അച്ഛനും സഹോദരങ്ങള്‍ക്കും പിആര്‍ ഉണ്ടായിട്ടും യുവതിക്ക് നിഷേധിച്ചു; അഞ്ചു വര്‍ഷം തികയ്ക്കാത്ത സെന്റ് ലൂഷ്യന്‍ പൗരിക്ക് ഒടുവില്‍ പിആര്‍; കുടിയേറ്റ നിയമത്തിലെ പഴുത് ഉപയോഗിച്ച് പതിനായിരത്തോളം പാക്കിസ്ഥാനികള്‍ പിആര്‍ നേടി; നടപടി കടുപ്പിച്ച് ബ്രിട്ടണ്‍
അച്ഛനും സഹോദരങ്ങള്‍ക്കും പിആര്‍ ഉണ്ടായിട്ടും യുവതിക്ക് നിഷേധിച്ചു; അഞ്ചു വര്‍ഷം തികയ്ക്കാത്ത സെന്റ് ലൂഷ്യന്‍ പൗരിക്ക് ഒടുവില്‍ പിആര്‍; കുടിയേറ്റ നിയമത്തിലെ പഴുത് ഉപയോഗിച്ച് പതിനായിരത്തോളം പാക്കിസ്ഥാനികള്‍ പിആര്‍ നേടി; നടപടി കടുപ്പിച്ച് ബ്രിട്ടണ്‍
ലണ്ടന്‍: യുകെയില്‍ സ്ഥിരതാമസാനുമതി നിഷേധിക്കപ്പെട്ട സെന്റ് ലൂസിയന്‍ പൗരയായ ജീനല്‍ ഹിപ്പോലൈറ്റിന്റെ കേസ് പുനഃപരിശോധിക്കാന്‍ ആഭ്യന്തര മന്ത്രാലയത്തിന് അപ്പീല്‍ കോടതി നിര്‍ദേശം നല്‍കിയത് ചര്‍ച്ചകളില്‍. പിതാവിനും സഹോദരങ്ങള്‍ക്കും വിന്‍ഡ്റഷ് പദ്ധതി പ്രകാരം സ്ഥിരതാമസാനുമതി ലഭിച്ചിട്ടും ജീനല്‍ ഹിപ്പോലൈറ്റിന് നിഷേധിക്കപ്പെട്ട കേസിലാണ് നിര്‍ണായകമായ ഈ വിധി. വിന്‍ഡ്റഷ് പദ്ധതി അനുസരിച്ച് കര്‍ശനമായ വ്യവസ്ഥകളില്‍ ഉള്‍പ്പെടുന്നില്ലെങ്കില്‍ പോലും ഹിപ്പോലൈറ്റിക്ക് യുകെയുമായി മതിയായ ബന്ധമുണ്ടെന്ന് കോടതി കണ്ടെത്തി.
2000ല്‍ 17ാം വയസില്‍ യുകെയിലെത്തിയ ജീനല്‍ ഹിപ്പോലൈറ്റ്, തന്റെ വിദ്യാര്‍ത്ഥി വിസയുടെ കാലാവധി കഴിഞ്ഞതിനെത്തുടര്‍ന്ന് കുടിയേറ്റ നിയമങ്ങള്‍ പാലിക്കുന്നതിനായി രണ്ട് വര്‍ഷത്തിന് ശേഷം രാജ്യം വിട്ടുപോയിരുന്നു. തന്റെ പിതാവിന് സ്ഥിരതാമസാനുമതി ഉണ്ടെന്നും അദ്ദേഹത്തിന്റെ മകള്‍ എന്ന നിലയില്‍ തനിക്കും സമാനമായ പദവിക്ക് അപേക്ഷിക്കാമെന്നും അക്കാലത്ത് അവര്‍ക്ക് അറിയില്ലായിരുന്നെന്ന് കോടതി ചൂണ്ടിക്കാട്ടി. ജീനലിന്റെ സഹോദരങ്ങള്‍ 2007ല്‍ യുകെയിലെത്തിയവരാണ്. അവരുടെ സ്ഥിരതാമസാനുമതി അപേക്ഷകള്‍ ആദ്യഘട്ടത്തില്‍ നിരസിക്കപ്പെടുകയും കുടിയേറ്റ നിയമങ്ങള്‍ ലംഘിച്ച് രാജ്യത്ത് തങ്ങുകയും ചെയ്തിരുന്നു. എന്നാല്‍, 2019ല്‍ വിന്‍ഡ്റഷ് പദ്ധതി പ്രകാരം അവര്‍ക്ക് സ്ഥിരതാമസാനുമതി ലഭിച്ചു.
