കടയിൽ നിന്നും ഒരു പ്രതിമ വാങ്ങി; അതിന്റെ ഉരുണ്ട രൂപവും ശാന്തമായ മുഖഭാവവും ബുദ്ധന്റേതെന്ന് തോന്നിപ്പിച്ചു; പൂജാമുറിയിൽ പ്രതിഷ്ഠിച്ച പ്രതിമയിൽ ദിവസവും പ്രാർത്ഥന; യുവതി വർഷങ്ങളോളം ആരാധിച്ചത് പച്ച നിറത്തിലുള്ള കാർട്ടൂൺ കഥാപാത്രത്തെ

മനില: ഫിലിപ്പീൻസിൽ നിന്നുള്ള ഒരു യുവതി നാല് വർഷത്തോളം ബുദ്ധ പ്രതിമയെന്ന് തെറ്റിദ്ധരിച്ച് ആരാധിച്ചത് പ്രശസ്ത കാർട്ടൂൺ കഥാപാത്രമായ ഷ്രെക്കിന്റെ പ്രതിമയെ. താൻ ഭക്തിയോടെ പൂജിച്ചിരുന്ന രൂപം ബുദ്ധനല്ല, ലോകപ്രശസ്ത ആനിമേഷൻ സിനിമയിലെ നായകനായ ഷ്രെക്കാണെന്ന് തിരിച്ചറിഞ്ഞപ്പോൾ യുവതിയും വീട്ടുകാരും ഞെട്ടിപ്പോയി. എന്നിരുന്നാലും, സത്യം മനസ്സിലായിട്ടും ആ പ്രതിമയെ കൈവിടാതെ ആരാധന തുടരാനാണ് യുവതിയുടെ തീരുമാനം. ഈ സംഭവം സമൂഹ മാധ്യമങ്ങളിൽ വ്യാപകമായി പ്രചരിക്കുകയാണ്.

ഏകദേശം നാല് വർഷം മുൻപാണ് ഈ യുവതി ഒരു പ്രാദേശിക കടയിൽ നിന്ന് പച്ച നിറത്തിലുള്ള ഒരു പ്രതിമ വാങ്ങിയത്. അതിന്‍റെ ഉരുണ്ട രൂപവും മുഖത്തെ ശാന്തമായ ഭാവവും കണ്ടപ്പോൾ അത് ബുദ്ധ പ്രതിമയാണെന്ന് അവൾ ഉറച്ചു വിശ്വസിച്ചു. വീട്ടിലെത്തിയ അവൾ തന്‍റെ പൂജാമുറിയിൽ ഈ പ്രതിമ പ്രതിഷ്ഠിച്ചു. കഴിഞ്ഞ നാല് വർഷമായി ദിവസവും ധൂപം കത്തിച്ചും പ്രാർത്ഥനകൾ നടത്തിയും ഭക്തിപൂർവ്വമാണ് അവൾ ഈ രൂപത്തെ ആരാധിച്ചിരുന്നത്. കുടുംബത്തിന് സമാധാനവും ഐശ്വര്യവും ലഭിക്കാനായിരുന്നു അവളുടെ പ്രാർത്ഥനകൾ.

അടുത്തിടെയാണ് താൻ ആരാധിക്കുന്നത് ബുദ്ധനെയല്ലെന്ന സത്യം അവൾ തിരിച്ചറിഞ്ഞത്. ഒരു ദിവസം അവളുടെ വീട്ടിലെത്തിയ സുഹൃത്താണ് ആ 'ബുദ്ധ പ്രതിമ' ശ്രദ്ധിച്ചത്. സിനിമകളും കാർട്ടൂണുകളും കണ്ട് പരിചയമുള്ള സുഹൃത്തിന് ആ രൂപം കണ്ടപ്പോൾ തന്നെ അത് പ്രശസ്ത കാർട്ടൂൺ കഥാപാത്രമായ ഷ്രെക് ആണെന്ന് മനസ്സിലായി. അവൾ ഉടൻ തന്നെ ഈ വിവരം യുവതിയെ അറിയിക്കുകയായിരുന്നു. യഥാർത്ഥത്തിൽ 3D പ്രിന്‍റർ ഉപയോഗിച്ച് നിർമ്മിച്ച ഷ്രെക്കിന്‍റെ ഒരു മാതൃകയായിരുന്നു ബുദ്ധനാണെന്ന് തെറ്റിദ്ധരിച്ച് വീട്ടിൽ പൂജിക്കപ്പെട്ട ഈ പച്ചനിറത്തിലുള്ള പ്രതിമ.

സത്യമറിഞ്ഞപ്പോൾ യുവതി ആദ്യം സ്തംഭിച്ചുപോയെങ്കിലും, പിന്നീട് തന്‍റെ നിഷ്കളങ്കമായ അബദ്ധമോർത്ത് ചിരിക്കുകയായിരുന്നു. നാണക്കേട് തോന്നുന്നതിന് പകരം, ഈ സംഭവത്തെ ഒരു തമാശയായി എടുക്കാനാണ് അവൾ തീരുമാനിച്ചത്. താൻ നാല് വർഷമായി പ്രാർത്ഥിച്ചിരുന്നത് ഒരു കാർട്ടൂൺ കഥാപാത്രത്തോടാണെന്ന് അറിഞ്ഞിട്ടും, ആ പ്രതിമയെ കൈവിടാൻ യുവതി തയ്യാറല്ല. രൂപം ഏതായാലും തന്‍റെ ഭക്തി സത്യസന്ധമാണെന്ന ഉറച്ച വിശ്വാസത്തിലാണ് അവർ.