മുംബൈ ലക്ഷ്യമാക്കി കുതിച്ചുയരാൻ ഇനി സെക്കൻഡുകൾ ബാക്കി; റൺവേയിൽ കൂടി മണിക്കൂറിൽ 240 കിലോമീറ്റർ വേഗതയിൽ പാഞ്ഞ് വിമാനം; പെട്ടെന്ന് ഒരു യാത്രക്കാരന്റെ അതിരുവിട്ട പ്രവർത്തി; കോക്ക്പിറ്റിൽ എമർജൻസി കോൾ; എല്ലാവരും രക്ഷപ്പെട്ടത് ഭാഗ്യം കൊണ്ട്; പോലീസെത്തിയപ്പോൾ വിരുതന്റെ വിചിത്ര വാദം

മുംബൈ: വാരണാസിയിൽ നിന്ന് മുംബൈയിലേക്ക് പുറപ്പെടേണ്ടിയിരുന്ന ആകാശ എയർ വിമാനത്തിൽ ടേക്ക് ഓഫിന് തൊട്ടുമുമ്പ് യാത്രക്കാരൻ എമർജൻസി എക്സിറ്റ് തുറക്കാൻ ശ്രമിച്ചതായി റിപ്പോർട്ട്. ഈ സംഭവത്തെ തുടർന്ന് സുരക്ഷാ ഉദ്യോഗസ്ഥർ ഇയാളെ കസ്റ്റഡിയിലെടുത്തു. തിങ്കളാഴ്ച വൈകുന്നേരം 6:45 ന് ലാൽ ബഹദൂർ ശാസ്ത്രി അന്താരാഷ്ട്ര വിമാനത്താവളത്തിൽ നിന്ന് മുംബൈയിലേക്ക് പുറപ്പെടേണ്ടിയിരുന്ന QP 1497 വിമാനത്തിലാണ് സംഭവം നടന്നത്.

ജോൻപൂർ ജില്ലയിലെ ഗൗരാ ബാദ്ഷാപ്പൂർ സ്വദേശിയായ സുജിത് സിംഗ് എന്ന യാത്രക്കാരനാണ് വിമാനം റൺവേയിലേക്ക് നീങ്ങുന്നതിനിടെ എമർജൻസി എക്സിറ്റ് തുറക്കാൻ ശ്രമിച്ചത്. കാബിൻ ക്രൂ അംഗങ്ങൾ നൽകിയ മുന്നറിയിപ്പിനെ തുടർന്ന്, വിമാനത്തിലെ പൈലറ്റ് എയർ ട്രാഫിക് കൺട്രോളെ വിവരമറിയിക്കുകയും വിമാനം തിരികെ ബേയിലേക്ക് കൊണ്ടുവരികയും ചെയ്തു.

തുടർന്ന്, സുരക്ഷാ ഉദ്യോഗസ്ഥരെത്തി വിമാനത്തിലുണ്ടായിരുന്ന എല്ലാ യാത്രക്കാരെയും പുറത്തിറക്കി. യാത്രക്കാരനായ സുജിത് സിംഗിനെ ചോദ്യം ചെയ്യാനായി കസ്റ്റഡിയിലെടുക്കുകയും ചെയ്തു. വിമാനത്തിലെ എമർജൻസി എക്സിറ്റ് തുറക്കാൻ ശ്രമിച്ചതിന് കാരണം കൗതുകം മാത്രമാണെന്ന് യാത്രക്കാരൻ അന്വേഷണ ഉദ്യോഗസ്ഥരോട് പറഞ്ഞതായി ഫൂൽപൂർ സ്റ്റേഷൻ ഹൗസ് ഓഫീസർ പ്രവീൺ കുമാർ സിംഗ് വ്യക്തമാക്കി. ഇയാൾക്കെതിരെ കേസ് രജിസ്റ്റർ ചെയ്തിട്ടുണ്ട്.

സുരക്ഷാ പരിശോധനകൾ പൂർത്തിയായതിന് ശേഷം, വിമാനം ഏകദേശം 7:45 ന് മുംബൈയിലേക്ക് യാത്ര തുടർന്നു. വിമാന യാത്രയ്ക്കിടെ യാത്രക്കാരുടെ ഭാഗത്തുനിന്നുള്ള ഇത്തരം സുരക്ഷാ വീഴ്ചകൾ ഗൗരവകരമായ വിഷയമായി കണക്കാക്കപ്പെടുന്നു. ഇതിനാൽ ശക്തമായ നടപടികൾ സ്വീകരിക്കാൻ അധികൃതർ നിർബന്ധിതരാകുന്നു.