മനുഷ്യ-മൃഗ വിസര്‍ജ്യത്താല്‍ വെള്ളത്തില്‍ കോളിഫോം ബാക്ടീരിയ സാന്നിധ്യം അമിതമെന്ന് കേന്ദ്ര മലിനീകരണ നിയന്ത്രണ ബോര്‍ഡ്; മഹാകുംഭിലെ വെള്ളം കുളിയ്ക്കാന്‍ മാത്രമല്ല, ആച്മന്നിനും ഉപയോഗിക്കാമെന്ന് യോഗി ആദിത്യനാഥ്; മഹാകുംഭമേളയെ അപകീര്‍ത്തിപ്പെടുത്താന്‍ നീക്കമെന്നും യുപി മുഖ്യമന്ത്രി നിയമസഭയില്‍
മഹാകുംഭിലെ വെള്ളം കുളിയ്ക്കാന്‍ മാത്രമല്ല, കുടിക്കാമെന്ന് യോഗി ആദിത്യനാഥ്
ന്യൂഡല്‍ഹി: മഹാകുംഭമേള നടക്കുന്ന പ്രയാഗ്രാജിലെ ഗംഗയിലെയും യമുനയിലെയും വെള്ളം കുളിയ്ക്കാന്‍ യോഗ്യമല്ലെന്നും കോളിഫോം ബാക്ടീരിയയുടെ സാന്നിധ്യം അമിതമാണെന്നുമുള്ള കേന്ദ്ര മലിനീകരണ നിയന്ത്രണ ബോര്‍ഡിന്റെ റിപ്പോര്‍ട്ട് തള്ളി യുപി മുഖ്യമന്ത്രി യോഗി ആദിത്യനാഥ്. മലിനജലം, മൃഗങ്ങളുടെ അവശിഷ്ടം എന്നിങ്ങനെ പല കാരണങ്ങളാല്‍ ഇ കോളി ബാക്ടീരിയ വര്‍ധിക്കും. എന്നാല്‍ പ്രയാഗ്രാജിലെ ഫെക്കല്‍ കോളിഫോമിന്റെ അളവ് 100 മില്ലിയില്‍ 2,500 എംപിഎന്നില്‍ താഴെയാണ്. മഹാകുംഭത്തെ അപകീര്‍ത്തിപ്പെടുത്താന്‍ മാത്രമാണ് വ്യാജ പ്രചാരണമെന്നും അദ്ദേഹം കൂട്ടിച്ചേര്‍ത്തു.
മനുഷ്യ-മൃഗ വിസര്‍ജ്യത്തില്‍നിന്നാണ് പ്രധാനമായി വെള്ളത്തില്‍ കോളിഫോം ബാക്ടീരിയ ഉണ്ടാകുന്നത്. മതപരമായ സമ്മേളനത്തെ അപകീര്‍ത്തിപ്പെടുത്താനുള്ള ശ്രമത്തിന്റെ ഭാഗമാണ് പ്രചാരണമെന്ന് യോഗി ആരോപിച്ചു. സംഗം വെള്ളം വിശുദ്ധ സ്‌നാനത്തിന് തികച്ചും അനുയോജ്യമാണെന്നും അദ്ദേഹം വ്യക്തമാക്കി. കുളിക്കുന്നതിന് മാത്രമല്ല, ആചാരത്തിന്റെ ഭാഗമായി കുടിയ്ക്കാനും (ആച്മന്‍) വെള്ളം യോഗ്യമാണെന്നും ആദിത്യനാഥ് നിയമസഭയില്‍ പറഞ്ഞു.
ഈ പരിപാടി ഏതെങ്കിലും പാര്‍ട്ടിയോ സര്‍ക്കാരോ സംഘടിപ്പിച്ചതല്ല. ഇത് സമൂഹത്തിന്റേതാണ്. ഞങ്ങള്‍ സഹായികള്‍ മാത്രമാണ്. ഉത്സവത്തിന് ഏഴ് ദിവസം ശേഷിക്കുന്നു. ഇന്ന് ഉച്ചവരെ 56.26 കോടി ഭക്തര്‍ പ്രയാഗ്രാജിലെ ത്രിവേണി സംഗമത്തില്‍ പുണ്യസ്‌നാനം നടത്തി. ഈ നൂറ്റാണ്ടിലെ മഹാനായ കുംഭവുമായി സഹകരിക്കാന്‍ ഞങ്ങളുടെ സര്‍ക്കാരിന് അവസരം ലഭിച്ചത് ഞങ്ങളുടെ ഭാഗ്യമാണെന്നും അദ്ദേഹം പറഞ്ഞു.
ത്രിവേണിയില്‍ വെള്ളത്തിന്റെ ഗുണനിലവാരത്തെക്കുറിച്ച് ചോദ്യങ്ങള്‍ ഉയരുന്നതിനിടെയാണ് അദ്ദേഹത്തിന്റെ പ്രസ്താവന. സംഗമത്തിലും പരിസരത്തുമുള്ള എല്ലാ പൈപ്പുകളും ഡ്രെയിനുകളും ടേപ്പ് ചെയ്ത് ശുദ്ധീകരിച്ചതിന് ശേഷം മാത്രമാണ് വെള്ളം തുറന്നുവിടുന്നത്. യുപി മലിനീകരണ നിയന്ത്രണ ബോര്‍ഡ് ജലത്തിന്റെ ഗുണനിലവാരം നിലനിര്‍ത്താന്‍ തുടര്‍ച്ചയായി നിരീക്ഷിച്ചുവരികയാണ്. ഇന്നത്തെ റിപ്പോര്‍ട്ടുകള്‍ പ്രകാരം സംഗമത്തിന് സമീപത്തെ ബിഒഡിയുടെ അളവ് 3-ല്‍ താഴെയാണെന്നും അദ്ദേഹം വ്യക്തമാക്കി.