സഹോദരങ്ങള്‍ക്ക് സ്ഥിരതാമസാനുമതി ലഭിച്ചതിന് ശേഷം, ജീനല്‍ ഹിപ്പോലൈറ്റ് 2020 ഓഗസ്റ്റില്‍ വിന്‍ഡ്റഷ് പദ്ധതിക്ക് കീഴില്‍ അപേക്ഷ സമര്‍പ്പിച്ചു. എന്നാല്‍, യുകെയില്‍ തുടര്‍ച്ചയായി താമസിക്കുന്നില്ല എന്ന കാരണത്താല്‍ 2021 ഫെബ്രുവരിയില്‍ അവരുടെ അപേക്ഷ നിരസിക്കപ്പെട്ടു. 2022 ഡിസംബറില്‍ അവര്‍ വീണ്ടും സ്ഥിരതാമസാനുമതിക്കായി അപേക്ഷിച്ചു. ഈ അപേക്ഷയും 2023 ഏപ്രിലില്‍ നിരസിക്കപ്പെട്ടതിനെത്തുടര്‍ന്നാണ് അവര്‍ നിയമനടപടികളുമായി മുന്നോട്ട് പോയത്. ഒടുവില്‍ അപ്പീല്‍ കോടതിയുടെ വിധിയില്‍ പ്രതികരിച്ചുകൊണ്ട് സന്തോഷത്തോടെയാണ് ജീനല്‍ ഹിപ്പോലൈറ്റ് പ്രതികരിച്ചത്.
അതേസമയം, ഈ വിധി, വിന്‍ഡ്റഷ് പദ്ധതിയുടെ കര്‍ശനമായ നിബന്ധനകള്‍ക്ക് പുറത്ത് വരുന്നവര്‍ക്കും, എന്നാല്‍ പദ്ധതിയുടെ അടിസ്ഥാന ലക്ഷ്യങ്ങളുമായി ചേര്‍ന്നുനില്‍ക്കുന്നവര്‍ക്കും പ്രതീക്ഷ നല്‍കുന്ന ഒന്നാണ്. ആഭ്യന്തര മന്ത്രാലയം ഇപ്പോള്‍ ഈ കേസ് എങ്ങനെ കൈകാര്യം ചെയ്യുന്നു എന്നത് ജീനല്‍ ഹിപ്പോലൈറ്റിന്റെ ഭാവിക്കും സമാനമായ മറ്റ് അപേക്ഷകര്‍ക്കും നിര്‍ണായകമാകും.
കുടിയേറ്റ നിയമത്തിലെ പഴുത്: പിആര്‍ നേടി പതിനായിരത്തോളം പാക്കിസ്ഥാനികള്‍
ലണ്ടന്‍: ബ്രിട്ടനിലെ കുടിയേറ്റ സംവിധാനം അകത്ത് നിന്ന് തന്നെ ദുരുപയോഗം ചെയ്യപ്പെടുന്നു എന്ന ആരോപണം സ്ഥിരീകരിച്ച് ഞെട്ടിക്കുന്ന കണക്കുകള്‍ പുറത്ത്. ഹോളിഡേ, വര്‍ക്ക്, സ്റ്റുഡന്റ് വിസകള്‍ ദുരുപയോഗം ചെയ്ത് പാക്കിസ്ഥാന്‍ പൗരന്മാര്‍ യുകെയില്‍ അഭയാര്‍ത്ഥി പദവിക്ക് അപേക്ഷിക്കുന്ന പ്രവണത വര്‍ധിക്കുന്നതായി പുതിയ ഔദ്യോഗിക വിവരങ്ങള്‍ വ്യക്തമാക്കുന്നു. കഴിഞ്ഞ വര്‍ഷം ഏകദേശം 10,000 പാക്കിസ്ഥാന്‍ പൗരന്മാര്‍ ഇത്തരം വിസകളില്‍ യുകെയില്‍ പ്രവേശിച്ച ശേഷം പിന്നീട് സ്ഥിരതാമസത്തിനായി അഭയാര്‍ത്ഥി അപേക്ഷ നല്‍കിയിട്ടുണ്ട്.
