രാത്രി കോവളം വഴി പോകുമ്പോൾ മനസ്സിൽ പേടിയാണ്; വണ്ടിയിൽ ബ്രൈറ്റ് ലൈറ്റിട്ട് പോയില്ലെങ്കിൽ പതിയിരിക്കുന്നത് വൻ അപകടം; ഒന്ന് ഇരുട്ടിയാൽ തലസ്ഥാന നഗരത്തിലൂടെ കടന്നുപോകുന്ന യാത്രക്കാർക്ക് തലവേദന; എല്ലാത്തിനും വിശദീകരണവുമായി കോർപ്പറേഷൻ; കണ്ണടഞ്ഞ ആ മിഴി ഇനി തുറക്കുമോ?

തിരുവനന്തപുരം: സംസ്ഥാന തലസ്ഥാനത്തെ പ്രധാന വീഥികളും ഇടറോഡുകളും മാസങ്ങളായി ഇരുട്ടിൽ മുങ്ങിയിരിക്കുകയാണ്. നഗരത്തിലെ തെരുവുവിളക്കുകൾ പരിപാലിക്കാനുള്ള കരാർ കാലാവധി അവസാനിച്ചതാണ് പ്രതിസന്ധിക്ക് കാരണമെന്ന് നഗരസഭ ആവർത്തിക്കുമ്പോഴും, ജനങ്ങളുടെ സുരക്ഷാഭീതിക്ക് പരിഹാരമുണ്ടാക്കാൻ അധികൃതർ തയ്യാറാകുന്നില്ലെന്ന പരാതി ശക്തമാണ്.

നഗരത്തിന്റെ ഹൃദയഭാഗങ്ങൾ മുതൽ ദേശീയപാത വരെ വിളക്കുകൾ തെളിയാത്ത അവസ്ഥയിലാണ്. ഏറ്റവും തിരക്കേറിയ ചില ഭാഗങ്ങളിലെ സ്ഥിതി ഇങ്ങനെയാണ്:

ചാക്ക മുതൽ ജനറൽ ആശുപത്രി വരെയുള്ള ഭാഗം പൂർണ്ണമായും ഇരുട്ടിലാണ്. വിദേശികളടക്കമുള്ള വിനോദസഞ്ചാരികൾ എത്തുന്ന ശംഖുമുഖം, കോവളം എന്നിവിടങ്ങളിലേക്കുള്ള യാത്ര ഇതിനാൽ ദുഷ്കരമാകുന്നു.

നിയമസഭാ പരിസരം, സെക്രട്ടേറിയറ്റ്, പോലീസ് ആസ്ഥാനം തുടങ്ങിയ തന്ത്രപ്രധാനമായ സ്ഥലങ്ങളിൽ പോലും പലപ്പോഴും വിളക്കുകൾ തെളിയുന്നില്ല എന്നത് സുരക്ഷാ ആശങ്കകൾ വർദ്ധിപ്പിക്കുന്നു.

വഞ്ചിയൂർ, ചാക്ക, മ്യൂസിയം, പാളയം, മെഡിക്കൽ കോളേജ്, കരമന, നേമം, തൃക്കണ്ണാപുരം തുടങ്ങി ഒട്ടുമിക്ക വാർഡുകളിലും സമാനമായ സ്ഥിതിയാണ്.

ഇരുട്ട് വീഴുന്നതോടെ നഗരത്തിലെ റോഡുകൾ തെരുവുനായ്ക്കളും ഇഴജന്തുക്കളും കൈയടക്കുന്ന അവസ്ഥയാണെന്ന് കാൽനടയാത്രക്കാർ പരാതിപ്പെടുന്നു. രാത്രികാലങ്ങളിൽ റോഡരികിൽ പാർക്ക് ചെയ്തിരിക്കുന്ന വാഹനങ്ങൾ കാണാൻ കഴിയാത്തതിനാൽ അപകടങ്ങളും പതിവാകുന്നു. കടകൾ അടച്ചു കഴിഞ്ഞാൽ പിന്നെ വീടുകളിൽ നിന്നുള്ള വെളിച്ചം മാത്രമാണ് യാത്രക്കാർക്ക് ഏക ആശ്രയം. രാത്രിയിൽ കച്ചവടം നടത്തുന്ന ചെറുകിട വ്യാപാരികളെയും ഓട്ടോ തൊഴിലാളികളെയും ഈ പ്രതിസന്ധി സാരമായി ബാധിച്ചിട്ടുണ്ട്.

"വർഷം തോറും ലക്ഷങ്ങളാണ് തെരുവുവിളക്ക് പരിപാലനത്തിനായി നഗരസഭ ചെലവാക്കുന്നത്. എന്നാൽ കരാർ കമ്പനികൾ കൃത്യമായി അറ്റകുറ്റപ്പണി നടത്തുന്നുണ്ടോ എന്ന് പരിശോധിക്കാൻ ആരുമില്ല." - നഗരവാസികൾ ആരോപിക്കുന്നു.

വിഷയം നഗരസഭയുടെ ശ്രദ്ധയിൽപ്പെട്ടിട്ടുണ്ടെന്ന് മേയർ മേയര്‍ വിവി രാജേഷ്‌  അറിയിച്ചു. നിലവിലെ കരാർ കാലാവധി കഴിഞ്ഞതും തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നതുമാണ് പുതിയ കരാർ നൽകുന്നതിനോ പഴയത് പുതുക്കുന്നതിനോ തടസ്സമായി നിൽക്കുന്നതെന്ന് മേയർ വിശദീകരിച്ചു. എങ്കിലും, നിലവിലെ ദുരവസ്ഥ പരിഗണിച്ച് അടിയന്തര ഇടപെടലുകൾ നടത്താൻ ശ്രമിക്കുകയാണെന്നും മേയര്‍ വിവി രാജേഷ്‌  അറിയിച്ചു.

നഗരപരിധി കടന്ന് നേമം, ബാലരാമപുരം ഭാഗങ്ങളിലേക്ക് പോയാലും സ്ഥിതി വ്യത്യസ്തമല്ല. തലസ്ഥാന നഗരിയെ 'സ്മാർട്ട് സിറ്റി' എന്ന് വിളിക്കുമ്പോഴും അടിസ്ഥാന സൗകര്യമായ തെരുവുവിളക്കുകൾ പോലും പ്രവർത്തനരഹിതമാകുന്നത് നഗരസഭയുടെയും സർക്കാരിന്റെയും വീഴ്ചയാണെന്ന് പ്രതിപക്ഷവും ആരോപിക്കുന്നു. എത്രയും വേഗം പ്രശ്നത്തിന് പരിഹാരം കണ്ട് നഗരവീഥികളിൽ വെളിച്ചമെത്തിക്കണമെന്നാണ് ജനങ്ങളുടെ ആവശ്യം.