ഉത്തര്‍പ്രദേശ് നിയമസഭയില്‍ സംസാരിക്കവെ, മഹാ കുംഭമേളയില്‍ 56.25 കോടിയിലധികം ഭക്തര്‍ ഇതിനകം പുണ്യസ്‌നാനം നടത്തിയിട്ടുണ്ടെന്നും, കുളികഴിഞ്ഞ നിരവധി സെലിബ്രിറ്റികള്‍ ക്രമീകരണങ്ങളെ പ്രശംസിച്ചിട്ടുണ്ടെന്നും ആദിത്യനാഥ് പറഞ്ഞു.
'56.25 കോടിയിലധികം ഭക്തര്‍ ഇതിനകം പ്രയാഗ്രാജില്‍ പുണ്യസ്‌നാനം നടത്തി... സനാതന്‍ ധര്‍മ്മത്തിനോ, ഗംഗാ മാതാവിനോ, ഇന്ത്യയ്ക്കോ, മഹാ കുംഭമേളയ്ക്കോ എതിരെ അടിസ്ഥാനരഹിതമായ ആരോപണങ്ങള്‍ ഉന്നയിക്കുകയോ വ്യാജ വീഡിയോകള്‍ കാണിക്കുകയോ ചെയ്യുമ്പോള്‍, അത് ഈ 56 കോടി ജനങ്ങളുടെ വിശ്വാസത്തില്‍ കളിക്കുന്നതിന് തുല്യമാണ്,' മുഖ്യമന്ത്രി പറഞ്ഞു.
ബയോളജിക്കല്‍ ഓക്‌സിജന്‍ ഡിമാന്‍ഡ് (ബിഒഡി) ലെവല്‍ 3 മില്ലിഗ്രാമില്‍ താഴെയാണെന്നും ഗംഗയിലെ അലിഞ്ഞുചേര്‍ന്ന ഓക്‌സിജന്റെ (ഡിഒ) ലെവല്‍ 5 മില്ലിഗ്രാമില്‍ നിന്ന് ഏകദേശം 9 മില്ലിഗ്രാം/ലിറ്ററായി മെച്ചപ്പെട്ടിട്ടുണ്ടെന്നും ബുധനാഴ്ചത്തെ ഉത്തര്‍പ്രദേശ് മലിനീകരണ നിയന്ത്രണ ബോര്‍ഡിന്റെ (യുപിസിബി) റിപ്പോര്‍ട്ട് ഉദ്ധരിച്ച് ആദിത്യനാഥ് പറഞ്ഞു. സിപിസിബിയുടെ കണക്കനുസരിച്ച്, മലിനജല മലിനീകരണത്തിന്റെ പ്രധാന സൂചകമായ ഫെക്കല്‍ കോളിഫോം 100 മില്ലി ലിറ്ററിന് 2,500 യൂണിറ്റിനുള്ളില്‍ ആയിരിക്കണം.
144 വര്‍ഷത്തെ ഇടവേളയ്ക്ക് ശേഷം നടക്കുന്ന മഹാ കുംഭമേളയെ അപകീര്‍ത്തിപ്പെടുത്താന്‍ ശ്രമിച്ചതിന് പ്രതിപക്ഷത്തെയും അദ്ദേഹം ആക്രമിച്ചു, ലാലു പ്രസാദ് യാദവിന്റെയും തൃണമൂല്‍ നേതാവ് മമത ബാനര്‍ജിയുടെയും പരാമര്‍ശങ്ങളെ പരാമര്‍ശിച്ചു.
'മഹാ കുംഭമേളയ്ക്ക് പണം ചെലവഴിക്കേണ്ടതിന്റെ ആവശ്യകത എന്താണെന്ന് സമാജ്വാദി പാര്‍ട്ടി അധ്യക്ഷന്‍ ചോദിച്ചു. ലാലു യാദവ് കുംഭമേളയെ 'ഫാള്‍ട്ടു' എന്ന് വിളിച്ചു. എസ്പിയുടെ മറ്റൊരു പങ്കാളി പറഞ്ഞത് മഹാ കുംഭമേള 'മൃത്യു കുംഭം' ആയി മാറിയെന്നാണ്. സനാതന ധര്‍മ്മവുമായി ബന്ധപ്പെട്ട പരിപാടികള്‍ സംഘടിപ്പിക്കുന്നത് കുറ്റകരമാണെങ്കില്‍, നമ്മുടെ സര്‍ക്കാര്‍ ആ കുറ്റകൃത്യം തുടര്‍ന്നുകൊണ്ടേയിരിക്കും,' അദ്ദേഹം പറഞ്ഞു.
കഴിഞ്ഞ മാസം മഹാ കുംഭമേളയ്ക്കിടെയുണ്ടായ തിക്കിലും തിരക്കിലും യുപി സര്‍ക്കാരിനെതിരെ ബംഗാള്‍ മുഖ്യമന്ത്രി മമത ബാനര്‍ജി ചൊവ്വാഴ്ച പ്രതിഷേധം പ്രകടിപ്പിച്ചു. ആത്മീയ സമ്മേളനം 'മൃത്യു കുംഭം' ആയി മാറിയെന്ന് അവര്‍ പറഞ്ഞു.