ഞെടുപ്പില്‍ അടക്കം പോലീസിന്റെ കഴിവുകേടായി ഇത് വിലയിരുത്തുമെന്നാണ് മുഖ്യമന്ത്രിയുടെ വിലയിരുത്തല്‍. യുവതിയെ ലൈംഗികചൂഷണം നടത്തിയ കേസില്‍ രാഹുല്‍ മാങ്കൂട്ടത്തില്‍ എംഎല്‍എയുടെ പാലക്കാടുള്ള ഫ്‌ലാറ്റില്‍ പരിശോധന നടക്കുന്നു. തിരുവനന്തപുരത്ത് നിന്നുള്ള അന്വേഷണ സംഘം ഇന്ന് പാലക്കാട് ക്രൈംബ്രാഞ്ച് ഓഫീസില്‍ എത്തിയിരുന്നു. ഇരു ടീമുകളും സംയുക്തമായാണ് ഫ്‌ലാറ്റില്‍ പരിശോധന നടത്തുന്നത്. കുന്നത്തൂര്‍മേടുള്ള ഫ്‌ലാറ്റിലാണ് പ്രത്യേക അന്വേഷണ സംഘം പരിശോധന നടത്തുന്നത്. രാഹുലിനായി സംസ്ഥാന വ്യാപകമായി പൊലീസ് അന്വേഷണം നടത്തുന്നുണ്ട്. രാഹുലിന്റെ ബന്ധുക്കളും സുഹൃത്തുക്കളും നിരീക്ഷണത്തിലാണ്. ബന്ധുക്കളില്‍ ചിലരെ ചോദ്യം ചെയ്‌തേക്കും. അതേസമയം, രാഹുല്‍ കോയമ്പത്തൂരില്‍ ഒളിച്ചുകഴിയുന്നതായാണ് സൂചന. തമിഴ്‌നാട് കേന്ദ്രീകരിച്ചും പൊലീസ് അന്വേഷണം നടക്കുന്നുണ്ട്. എഡിജിപി എച്ച് വെങ്കിടേഷിന്റെ നേതൃത്വത്തില്‍ യോഗം ചേര്‍ന്നു.
മാങ്കൂട്ടത്തില്‍ കോയമ്പത്തൂരിലേക്ക് കടന്നെന്നാണ് സൂചന. പ്രത്യേക അന്വേഷണ സംഘം രാഹുലിന്റെ ഫ്‌ളാറ്റില്‍ പരിശോധന നടത്തുകയും സിസിടിവി ദൃശ്യങ്ങള്‍ അടക്കം ശേഖരിക്കുകയും ചെയ്തിട്ടുണ്ട്. രാഹുലിന്റെ ഔദ്യോഗിക വാഹനം ഫ്‌ലാറ്റിലുണ്ടെന്നും പൊലീസ് അറിയിച്ചു.യുവതി നല്‍കിയ പരാതിയിലെ വിവരങ്ങള്‍ ശരിയാണോയെന്ന് പരിശോധിക്കാന്‍ വേണ്ടിയാണ് സിസിടിവി ദൃശ്യങ്ങള്‍ ശേഖരിച്ചതെന്നാണ് വിവരം. അതേസമയം, പരാതിക്കാരിയുടെ ശബ്ദ പരിശോധന നടത്തും. പുറത്തുവന്ന സംഭാഷണം യുവതിയുടേതാണോയെന്ന് ഉറപ്പിക്കാനാണ് പരിശോധന നടത്തുന്നത്. തിരുവല്ലം ചിത്രാഞ്ജലി സ്റ്റുഡിയോയിലാണ് പരിശോധന നടത്തുക. രാഹുലിന്റെ മുന്‍കൂര്‍ ജാമ്യാപേക്ഷ ബുധനാഴ്ചയാണ് കോടതി പരിഗണിക്കുന്നത്.