2024-ലെ സര്‍ക്കാര്‍ കണക്കുകള്‍ പ്രകാരം, അഭയാര്‍ത്ഥി പദവി തേടുന്ന രാജ്യങ്ങളുടെ പട്ടികയില്‍ പാക്കിസ്ഥാനാണ് ഒന്നാം സ്ഥാനത്ത്. യുകെയില്‍ സമര്‍പ്പിക്കപ്പെടുന്ന മൊത്തം അഭയാര്‍ത്ഥി അപേക്ഷകളില്‍ പത്തില്‍ ഒന്നും പാക്കിസ്ഥാനില്‍ നിന്നുള്ളവരാണ്. പാക്കിസ്ഥാന്‍ പൗരന്മാരില്‍ നിന്നുള്ള മൊത്തം അഭയാര്‍ത്ഥി അപേക്ഷകള്‍ 11,000ത്തിലധികം വരുമെന്നും ഇത് 2022നെ അപേക്ഷിച്ച് അഞ്ചിരട്ടി വര്‍ദ്ധനവാണെന്നും കണക്കുകള്‍ പറയുന്നു. കണ്‍സര്‍വേറ്റീവ് പാര്‍ട്ടി ഒരു വിവരാവകാശ അപേക്ഷയിലൂടെയാണ് ഈ വിവരങ്ങള്‍ നേടിയെടുത്തത്.
കണക്കുകള്‍ അനുസരിച്ച്, 2024-ല്‍ 40,739 കുടിയേറ്റക്കാരാണ് യുകെയില്‍ വിസകളിലൂടെയോ മറ്റ് നിയമപരമായ മാര്‍ഗ്ഗങ്ങളിലൂടെയോ പ്രവേശിച്ച ശേഷം അഭയാര്‍ത്ഥി പദവിക്ക് അപേക്ഷിച്ചത്. ഇതില്‍, 16,000 പേര്‍ വിദ്യാര്‍ത്ഥി വിസയിലും 11,400 പേര്‍ വിദഗ്ധ തൊഴിലാളി വിസയിലും 9,400 പേര്‍ സന്ദര്‍ശക വിസയിലും യുകെയില്‍ പ്രവേശിച്ചവരാണ്. 2024-ല്‍ യുകെയില്‍ ലഭിച്ച മൊത്തം അഭയാര്‍ത്ഥി അപേക്ഷകളില്‍ 37.6% നിയമപരമായ മാര്‍ഗ്ഗങ്ങളിലൂടെ യുകെയില്‍ പ്രവേശിച്ചവരാണ്. വിസ മാനദണ്ഡങ്ങളില്‍ നിലവിലുള്ള പഴുതുകള്‍ ചൂഷണം ചെയ്ത് സ്ഥിരതാമസത്തിനുള്ള വഴി തേടുന്ന പ്രവണത യുകെയുടെ കുടിയേറ്റ സംവിധാനത്തിന് വലിയ വെല്ലുവിളിയാണ് ഉയര്‍ത്തുന്നത്. ഈ സാഹചര്യം യുകെ സര്‍ക്കാരിന്മേല്‍ വിസ നയങ്ങള്‍ കൂടുതല്‍ കര്‍ശനമാക്കാനുള്ള സമ്മര്‍ദ്ദം വര്‍ദ്ധിപ്പിക്കുന്നു.