പെന്‍ഡ്രൈവിലുള്ള തെളിവുകള്‍ മുദ്രവച്ച കവറില്‍ ഇന്നലെ തിരുവനന്തപുരം പ്രിന്‍സിപ്പല്‍ ജില്ലാ സെഷന്‍സ് കോടതിയില്‍ രാഹുലിന്റെ അഭിഭാഷകന്‍ സമര്‍പ്പിച്ചിരുന്നു. യുവതി പരാതി നല്‍കിയത് ബാഹ്യപ്രേരണ കൊണ്ടാണെന്നും ഗര്‍ഭച്ഛിദ്രം നടത്തിയത് അവരുടെ സ്വന്തം ഇഷ്ടപ്രകാരമാണെന്നും തെളിയിക്കുന്ന ചാറ്റുകളും ശബ്ദസന്ദേശങ്ങളും അടക്കമുള്ള ഒമ്പത് ഡിജിറ്റല്‍ തെളിവുകളെന്നാണ് അഭിഭാഷകന്റെ അവകാശവാദം.യുവതി ജോലിചെയ്തിരുന്ന സ്ഥാപനത്തിലെ ഉന്നതന്‍ പരാതി നല്‍കാന്‍ പ്രേരിപ്പിച്ചെന്ന് യുവതി പറയുന്ന ശബ്ദരേഖയും ഇക്കൂട്ടത്തിലുണ്ടെന്നാണ് സൂചന. വ്യാഴാഴ്ച യുവതി മുഖ്യമന്ത്രിക്ക് പരാതി നല്‍കിയതു മുതല്‍ ഒളിവിലുള്ള രാഹുല്‍, തലസ്ഥാനത്ത് വഞ്ചിയൂരിലെ വക്കീല്‍ ഓഫീസിലെത്തി വക്കാലത്ത് ഒപ്പിട്ടതായി അഭിഭാഷകന്‍ അവകാശപ്പെട്ടു. എന്നാല്‍ ഇത് തെറ്റാണെന്ന് പോലീസ് പറയുന്നു.
ഗര്‍ഭഛിദ്രത്തിനിരയായതായ യുവതിയുടെ മൊഴി ആശുപത്രി അധികൃതര്‍ സ്ഥിരീകരിച്ചിട്ടുണ്ട്. ഗുരുതര രക്തസ്രാവത്തിന് സ്വകാര്യ ആശുപത്രിയില്‍ യുവതി ചികിത്സ തേടിയിരുന്നുവെന്ന് കണ്ടെത്തി. ഗര്‍ഭാവസ്ഥയിലിരിക്കുമ്പോള്‍ ഏഴ് ആഴ്ച വരെ കഴിക്കാവുന്ന മരുന്നുകളാണ് യുവതിയെക്കൊണ്ട് നിര്‍ബന്ധിച്ച് കഴിപ്പിച്ചത്. ഈ മരുന്നുകള്‍ ജീവന്‍ നഷ്ടപ്പെടുത്താന്‍ വരെ സാധ്യതയുള്ള മരുന്നുകളായിരുന്നുവെന്ന് ഡോക്ടര്‍മാര്‍ പറയുന്നു. കേസില്‍ യുവതി നല്‍കിയ ശബ്ദരേഖ തെളിവുകലുടെ ആധികാരിക അന്വേഷണ സംഘം പരിശോധിക്കും. ഇതിനായി ഇരുവരുടേയും ശബ്ദ സാമ്പിളുകള്‍ ശേഖരിക്കും. ഗര്‍ഭഛിദ്രത്തിന് ഇരയായ യുവതി തനിക്കുണ്ടായ ശാരീരികവും മാനസികവുമായ ദുരനുഭവങ്ങള്‍ പങ്കുവെയ്ക്കുന്നതിന്റെ ശബ്ദരേഖ കഴിഞ്ഞ ദിവസം പുറത്തുവന്നിരുന്നു.
ഗര്‍ഭഛിദ്രത്തിന് മരുന്ന് ഉപയോഗിച്ചതിന് ഡോക്ടര്‍ വഴക്ക് പറഞ്ഞതായി ശബ്ദ സന്ദേശത്തില്‍ യുവതി വെളിപ്പെടുത്തി. ഗര്‍ഭഛിദ്രത്തിനുള്ള ഗുളിക മാങ്കൂട്ടത്തിലിന്റെ നിര്‍ദേശം അനുസരിച്ച് സുഹൃത്തും യൂത്ത് കോണ്‍ഗ്രസ് നേതാവുമായ ജോബി ജോസഫാണ് എത്തിച്ചുനല്‍കിയതെന്ന് പെണ്‍കുട്ടി മൊഴിനല്‍കിയിട്ടുണ്ട്.